ഇന്ത്യൻ വിപണിയിലേക്കുള്ള ഹോണ്ടയുടെ ആദ്യ ഓൾ-ഇലക്ട്രിക് വാഹനമായ 0 ആൽഫയുടെ പ്രൊഡക്ഷൻ പതിപ്പ് ഡിസംബർ 2-ന് പുറത്തിറങ്ങും. വാഹനത്തിന്റെ ഔദ്യോഗിക പേര് നവംബറിലായിരിക്കും കമ്പനി പ്രഖ്യാപിക്കുക. രാജസ്ഥാനിലെ താപുകര പ്ലാന്റിലായിരിക്കും ഈ എസ്‌യുവിയുടെ നിർമാണം. 2025 ഒക്ടോബറിൽ നടന്ന ജപ്പാൻ മൊബിലിറ്റി ഷോയിലാണ് ഈ വാഹനം ആദ്യമായി പ്രോട്ടോടൈപ്പായി പ്രദർശിപ്പിച്ചത്.
0 ആൽഫയുടെ വരവോടെ ഇന്ത്യയിലെ വാഹന ശ്രേണി കൂടുതൽ വിപുലീകരിക്കാനാണ് ഹോണ്ട ലക്ഷ്യമിടുന്നത്. പെട്രോൾ, ഹൈബ്രിഡ്, ഇലക്ട്രിക് വിഭാഗങ്ങളിൽ ഉപഭോക്താക്കൾക്ക് വാഹനങ്ങൾ ലഭ്യമാക്കുകയാണ് കമ്പനിയുടെ പ്രധാന ലക്ഷ്യം. പുതിയ എസ്‌യുവിയുടെ സവിശേഷതകളും വിലയും ഔദ്യോഗികമായി പുറത്തുവരുന്നതോടെ ഇന്ത്യൻ ഇലക്ട്രിക് വാഹന വിപണിയിൽ ഹോണ്ടയുടെ മത്സരശേഷി വ്യക്തമാകും. ഇന്ത്യയിൽ തന്നെ നിർമിക്കുന്ന ഈ ഇലക്ട്രിക് എസ്‌യുവി ആഭ്യന്തര വിപണിയിൽ വിൽക്കുന്നതിനൊപ്പം വിദേശ രാജ്യങ്ങളിലേക്ക് കയറ്റുമതി ചെയ്യാനും കമ്പനിക്ക് പദ്ധതിയുണ്ട്. നിലവിൽ ഇന്ത്യയിലെ വിവിധ സാഹചര്യങ്ങളിൽ വാഹനത്തിന്റെ പരീക്ഷണയോട്ടങ്ങൾ നടന്നുവരികയാണ്. ടാറ്റ സിയറ ഇവി, മഹീന്ദ്ര ബിഇ 6, ഹ്യുണ്ടായ് ക്രെറ്റ ഇലക്ട്രിക്, മാരുതി ഇ വിറ്റാര, ടൊയോട്ട എബെല്ല തുടങ്ങിയ മോഡലുകളാകും വിപണിയിൽ ഇതിന്റെ പ്രധാന എതിരാളികൾ.
എൽഎഫ്പി ബാറ്ററി പാക്ക് ഓപ്ഷനുകളോടെ എത്തുന്ന ഹോണ്ടയുടെ പുതിയ ഇലക്ട്രിക് വാഹനത്തിൽ 65kWh മുതൽ 75kWh വരെ ശേഷിയുള്ള രണ്ട് ബാറ്ററി പാക്കുകളാണ് പ്രതീക്ഷിക്കുന്നത്. ഫ്രണ്ട് വീൽ ഡ്രൈവ് ലേഔട്ടിലുള്ള സിംഗിൾ-മോട്ടർ സജ്ജീകരണമായിരിക്കും വാഹനത്തിന്റെ ആദ്യഘട്ടത്തിൽ ഉണ്ടാകുക. കൺസെപ്റ്റ് മോഡലിന്റെ റാഡിക്കൽ ഡിസൈൻ പ്രൊഡക്ഷൻ പതിപ്പിലും കമ്പനി നിലനിർത്തിയിട്ടുണ്ട്. എം.പി.വി ശൈലി തോന്നിപ്പിക്കുന്ന വിധത്തിലുള്ള ലംബമായ പിൻഭാഗവും കട്ടിയുള്ള സി-പില്ലറുകളും ഈ വാഹനത്തിന്റെ പ്രത്യേകതകളാണ്. കൂടാതെ, പ്രകാശപൂരിതമായ ഹോണ്ട ലോഗോയും ചാർജിംഗ് പോർട്ടും മുൻവശത്ത് ഇടംപിടിച്ചിരിക്കുന്നു. 2,700 മുതൽ 2,800 മില്ലിമീറ്റർ വരെയായിരിക്കും വാഹനത്തിന്റെ വീൽബേസ് എന്നാണ് പ്രതീക്ഷിക്കുന്നത്.
വാഹനത്തിന്റെ അകത്തളത്തിലും ആധുനിക ഫീച്ചറുകൾ ഉൾപ്പെടുത്തിയിട്ടുണ്ട്. വലിയ ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റവും അതിന് വലതുവശത്തായി ചെറിയ ഡിജിറ്റൽ ഡ്രൈവർ ഡിസ്‌പ്ലേയും ഇതിൽ നൽകിയിരിക്കുന്നു. പാഡിൽ ഷിഫ്റ്ററുകളോടുകൂടിയ ത്രീ-സ്പോക്ക് ഫ്ലാറ്റ്-ബോട്ടം സ്റ്റീയറിങ് വീൽ, ക്ലൈമറ്റ് കൺട്രോൾ, വെന്റിലേറ്റഡ് സീറ്റുകൾ എന്നിവയ്ക്കായുള്ള ഫിസിക്കൽ ബട്ടണുകൾ സെന്റർ കൺസോളിൽ ലഭ്യമാക്കിയിട്ടുണ്ട്.