ലോകത്തെ ഏറ്റവും വേഗതയേറിയ കാർ നിർമിക്കുമെന്ന പ്രഖ്യാപനവുമായി വാക്വം ക്ലീനർ കമ്പനി. ചൈനീസ് കമ്പനിയായ ഡ്രീം ടെക്‌നോളജിയാണ് അൾട്രാ ആഡംബര ഇലക്ട്രിക് വാഹന വിപണിയിലേക്കുള്ള പ്രവേശനം പ്രഖ്യാപിച്ചത്. ലോകത്തെ ഏറ്റവും വേഗതയേറിയ കാർ നിർമിക്കുമെന്നാണ് ഡ്രീം ടെ‌ക്‌നോളജിയുടെ പ്രഖ്യാപനം. 2027ൽ കാർ പുറത്തിറക്കുമെന്ന് കമ്പനി അറിയിച്ചു.
ഡ്രീം കാർ എത്രത്തോളം ശക്തമാകുമെന്ന് ഒരു വിവരവുമില്ല, പക്ഷേ ഒരു കാര്യം ഉറപ്പാണ്, ആർട്ടിഫിഷ്യൽ ഇന്റലിജൻസ് (എഐ) കാറിൻ്റെ പ്രവർത്തനത്തിൽ പ്രധാന പങ്ക് വഹിക്കും, അത് ഡ്രൈവറുടെ ശീലങ്ങൾ പഠിക്കുകയും അവയുമായി പൊരുത്തപ്പെടുകയും ചെയ്യും. ബുഗാട്ടി വെയ്റോണിനെ മറികടക്കുമെന്നാണ് ഡ്രീം കമ്പനിയുടെ പ്രഖ്യാപനം.
ഡ്രീം ടെക്നോളജി ഇതിനകം അതിവേഗ ഡിജിറ്റൽ മോട്ടോർ സാങ്കേതികവിദ്യയിൽ പ്രശസ്തി നേടിയിട്ടുണ്ട്. ഈ വർഷം 200,000 ആർപിഎം ഡിജിറ്റൽ മോട്ടോറിന് സള്ളിവനിൽ നിന്ന് ലോകത്തിലെ ആദ്യത്തെ സർട്ടിഫിക്കേഷൻ നേടിയിരുന്നു. നിലവിൽ കമ്പനിയുടെ മുൻനിര Z50 സ്റ്റേഷൻ വാക്വം ക്ലീനറിൽ വിന്യസിച്ചിരിക്കുന്ന ഈ സാങ്കേതികവിദ്യ ലോകത്തിലെ ഏറ്റവും വേഗതയേറിയ കാർ നിർമിക്കാനുള്ള ഡ്രീമിൻ്റെ സ്വപ്നത്തിന് ശക്തി പകരും.