പുതിയ ചിത്രം 'രാക്ക'യുടെ ഒറ്റ ഫസ്റ്റ് ലുക്ക് പോസ്റ്റർ കൊണ്ട് തന്നെ ഇന്ത്യൻ സിനിമാ ലോകത്തെ ഞെട്ടിച്ചിരിക്കുകയാണ് അല്ലു അർജുൻ. ഓരോ പ്രോജക്ടിലൂടെയും തന്റെ താരമൂല്യം ഉയർത്തുന്ന അല്ലു അർജുൻ, 'പുഷ്പ 2' എന്ന ആഗോള വിജയത്തിന് പിന്നാലെ 'രാക്ക'യിലൂടെ വീണ്ടും അത്ഭുതപ്പെടുത്തുകയാണ്. വിജയങ്ങളുടെ നെറുകയിൽ നിൽക്കുമ്പോഴും കംഫർട്ട് സോണിൽ ഒതുങ്ങാൻ നടൻ തയ്യാറല്ല എന്നതിന്റെ തെളിവാണ് പുതിയ ചിത്രം. 'പുഷ്പ'യ്ക്ക് ശേഷം തികച്ചും വ്യത്യസ്തമായ, പരുക്കൻ ലുക്കിലാണ് താരം ഈ ചിത്രത്തിൽ പ്രത്യക്ഷപ്പെടുന്നത്. തന്റെ കഥാപാത്രങ്ങളെ പൂർണതയിലെത്തിക്കാൻ ഏതറ്റം വരെയും പോകാനുള്ള താരത്തിന്റെ മനസ് ഒരിക്കൽ കൂടി ഇവിടെ വ്യക്തമാകുന്നു.
ലഭ്യമാകുന്ന വിവരങ്ങൾ പ്രകാരം, 'രാക്ക'യിലെ പ്രത്യേക ലുക്ക് കൈവരിക്കാൻ ദിവസവും മൂന്ന് മുതൽ നാല് മണിക്കൂർ വരെ നീളുന്ന തീവ്രമായ തയ്യാറെടുപ്പുകളാണ് അല്ലു അർജുൻ നടത്തുന്നത്. മേക്കപ്പിലും ശരീരഭാഷയിലും വരുത്തേണ്ട മാറ്റങ്ങൾക്കായി പുലർത്തുന്ന ഈ അച്ചടക്കവും അർപ്പണബോധവും സഹപ്രവർത്തകരെ പോലും അത്ഭുതപ്പെടുത്തുകയാണ്. വിജയത്തിന്റെ കൊടുമുടിയിൽ നിൽക്കുമ്പോഴും ഒരു തുടക്കക്കാരന്റെ ആവേശത്തോടെ ഓരോ കഥാപാത്രത്തെയും സമീപിക്കുന്നു എന്നതാണ് നടന്റെ പ്രത്യേകത.
ചിത്രത്തിന്റെ ലുക്ക് പുറത്തുവന്നതിന് പിന്നാലെ തന്നെ അത് പോപ്പുലർ കൾച്ചറിലും തരംഗമായിക്കഴിഞ്ഞു. ഇന്ത്യൻ ക്രിക്കറ്റ് താരം ഹാർദിക് പാണ്ഡ്യ അല്ലു അർജുന്റെ പുതിയ സിഗ്നേച്ചർ ആംഗ്യം അനുകരിച്ചത് സോഷ്യൽ മീഡിയയിൽ വൈറലായിരുന്നു. റിലീസിന് മുൻപേ തന്നെ ഒരു കഥാപാത്രം ഇത്രമേൽ സ്വാധീനം ചെലുത്തുന്നത് ഇന്ത്യൻ സിനിമയിൽ അപൂർവമാണ്.
വിജയം ആവർത്തനങ്ങളിലേക്ക് നയിക്കുമ്പോൾ, അല്ലു അർജുൻ തന്റെ യാത്രയിൽ പുതിയ വെല്ലുവിളികൾ ഏറ്റെടുക്കാനാണ് ഇഷ്ടപ്പെടുന്നത്. 'രാക്ക' എന്നത് വെറുമൊരു മേക്കോവർ മാത്രമല്ല, കൃത്യമായ ആസൂത്രണം, കഠിനധ്വാനം ഇവയുടെ ഫലമാണ്. ഇന്ത്യൻ സിനിമയെ ആഗോളതലത്തിലേക്ക് ഉയർത്തുക എന്ന ലക്ഷ്യത്തോടെയാണ് അല്ലു അർജുൻ ഓരോ ചുവടും വയ്ക്കുന്നത്. പരീക്ഷണങ്ങൾക്കും കഠിനാധ്വാനത്തിനും താൻ എപ്പോഴും തയ്യാറാണെന്ന് 'രാക്ക'യിലൂടെ അദ്ദേഹം വീണ്ടും തെളിയിക്കുന്നു. നിരന്തരമായ മാറ്റങ്ങളിലൂടെയും അചഞ്ചലമായ പരിശ്രമത്തിലൂടെയുമാണ് യഥാർഥ താരപദവി നിലനിൽക്കുന്നതെന്ന് നടൻ ഓർമിപ്പിക്കുന്നു.
തെലുങ്ക് സൂപ്പർതാരം അല്ലു അർജുനും ബ്ലോക്ക്ബസ്റ്റർ സംവിധായകൻ അറ്റ്ലിയും ഒന്നിക്കുന്ന പുതിയ ചിത്രം 'രാക്ക'യുടെ ടൈറ്റിൽ താരത്തിന്റെ ജന്മദിനത്തോടനുബന്ധിച്ച് അടുത്തിടെയാണ് പുറത്തിറക്കിയത്. ദീപിക പദുക്കോണാണ് ചിത്രത്തിൽ നായികയായെത്തുന്നത് എന്നതാണ് മറ്റൊരു പ്രത്യേകത. ആദ്യമായാണ് അല്ലു അർജുനും ദീപിക പദുക്കോണും ഒരു സിനിമയ്ക്കായി ഒന്നിക്കുന്നത്. ഇന്ത്യൻ സിനിമയിലെ ഈ കരുത്തുറ്റ താരജോഡികളെ സ്ക്രീനിൽ കാണാൻ വലിയ ആകാംക്ഷയിലാണ് പ്രേക്ഷകർ.
'രാജാ റാണി', 'തെരി', 'മെർസൽ', 'ബിഗിൽ' തുടങ്ങിയ സൂപ്പർ ഹിറ്റ് തമിഴ് ചിത്രങ്ങൾക്കും 'ജവാൻ' എന്ന ബ്ലോക്ബസ്റ്റർ ബോളിവുഡ് ചിത്രത്തിനും ശേഷം അറ്റ്ലി ഒരുക്കുന്നതാണ് ചിത്രം. ഇന്ത്യയിലെ ഏറ്റവും വിലപിടിപ്പുള്ള സംവിധായകനും നായകനും ഒന്നിക്കുന്ന ചിത്രം സയൻസ് ഫിക്ഷൻ ഗണത്തിൽപ്പെടുന്ന സിനിമയായാണ് ഒരുങ്ങുന്നത് എന്നാണ് വിവരം. അറ്റ്ലീ ഇതുവരെ ചെയ്തിട്ടുള്ള ഴോണറുകളിൽ വ്യത്യസ്തമായെത്തുന്ന ചിത്രത്തിൽ സൂപ്പർ ഹീറോയായാണ് അല്ലു എത്തുന്നതെന്നാണ് റിപ്പോർട്ടുകൾ. അല്ലു അർജുന്റെ 22ാമത്തെ ചിത്രവും അറ്റ്ലിയുടെ ആറാമത്തെ ചിത്രവുമാണ് ഈ പാൻ-ഇന്ത്യൻ സയൻസ് ഫിക്ഷൻ ചിത്രം. പിആർഒ: ആതിര ദിൽജിത്ത്.