ശ്രദ്ധ കപൂര്‍, രാജ്കുമാര്‍ റാവു എന്നിവര്‍ കേന്ദ്ര കഥാപാത്രങ്ങളായ സ്ത്രീ 2ല്‍ അക്ഷയ് കുമാര്‍ കാമിയോ റോളില്‍ എത്തുന്നു. ഹിന്ദുസ്താന്‍ ടൈംസാണ് ഇക്കാര്യം റിപ്പോര്‍ട്ട് ചെയ്തത്. 'സ്ത്രീ 2ല്‍ അക്ഷയ് കുമാര്‍ കാമിയോ റോളില്‍ എത്തുന്നു എന്നത് സത്യമാണ്. അക്ഷയ് യുടെ കോമഡി ടൈമിംഗ് കണക്കിലെടുത്താണ് അണിയറ പ്രവര്‍ത്തകര്‍ ഈ തീരുമാനത്തില്‍ എത്തിയത്.', എന്നാണ് റിപ്പോര്‍ട്ടില്‍ പറയുന്നത്.
2018ലാണ് സ്ത്രീയുടെ ആദ്യ ഭാഗം റിലീസ് ചെയ്തത്. ചിത്രം മികച്ച നിരൂപക പ്രശംസയും വലിയ ബോക്സ് ഓഫീസ് വിജയവും നേടിയിരുന്നു. മാഡോക് ഫിലിംസിന്റെ ബാനറില്‍ ദിനേഷ് വിജയനാണ് സ്ത്രീ 2 നിര്‍മിച്ചിരിക്കുന്നത്. സ്ത്രീ, രൂഹി, ബേദിയ എന്നീ ചിത്രങ്ങളുടെ അതേ യൂണിവേഴ്സില്‍ പെടുന്ന ചിത്രമാണ് സ്ത്രീ 2.
2018 ഒക്ടോബറിലാണ് അമര്‍ കൗഷിക് സ്ത്രീയുടെ രണ്ടാം ഭാഗത്തെ കുറിച്ച് ആലോചിക്കുന്നത്. 2022ല്‍ രാജ്കുമാര്‍ റാവു സ്ത്രീയുടെ രണ്ടാം ഭാഗം വരുമെന്ന് ഉറപ്പ് നല്‍കി. ഏപ്രില്‍ 2023ല്‍ ചിത്രം 2024 ആഗസ്റ്റില്‍ റിലീസ് ചെയ്യുമെന്ന് പ്രഖ്യാപിച്ചു. നരേന്‍ ഭട്ട് ആണ് സ്ത്രീ 2ന്റെ തിരക്കഥ രചിച്ചിരിക്കുന്നത്. ജിഷ്ണു ഭട്ടാചാരിയാണ് ഛായാഗ്രാഹകന്‍. അഭിഷേക് ബാനര്‍ജി, അപര്‍ഷക്തി ഖുറാന എന്നിവരും ചിത്രത്തില്‍ അഭിനയിക്കുന്നുണ്ട്.