ആദ്യമായി സംവിധാനം ചെയ്യുന്ന ബിഗ് ബജറ്റ് ത്രീഡി ചിത്രം ബറോസിന്റെ റിലീസ് തീയതി പുറത്തുവിട്ട് നടൻ മോഹൻലാൽ. ചിത്രം ഓണം റിലീസായി സെപ്റ്റംബറിൽ തിയേറ്ററുകളിൽ എത്തില്ലെന്ന് നേരത്തെ പ്രഖ്യാപിച്ചിരുന്നു. റിലീസ് ഒക്ടോബറിലേക്ക് മാറ്റിയതായി തിയേറ്റര്‍ ഉടമകളെ ഉദ്ധരിച്ച് ട്രേഡ് അനലിസ്റ്റ് ശ്രീധര്‍ പിള്ളയും എക്സില്‍ കുറിച്ചിരുന്നു. എന്നാല്‍ സിനിമയുടെ നിര്‍മാതാക്കളായ ആശിര്‍വാദ് സിനിമാസ് ഇതുവരെയും ഇക്കാര്യം സ്ഥിരീകരിച്ചിരുന്നില്ല.
ഒക്ടോബർ മൂന്നിനാണ് സിനിമ ലോകമെമ്പാടുമുള്ള തീയേറ്ററുകളിലേക്ക് എത്തുന്നത്. മാജിക്കൽ അഡ്വഞ്ചറിനായി ഈ ദിവസം പ്രത്യേകം ഓർത്തുവെക്കണമെന്ന് മോഹൻ ഫേസ്ബുക്കിൽ കുറിച്ചു. ചിത്രത്തിന്‍റെ മേക്കിങ് വീഡിയോ അടുത്തിടെ അണിയറക്കാര്‍ പുറത്തുവിട്ടിരുന്നു.
ഹോളിവുഡിലെ സോണി സ്റ്റുഡിയോസിലാണ് ബറോസിന്റെ അവസാനഘട്ട പോസ്റ്റ് പ്രൊഡക്ഷന്‍ ജോലികള്‍ പുരോഗമിക്കുന്നത്. ചിത്രത്തിലെ ട്രെയിലര്‍ ഉടന്‍ പുറത്തുവിടും. റീ റെക്കോര്‍ഡിങ് അടക്കമുള്ള ജോലികളും വിദേശത്ത് പൂര്‍ത്തിയായിരുന്നു.
മലയാളത്തിലെ ആദ്യ ത്രീഡി ചിത്രമായ മൈഡിയര്‍ കുട്ടിച്ചാത്തന്‍റെ സൃഷ്ടാവ് ജിജോ പുന്നൂസിന്റെ ‘ബറോസ്: ഗാര്‍ഡിയന്‍ ഓഫ് ഡി ഗാമാസ് ട്രെഷര്‍’ എന്ന കഥയെ ആധാരമാക്കിയാണ് സിനിമ ഒരുക്കിയിരിക്കുന്നത്. ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂര്‍ നിര്‍മിക്കുന്ന സിനിമയുടെ തിരക്കഥയും ജിജോ പുന്നൂസ് തന്നെയാണ്.
സംവിധാനത്തിനൊപ്പം സിനിമയിലെ പ്രധാന കഥാപാത്രമായ നിധി കാക്കും ഭൂതത്തിന്‍റെ വേഷം അവതരിപ്പിക്കുന്നതും മോഹന്‍ലാലാണ്. 45 വര്‍ഷത്തെ സിനിമാ ജീവിതത്തില്‍ ആദ്യമായി മോഹന്‍ലാല്‍ സംവിധായകനാകുന്ന ചിത്രത്തെ കുറിച്ച് വലിയ പ്രതീക്ഷകളാണ് ആരാധകര്‍ക്കുള്ളത്.
ഇന്ത്യയിലെയും വിദേശത്തെയും അഭിനേതാക്കളും സാങ്കേതിക പ്രവര്‍ത്തകരുമാണ് ചിത്രത്തിനായി പ്രവര്‍ത്തിച്ചിട്ടുള്ളത്. സന്തോഷ് ശിവനാണ് ഛായാഗ്രഹണം. എഡിറ്റിങ്: ശ്രീകര്‍ പ്രസാദ്, കലാസംവിധാനം: സന്തോഷ് രാമൻ, സംഗീതം: ലിഡിയന്‍ നാദസ്വരം.