വര്‍ഷങ്ങളുടെ കാത്തിരിപ്പിന് ശേഷം ദി ഇന്റേണ്‍ എന്ന ചിത്രത്തിന്റെ ഹിന്ദി റീമേക്കിന്റെ പുതിയ അപ്‌ഡേറ്റ് പുറത്തുവന്നിരിക്കുകയാണ്. നടി ദീപിക പദുകോണ്‍ ചിത്രത്തില്‍ അഭിനയിക്കില്ലെന്നാണ് പുതിയ റിപ്പോര്‍ട്ട് സൂചിപ്പിക്കുന്നത്. അമിതാഭ് ബച്ചനൊപ്പം അഭിനയിക്കാന്‍ തീരുമാനിച്ചിരുന്നെങ്കിലും ദീപിക ചിത്രം നിര്‍മിക്കുക മാത്രമെ ചെയ്യുകയുള്ളൂ.
"ദീപിക സിനിമയില്‍ അഭിനയിക്കില്ല. പകരം നിര്‍മാതാവായി മാത്രം പ്രവര്‍ത്തിക്കും. ക്രിയേറ്റീവ് കാര്യങ്ങളില്‍ മേല്‍നോട്ടം വഹിക്കുകയും ചെയ്യും. ദീപിക അവതരിപ്പിക്കാന്‍ തീരുമാനിച്ചിരുന്ന വേഷത്തിനായി പുതിയ നായികയെ നിയമിക്കും", എന്നാണ് മിഡ് ഡേ റിപ്പോര്‍ട്ട് ചെയ്യുന്നത്.
തന്റെ ക്രിയേറ്റീവ് കാര്യങ്ങള്‍ വികസിപ്പിക്കാനാണ് ദീപിക ഈ തീരുമാനം എടുത്തതെന്നാണ് റിപ്പോര്‍ട്ടില്‍ പറയുന്നത്. "നിര്‍മാതാവ് എന്ന നിലയില്‍ അവര്‍ ഏറ്റെടുക്കാന്‍ ഉദ്ദേശിച്ചിരിക്കുന്ന അഞ്ച് പ്രൊജക്ടുകളില്‍ ആദ്യത്തേതാണ് ഇന്റേണ്‍. ആഗോള തലത്തില്‍ പ്രസക്തമായ കഥകള്‍ പറയാനാണ് അവര്‍ ആഗ്രഹിക്കുന്നത്", എന്നും സൂചനയുണ്ട്.
ആന്‍ ഹാതവെ, റോബേര്‍ട്ട് ഡി നീരോ എന്നിവര്‍ കേന്ദ്ര കഥാപാത്രങ്ങളായി എത്തിയ 2015ല്‍ പുറത്തിറങ്ങിയ ഹോളിവുഡ് ചിത്രമാണ് ദി ഇന്റേണ്‍. 2020ലാണ് കെഎ പ്രൊഡക്ഷന്‍സ് ചിത്രത്തിന്റെ അവകാശം നേടിയത്. അന്നു മുതല്‍ ഹിന്ദി റീമേക്കിന്റെ പണിപ്പുരയിലാണ് നിര്‍മാതാക്കള്‍.
ഋഷി കപൂര്‍ ആയിരുന്നു ചിത്രത്തില്‍ ആദ്യമായി പ്രധാന കഥാപാത്രത്തെ അവതരിപ്പിക്കാന്‍ ഇരുന്നത്. എന്നാല്‍ അദ്ദേഹത്തിന്റെ വിയോഗത്തിന് പിന്നാലെ അത് അബിതാഭ് ബച്ചനിലേക്ക് എത്തി. കൊവിഡ്, ദീപികയുടെ പ്രഗ്നന്‍സി എന്നിവയാണ് ചിത്രത്തിന്റെ നിര്‍മാണം വൈകാന്‍ കാരണങ്ങളായത്.
"ദി ഇന്റേണ്‍ ജോലി സ്ഥലത്ത് നടക്കുന്ന കാര്യങ്ങളെയും ബന്ധങ്ങളെയും അടിസ്ഥാനമാക്കിയുള്ള സിനിമയാണ്. ഇന്നത്തെ സാമൂഹിക സാംസ്‌കാരിക അന്തരീക്ഷത്തില്‍ വളരെ പ്രസക്തമാണെന്ന് ഞാന്‍ വിശ്വസിക്കുന്ന കഥ. ഞാന്‍ ഒരു കോമഡി-ഡ്രാമയ്ക്കായി തിരയുകയായിരുന്നു. ഈ കഥ അതിന് യോജിക്കുന്നു. ഈ യാത്ര ആരംഭിക്കാന്‍ ഞാന്‍ കാത്തിരിക്കുകയാണ്", എന്നാണ് ദീപിക സിനിമയെ കുറിച്ച് 2020ല്‍ പറഞ്ഞത്.
വാര്‍ണര്‍ ബ്രദേഴ്‌സ് ഇന്ത്യ, കെഎ പ്രൊഡക്ഷന്‍സ്, അസൂര്‍ എന്റര്‍ട്ടെയിന്‍മെന്റ് എന്നിവരുമായി ചേര്‍ന്ന് സുനില്‍ ഖേതേര്‍പാല്‍ ആണ് ഹിന്ദി റീമേക്ക് നിര്‍മിക്കുന്നത്. അമിത് രവീന്ദര്‍നാഥ് ശര്‍മയാണ് സംവിധായകന്‍. 2022ല്‍ ചിത്രം റിലീസ് ചെയ്യാനായിരുന്നു ആദ്യം തീരുമാനിച്ചിരുന്നത്.