ചെന്നൈ: ശിവകാർത്തികേയൻ ചിത്രം 'പരാശക്തി'ക്ക് ആശ്വാസം. സിനിമയ്ക്ക് സെൻട്രൽ ബോർഡ് ഓഫ് ഫിലിം സർട്ടിഫിക്കേഷന്റെ ക്ലിയറൻസ് സർട്ടിഫിക്കറ്റ് ലഭിച്ചു. UA 16+ സർട്ടിഫിക്കറ്റ് ആണ് സിനിമയ്ക്ക് ലഭിച്ചിരിക്കുന്നത്. മുൻ നിശ്ചയിച്ച പ്രകാരം, ജനുവരി 10ന് പൊങ്കൽ റിലീസായി ചിത്രം തിയേറ്ററുകളിലേക്ക് എത്തും.
രണ്ട് മണിക്കൂറും 42 മിനുട്ടും ആണ് സിനിമയുടെ ദൈർഘ്യം. 1960കളിലെ തമിഴ്നാട്ടിലെ ഹിന്ദി വിരുദ്ധ സമരങ്ങളുടെ പശ്ചാത്തലത്തിലാണ് സുധ കൊങ്കര 'പരാശക്തി' ഒരുക്കിയിരിക്കുന്നത്. ശിവകാർത്തികേയന്റെ 25ാമത് ചിത്രമായ 'പരാശക്തി'യിൽ രവിമോഹൻ, അഥർവ, ശ്രീലീല എന്നിവരാണ് മറ്റ് പ്രധാന വേഷങ്ങളിലെത്തുന്നത്.
സിനിമയിലെ ഹിന്ദി വിരുദ്ധ സമരങ്ങളുമായി ബന്ധപ്പെട്ട പല രംഗങ്ങൾക്കും ചെന്നൈയിലെ റീജിയണൽ ഓഫീസ് എതിർപ്പ് അറിയിച്ചിരുന്നു. സമരങ്ങളുമായി ബന്ധപ്പെട്ട രംഗങ്ങളും സംഭാഷണങ്ങളും മാറ്റാനോ നീക്കം ചെയ്യാനോ ആണ് ബോർഡ് ആവശ്യപ്പെട്ടത്. എക്സാമിനിങ് കമ്മിറ്റി 23 കട്ടുകൾ നിർദേശിച്ചതായാണ് റിപ്പോർട്ടുകൾ. ഇതിനെ തുടർന്ന്, സംവിധായിക സുധ കൊങ്കര റിവൈസിങ് കമ്മിറ്റിയെ സമീപിക്കുകയായിരുന്നു.
ജനുവരി എട്ടിന് സിനിമയുടെ റീ എഡിറ്റഡ് വേർഷൻ റിവൈസിങ് കമ്മിറ്റി കണ്ടിരുന്നു. എന്നാൽ, നിർദേശിച്ച ദൈർഘ്യത്തിനനുസരിച്ചല്ല മാറ്റങ്ങൾ വരുത്തിയതെന്ന് ചൂണ്ടിക്കാട്ടി 15 സീനുകളുടെ കാര്യത്തിൽ അവർ തടസവാദങ്ങൾ ഉന്നയിച്ചിരുന്നു. എന്നാൽ സിനിമ വീണ്ടും പരിശോധിച്ച കമ്മിറ്റി UA സർട്ടിഫിക്കറ്റ് നൽകുകയായിരുന്നു.
രവി കെ ചന്ദ്രന് ആണ് സിനിമയുടെ ഛായാഗ്രഹണം. സതീഷ് സൂര്യ ആണ് എഡിറ്റിങ്ങ്. ആക്ഷന് സീക്വന്സുകള് ഒരുക്കുന്നത് സുപ്രീം സുന്ദറാണ്. കലാസംവിധാനം: എസ്. അണ്ണാദുരൈ, വരികൾ: യുഗഭാരതി, ഏകദേശി, അറിവ്, കബീർ വാസുകി, ജയശ്രീ മതിമാരൻ, അഡീഷണൽ സ്ക്രീൻപ്ലേ: ഗണേശ, അഡീഷണൽ ഡയലോഗ്: മദൻ കാർക്കി, ഷാൻ കറുപ്പുസാമി, വസ്ത്രാലങ്കാരം: പൂർണിമ, ഡി.അരുൺ മോഹൻ, നൃത്തസംവിധാനം: ബൃന്ദ, ക്രുതി മഹേഷ്, അനുഷ വിശ്വനാഥൻ, സൗണ്ട് ഡിസൈൻ: സുരൻ. ജി – എസ് അളഗിയക്കൂത്തൻ, വിഎഫ്എക്സ് സൂപ്പർവൈസർ: കെ.വി. സഞ്ജിത്, കളറിസ്റ്റ്: ആശിർവാദ് ഹഡ്കർ, ഹെയർ & മേക്കപ്പ്: സെറീന, എസ്. ഷൈദ് മാലിക്, സ്റ്റിൽസ്: സി.എച്ച്. ബാലു, ക്രിയേറ്റീവ് പ്രൊഡ്യൂസർ: ദേവ് രാംനാഥ്, എക്സിക്യൂട്ടീവ് പ്രൊഡ്യൂസർമാർ: എം.പി. സെന്തൽ, റിയ കൊങ്കര.