കേരളത്തിൽ പാമ്പുകടിയേറ്റ കേസുകൾ ദിനംപ്രതി വർധിച്ചുവരികയാണ്. ചൂട് കൂടിയതുതോടെ പാമ്പുകൾ ജനവാസകേന്ദ്രങ്ങളിൽ അധികമായി കാണപ്പെടുന്ന സാഹചര്യം ഉണ്ട്. കുട്ടികളടക്കം നിരവധിപ്പേർക്കാണ് ദിനം പ്രതി പാമ്പുകടിയേൽക്കുന്നത്. ഇതിനോടകം തന്നെ ഏറെ മരണങ്ങളും റിപ്പോർട്ട് ചെയ്തുകഴിഞ്ഞു. മനുഷ്യർക്ക് പാമ്പുകടിയേൽക്കുന്നത് ഏറെ ആശങ്ക ഉയർത്തുന്ന കാര്യമാണ്. അതോടൊപ്പം തന്നെ പാമ്പുകൾ പച്ചക്കറികളിലും പഴങ്ങളിലും കടിക്കുമോ എന്ന സംശയവും ഭീതി പടർത്തുന്നുണ്ട്.
സംശയം ന്യായമാണ്. പറമ്പിലും മറ്റും ഉണ്ടാകുന്ന പച്ചക്കറികളിലും, പഴങ്ങളിലുമെല്ലാം മറ്റ് ജീവികളേപ്പോലെ തന്നെ പാമ്പുകളും സ്പർശിക്കാനും കടിക്കാനുമുള്ള സാധ്യതയുണ്ട്. എന്നാൽ അതിലൂടെ വിഷം കയറുമോ, ആ വിഷം അത് കഴിക്കുന്ന മനുഷ്യരിലേക്ക് എത്തുമോ എന്ന ആശങ്കകൾക്ക് ഇടം കൊടുക്കേണ്ടതില്ല എന്നാണ് വിദഗ്ധർ പറയുന്നത്. അതായത് പാമ്പ് കടിച്ചാൽ പഴങ്ങളോ പച്ചക്കറികളോ വിഷമയമാകില്ല എന്നതാണ് യാഥാർഥ്യം.
പാമ്പ് വിഷം ഒരുതരം പ്രോട്ടീനാണ്. രക്തത്തിൽ കലർന്നാൽ മാത്രമേ അത് വിഷമായി പ്രവർത്തിക്കുന്നുള്ളൂ. ഇനി പാമ്പ് കടിച്ചതുകൊണ്ട് പഴങ്ങളിലോ പച്ചക്കറികളിലോ എന്തെങ്കിലും തരത്തിലുള്ള വിഷാംശം എത്തിയാൽ തന്നെ അത് ആമാശയത്തില് എത്തി ദഹന സമയത്ത് ഉത്പാദിപ്പിക്കപ്പെടുന്ന ഗ്യാസ്ട്രിക് ആസിഡിന്റെ പ്രവർത്തനത്തിൽ ഇല്ലാതാകുകയും ചെയ്യും. അതായത് വലിയ ദോഷമൊന്നും ശരീരത്തിന് ഉണ്ടാക്കുന്നില്ല എന്ന് സാരം.
മറ്റൊരു കാര്യം പഴങ്ങളിലും പച്ചക്കറികളിലുമൊക്കെ പാമ്പുകള് കടിക്കാനുള്ള സാധ്യത വളരെ കുറവാണ് എന്നതാണ്. സാധാരണയായി പാമ്പുകൾ മാംസഭുക്കുകളാണ്. നിർജീവമായ വസ്തുക്കളെ കടിക്കാൻ സാധ്യതയില്ല. അതുപോലെ തന്നെ അവ പല്ലുകൾ ഉപയോഗിക്കുന്നതും അപൂർവമാണ്. അതായത് പാമ്പുകൾ പഴങ്ങളും പച്ചക്കറികളും കടിക്കാനും അതുവഴി അവ ഭക്ഷിക്കുന്ന മനുഷ്യരിലേക്ക് നിന്ന് വിഷം ഏൽക്കാനുമുള്ള സാധ്യതയില്ല എന്ന് മനസിലാക്കാം.
എന്നാൽ ശ്രദ്ധിക്കേണ്ട കാര്യം ഇതാണ്. പക്ഷേ പാമ്പ് ഇഴഞ്ഞ് നടക്കുന്ന സമയത്ത് മണ്ണില് നിന്നുള്ള ബാക്ടീരിയയും മറ്റ് അണുക്കളും അതിന്റെ ശരീരത്തില് പറ്റാവുന്നതാണ്. ഇത് പഴങ്ങളിലും പച്ചക്കറികളിലും പറ്റിപ്പിടിക്കാം. ഇവയെല്ലാം കഴുകി ഉപയോഗിച്ചില്ലെങ്കിൽ ശരീരത്തിന് ദോഷം ചെയ്യും. പാമ്പ് സ്പർശിക്കുന്നത് വഴി മാത്രമല്ല അല്ലാതെയും ബാക്ടീരിയകളുടെ സാന്നിധ്യം പഴങ്ങളിലും പച്ചക്കറികളിലും കണ്ടേക്കാം. അതുകൊണ്ട് അവ വൃത്തിയാക്കി മാത്രം ഉപയോഗിക്കുക.