ഓവർ നൈറ്റ് ഓട്സ് ആരോഗ്യത്തിന് നല്ലതാണോ? അറിയേണ്ടതെല്ലാം

ശരീര ഭാരം കുറയ്ക്കാൻ ഡയറ്റെടുക്കുന്നവർ സാധാരണയായി കഴിക്കുന്ന പ്രഭാത ഭക്ഷണങ്ങളിൽ ഒന്നാണ് ഓവർ നൈറ്റ് ഓട്സ്. തലേദിവസം രാത്രിയിൽ പാലിലോ യോഗേർട്ടിലോ ഓട്സ് കുതിർത്ത് വെച്ചാണ് ഓവർ നൈറ്റ് ഓട്സ് തയ്യാറാക്കുന്നത്. ബദാം, കശുവണ്ടി, ചിയ സീഡ്സ് എന്നിവയ്ക്കൊപ്പം മധുരത്തിനായി തേനും പഴങ്ങളും ചേർക്കാവുന്നതാണ്. രുചി കൊണ്ടും ഗുണം കൊണ്ടും ഏറെ മുന്നിലാണ് ഈ മിശ്രിതം. ഓവർ നൈറ്റ് ഓട്സ് കഴിക്കുന്നതിന് ആരോഗ്യകരമായ ഗുണങ്ങളുണ്ടെന്ന് പറയുന്നതിൻ്റെ ചില പ്രധാന കാരണങ്ങൾ ഇവയെല്ലാമാണ്.

പോഷക ഗുണങ്ങളാൽ സമ്പന്നം

ഓട്‌സ് കോപ്ലക്സ് കാർബോഹൈഡ്രേറ്റുകൾ, ഫൈബർ, വിറ്റാമിനുകൾ (വിറ്റാമിൻ ബി), ധാതുക്കൾ (മഗ്നീഷ്യം, ഇരുമ്പ്) എന്നിവയുടെ ഉറവിടമാണ്. ഇത് ശരീരത്തിന് സുസ്ഥിരമായ ഊർജ്ജം നൽകുകയും രാവിലെ മുഴുവൻ നിങ്ങളെ വിശപ്പില്ലാതെ നിലനിർത്താൻ സഹായിക്കുകയും ചെയ്യും.

ഉയർന്ന അളവിൽ ഫൈബർ

ഓട്സിൽ സോല്യൂബിള്‍ ഫൈബര്‍, പ്രത്യേകിച്ച് ബീറ്റാ-ഗ്ലൂക്കനുകൾ എന്നിവ അടങ്ങിയിട്ടുണ്ട്, ഇത് കൊളസ്ട്രോൾ കുറയ്ക്കാനും രക്തത്തിലെ പഞ്ചസാരയുടെ അളവ് നിയന്ത്രിക്കാനും സഹായിക്കും. ഫൈബർ ദഹനം ആരോഗ്യകരമാക്കാനും സഹായിക്കുന്നു.

പ്രോട്ടീനിൻ്റെ കലവറ

പാലുമായോ തൈരുമായോ യോജിപ്പിച്ച് കഴിക്കുന്നത് ശരീരത്തിന് പ്രോട്ടീൻ കിട്ടുന്നതിനും കാരണമാകുന്നു. ഇത് പേശികളുടെ വളർച്ചയ്ക്കും ശരീരത്തിൻ്റെ മൊത്തത്തിലുള്ള പ്രവർത്തനത്തിനും സഹായകമാവുന്നു.

ഹൃദയത്തിൻ്റെ ആരോഗ്യം

ഓട്സിലെ ഫൈബറുകളും പോഷകങ്ങളും ഹൃദ്രോഗ സാധ്യത കുറയ്ക്കുന്നതുമായി ബന്ധപ്പെട്ടിരിക്കുന്നു. മോശമായ എൽഡിഎൽ കൊളസ്‌ട്രോളിൻ്റെ അളവ് കുറയ്ക്കാനും ഹൃദയാരോഗ്യം പ്രോത്സാഹിപ്പിക്കാനും അവ സഹായിക്കും.

വിശപ്പ് കുറയ്ക്കാൻ സഹായിക്കുന്നു

ഓട്സിൽ ഫൈബറുകൾ, പ്രോട്ടീൻ, ആരോഗ്യകരമായ കൊഴുപ്പുകൾ എന്നിവയുടെ സംയോജനം അടങ്ങിയിരിക്കുന്നതിനാൽ, അവ നിങ്ങളെ വിശപ്പില്ലാതെ നിലനിർത്താൻ സഹായിക്കും. ഇത് തടി കൂട്ടുന്ന തരത്തിലുള്ള ഭക്ഷണങ്ങൾ കഴിക്കാനുള്ള പ്രലോഭനത്തെ കുറയ്ക്കുകയും ചെയ്യുന്നു.

ഓവർ നൈറ്റ് ഓട്സിൻ്റെ ഗുണങ്ങൾ നിങ്ങൾ ചേർക്കുന്ന ചേരുവകളെ ആശ്രയിച്ചിരിക്കുന്നു എന്നത് ശ്രദ്ധിക്കേണ്ടതാണ്. ആരോഗ്യകരമായി നിലനിൽക്കാൻ, പ്രകൃതിദത്തമായ മധുരം (തേൻ), പഴങ്ങൾ, മധുരമില്ലാത്ത പാൽ അല്ലെങ്കിൽ തൈര്, കുറഞ്ഞ അളവിൽ പഞ്ചസാര, കൊഴുപ്പുകൾ എന്നിവ ഉപയോഗിക്കാൻ ശ്രദ്ധിക്കുക. ഈ രീതിയിൽ ഉപയോഗിച്ചാൽ പോഷകസമൃദ്ധവും തൃപ്തികരവുമായ ഒരു പ്രഭാതഭക്ഷണം നിങ്ങൾക്ക് ആസ്വദിക്കാം.

ഓവർ നൈറ്റ് ഓട്സ് എങ്ങനെ ഉണ്ടാക്കണമെന്ന് നിങ്ങൾക്ക് ഇപ്പോഴും അറിയില്ലെങ്കിൽ, ഒരു ലളിതമായ പാചകക്കുറിപ്പ് ചുവടെ ചേർക്കുന്നു.


ചേരുവകൾ

1. ഓട്സ് - അരക്കപ്പ്
2. പാൽ - അരക്കപ്പ്
3. യോഗട്ട് - 1 കപ്പ്
4. ചിയ സീഡ് - 1 സ്പൂൺ
5. തേൻ - 1 സ്പൂൺ
6. ഈന്തപ്പഴം - 3
7. ആപ്പിൾ - 1

ഓട്സ്, പാൽ, യോഗട്ട്, ചിയ സീഡ്, തേൻ, ഈന്തപ്പഴം മുറിച്ചത് എന്നിവയെല്ലാം ഒരു പാത്രത്തിലാക്കി നന്നായി യോജിപ്പിക്കുക. ശേഷം രാത്രിയിൽ ഫ്രിഡ്ജിൽ സൂക്ഷിക്കണം.

രാവിലെ പുറത്തെടുത്ത് തണുപ്പ് കുറഞ്ഞതിന് ശേഷം ഇതിലേയിക്ക് ആപ്പിൾ മുറിച്ചിട്ട് കഴിക്കാം.