മുഖ്യമന്ത്രി പിണറായി വിജയന്റെ 'ദി ഹിന്ദുവിലെ' അഭിമുഖവുമായി ബന്ധപ്പെട്ട് ഡൽഹി പൊലീസിനും ഗവർണർക്കും പരാതി നൽകി സന്നദ്ധ സംഘടനയായ എച്ച്ആര്ഡിഎസ്. പരാതികളിൽ നടപടി ഉണ്ടായില്ലെങ്കിൽ കോടതിയെ സമീപിക്കുമെന്നും സംഘടന അറിയിച്ചു. വിവാദ അഭിമുഖത്തിൽ മുഖ്യമന്ത്രി, മാധ്യമ പ്രവർത്തക, ദി ഹിന്ദു, പിആർ ഏജൻസി എന്നിവർക്കെതിരെ അന്വേഷണം വേണമെന്നും എച്ച്ആര്ഡിഎസ് ജനറൽ സെക്രട്ടറി അജി കൃഷ്ണൻ പറഞ്ഞു.
ദ ഹിന്ദുവിന് നൽകിയ അഭിമുഖത്തിൽ മുഖ്യമന്ത്രി പറഞ്ഞതെന്ന തരത്തിൽ പുറത്തുവന്ന മലപ്പുറത്തെക്കുറിച്ചുള്ള പരാമർശങ്ങൾ വിവാദമായിരുന്നു. സെപ്തംബർ 29ന് രാവിലെ 9 മണിക്കാണ് കേരള ഹൗസിൽ വെച്ച് പത്രത്തിൻ്റെ മാധ്യമ പ്രവർത്തക മുഖ്യമന്ത്രിയുമായി അഭിമുഖം നടത്തിയത്.
കഴിഞ്ഞ 5 വര്ഷ കാലയളവില് മലപ്പുറം ജില്ലയില് നിന്ന് മാത്രം 150 കിലോഗ്രാം സ്വര്ണവും 123 കോടി രൂപയുടെ ഹവാല പണവും കേരള പൊലീസ് പിടികൂടിയെന്നും, രാജ്യവിരുദ്ധ പ്രവര്ത്തനങ്ങള്ക്കും സംസ്ഥാന വിരുദ്ധ പ്രവര്ത്തനങ്ങള്ക്കുമാണ് കേരളത്തിലേക്ക് ഇത്തരത്തില് പണം കടത്തുന്നതെന്ന് മുഖ്യമന്ത്രി പറഞ്ഞെന്നാണ് ദി ഹിന്ദു റിപ്പോർട്ട് ചെയ്തത്.
വിവാദ പ്രസ്താവന അഭിമുഖത്തിൽ പറഞ്ഞതല്ലെന്നും ഹിന്ദു കൂട്ടിച്ചേർത്തതാണെന്നുമായിരുന്നു മുഖ്യമന്ത്രിയുടെ ഓഫീസ് നൽകിയ വിശദീകരണം. പിന്നാലെ ഇത് അഭിമുഖത്തിൽ ചോദിച്ചതല്ലെന്നും പി ആർ ഏജൻസി എഴുതി നൽകിയത് മുഖ്യമന്ത്രി പറഞ്ഞതായി അഭിമുഖത്തിൽ കൂട്ടിച്ചേർക്കുകയുമായിരുന്നുവെന്നും ദ ഹിന്ദു വിശദീകരണ പുറത്തുവിട്ട വിശദീകരണ കുറിപ്പിൽ പറയുന്നു.