സ്കൂളുകളില് ശനിയാഴ്ച പ്രവൃത്തി ദിവസമാക്കുന്നത് സംബന്ധിച്ച സര്ക്കാര് ഉത്തരവ് ഹൈക്കോടതി റദ്ദാക്കി. അധ്യയന ദിവസം 220 ആക്കി വര്ധിപ്പിച്ച പുതിയ വിദ്യാഭ്യാസ കലണ്ടര് സംബന്ധിച്ച് സര്ക്കാര് കൂടിയാലോചിച്ച് തീരുമാനമെടുക്കണമെന്നും ഉത്തരവില് പറയുന്നു.
സര്ക്കാര് ഉത്തരവ് ചോദ്യം ചെയ്ത് കേരള പ്രദേശ് സ്കൂള് ടീച്ചേഴ്സ് അസോസിയേഷന് (കെ.പി.എസ്.ടി.എ), കേരള സ്കൂള് ടീച്ചേഴ്സ് യൂനിയന് (കെ.എസ്.ടി.യു), സ്കൂള് ഗ്രാജുവേറ്റ് ടീച്ചേഴ്സ് അസോസിയേഷന് (പി.ജി.ടി.എ) തുടങ്ങിയ സംഘടനകള് നല്കിയ ഹര്ജികളിലാണ് ഉത്തരവ്.
ജൂണ് മൂന്നിനാണ് 220 പ്രവൃത്തി ദിവസങ്ങള് ഉള്പ്പെടുന്ന പുതിയ വിദ്യാഭ്യാസ കലണ്ടര് സര്ക്കാര് പുറത്തിറക്കിയത്. മുന് വര്ഷങ്ങളിലെ 200 അധ്യയന ദിവസമെന്ന കലണ്ടറില് മാറ്റം വരുത്തിയാണ് ഈ തീരുമാനമെടുത്തത്. മൂവാറ്റുപുഴ വിട്ടൂര് എബനേസര് ഹയര് സെക്കന്ഡറി സ്കൂള് മാനേജര് നല്കിയ ഹരജിയില് ഹൈകോടതി ഉത്തരവുണ്ടായതിനെ തുടര്ന്നാണ് സര്ക്കാര് ഇത്തരമൊരു തീരുമാനം പ്രഖ്യാപിച്ചത്.