NEWSROOM

ഇൻഡ്യാ സഖ്യ പ്രതിഷേധത്തിലെ പൊലീസ് നടപടി; നാളെ സംസ്ഥാന വ്യാപകമായി കരിദിനം ആചരിക്കുമെന്ന് കോ​ൺ​ഗ്രസ്

ഇന്നത്തെ പ്രധാനവാര്‍ത്തകള്‍ ഒറ്റനോട്ടത്തില്‍

ന്യൂസ് ഡെസ്ക്

എം.വി. ഗോവിന്ദനെതിരെ ശാസന മാത്രം പോരാ; സിപിഐഎം പത്തനംതിട്ട വിപുലീകൃത ജില്ലാ കമ്മിറ്റിയില്‍ രൂക്ഷ വിമര്‍ശനം

സിപിഐഎം പത്തനംതിട്ട വിപുലീകൃത ജില്ലാ കമ്മിറ്റിയിൽ പാര്‍ട്ടി സംസ്ഥാന സെക്രട്ടറിക്കെതിരെ പ്രതിനിധികൾ. എം.വി. ഗോവിന്ദനെതിരായ നടപടി ശാസനയിൽ ഒതുക്കിയതിനെ പ്രതിനിധികൾ രൂക്ഷഭാഷയിൽ വിമർശിച്ചു. ശാസന പോരെന്നും കൂടുതൽ നടപടികൾക്ക് സമയം വൈകിയിട്ടില്ലെന്നും പ്രതിനിധികൾ. തെരഞ്ഞെടുപ്പ് പരാജയത്തിൽ നിന്നും ഒളിച്ചോടാൻ സെക്രട്ടറിക്ക് കഴിയില്ലെന്നും വിമർശനം. ആഗോള അയ്യപ്പ സംഗമം വലിയ തിരിച്ചടി ഉണ്ടാക്കി. ശബരിമല സ്വർണക്കൊള്ള കേസ് പ്രതി എ. പത്മകുമാറിനെതിരെ നേരത്തെ കടുത്ത നടപടി സ്വീകരിക്കേണ്ടതായിരുന്നു എന്നും അഭിപ്രായം ഉയർന്നു. അതേസമയം ജില്ലാ സെക്രട്ടേറിയറ്റിലേക്ക് കോന്നി എംഎല്‍എ കെ.യു. ജനീഷ് കുമാറിനെ പരിഗണിച്ചേക്കും.

റൊണാൾഡോ ദേശീയ ടീമിലേക്ക് തിരിച്ചുവരുന്നു

പോർച്ചുഗൽ ദേശീയ ടീമിലേക്ക് തിരിച്ചുവരാൻ തയ്യാറെന്ന് ക്രിസ്റ്റ്യാനോ റൊണാൾഡോ. നേഷൻസ് ലീഗിനിടെ ക്യാംപ് വിട്ടതിൽ താരം ഖേദം പ്രകടിപ്പിച്ചു. ക്യാംപ് വിട്ടതിൽ പോർച്ചുഗൽ ഫുട്ബോൾ ഫെഡറേഷൻ നൽകുന്ന നടപടികൾ സ്വീകരിക്കും. നിയമം എല്ലാവർക്കും ബാധകമാണ്. നടപടികൾക്കുശേഷം ടീമിനൊപ്പം ചേരുമെന്നും റോണോയുടെ ഇൻസ്റ്റഗ്രാം കുറിപ്പ്. ക്യാംപ് വിടാനുള്ള കാരണങ്ങൾ കുറിപ്പില്‍ താരം തുറന്നു പറയുന്നുണ്ട്. പരിശീലകൻ ഹോർഹെ ജീസസ് നൽകിയ വാക്കുകൾ തെറ്റിച്ചെന്നും കുറിപ്പിൽ പറയുന്നുണ്ട്.

ശസ്ത്രക്രിയയ്ക്ക് എത്തിയ രോഗി മരിച്ചു; പരിയാരം മെഡിക്കല്‍ കോളേജിനെതിരെ ചികിത്സാപ്പിഴവ് ആരോപണം

കണ്ണൂര്‍ പരിയാരം മെഡിക്കൽ കോളേജ് ആശുപത്രിയില്‍ ശസ്ത്രക്രിയയ്ക്ക് എത്തിയ രോഗി മരിച്ചു. ചികിത്സാപ്പിഴവാണ് മരണത്തിന് കാരണമെന്ന് ബന്ധുക്കള്‍ ആരോപിച്ചു. ഹൃദയ വാല്‍വ് ശസ്ത്രക്രിയയ്ക്കായി എത്തിയ ഇരിട്ടി വള്ളിത്തോട് സ്വദേശി ഫാത്തിമയാണ്‌ മരിച്ചത്. ഇന്നലെ രാവിലെ ഒമ്പതോടെ ശസ്ത്രക്രിയയ്ക്കായി ഫാത്തിമയെ ഓപ്പറേഷന്‍ തീയേറ്ററില്‍ കയറ്റി. അതു സംബന്ധിച്ച വിവരങ്ങളൊന്നും നല്‍കിയില്ലെന്ന് ബന്ധുക്കള്‍ പറയുന്നു. രാത്രിയോടെ മരിച്ചെന്ന് അറിയിക്കുകയായിരുന്നു. ശസ്ത്രക്രിയ അറിയിച്ചിട്ടില്ലെന്നും, കുടുംബത്തിന്റെ സമ്മതമില്ലാതെയാണ് ശസ്ത്രക്രിയ നടത്തിയതെന്നുമാണ് ബന്ധുക്കളുടെ ആരോപണം. ഫാത്തിമയുടെ മരണത്തിന് ഉത്തരവാദികളായവര്‍ക്കെതിരെ കടുത്ത നടപടി സ്വീകരിക്കണമെന്ന് ഭർത്താവ് കുഞ്ഞുമുഹമ്മദ്‌ ആവശ്യപ്പെട്ടു.

കോഴിക്കോട് വിദ്യാർഥികൾക്കിടയിലേക്ക് കാർ ഇടിച്ചുകയറി; അഞ്ചു പേര്‍ക്ക് പരിക്ക്

കോഴിക്കോട് വെള്ളിമാടുകുന്ന് ലോ കോളേജിന് മുന്നിൽ വിദ്യാർഥികൾക്കിടയിലേക്ക് കാർ ഇടിച്ചുകയറി, അഞ്ചു പേര്‍ക്ക് പരിക്ക്. ചൊവ്വാഴ്ച രാത്രി 11.15ഓടെയായിരുന്നു അപകടം. സംസാരിച്ചു നിൽക്കുകയായിരുന്ന വിദ്യാർഥികളുടെ ഇടയിലേക്ക് കാർ പാഞ്ഞുകയറുകയായിരുന്നു. പരിക്കേറ്റവരെ കോഴിക്കോട് മെഡിക്കൽ കോളേജിൽ പ്രവേശിപ്പിച്ചു. ഡ്രൈവറെ പൊലീസ് കസ്റ്റഡിയിലെടുത്തു. ഡ്രൈവർ മദ്യപിച്ചിരുന്നതായാണ് പ്രാഥമിക വിവരം.

പലിശനിരക്ക് കൂട്ടി റിസര്‍വ് ബാങ്ക്; റിപ്പോ നിരക്ക് 5.5 ശതമാനമായി ഉയര്‍ത്തി, വായ്പകളുടെ പലിശ കൂടും

പണനയം പ്രഖ്യാപിച്ച് ആര്‍ബിഐ. റിപ്പോ നിരക്ക് 25 ബേസിസ് പോയിന്റ് ഉയര്‍ത്തി 5.50 ശതമാനമാക്കി. 2023നുശേഷം ആദ്യമായാണ് റിപ്പോ നിരക്ക് വര്‍ധിപ്പിക്കുന്നത്. ഇതോടെ, ഭവന, വാഹന, വ്യക്തിഗത വായ്പകളുടെ പലിശനിരക്ക് കൂടാനാണ് സാധ്യത.

ഭരണത്തലവനെന്ന നിലയില്‍ 25 വര്‍ഷം; ജനസേവനം ചെയ്യാനായത് ജനങ്ങളുടെ ആശിര്‍വാദം കൊണ്ടെന്ന് പ്രധാനമന്ത്രി നരേന്ദ്ര മോദി

ഭരണത്തലവനെന്ന നിലയില്‍ 25 വര്‍ഷം പൂര്‍ത്തിയാക്കാനായത് ജനങ്ങളുടെ ആശിര്‍വാദം കൊണ്ടാണെന്ന് പ്രധാനമന്ത്രി നരേന്ദ്ര മോദി. 2001 ഒക്ടോബർ ഏഴിന് ഗുജറാത്ത് മുഖ്യമന്ത്രിയായി ചുമതലയേൽക്കുമ്പോൾ ഇത്തരമൊരു നാഴികകല്ല് പിന്നിടുമെന്നു പ്രതീക്ഷിച്ചിരുന്നില്ല. പിന്തുണച്ച ജനങ്ങള്‍ക്ക് നന്ദിയെന്നും മോദി. വികസിത് ഭാരത് സങ്കൽപ് സഭയിൽ സംസാരിക്കുകയായിരുന്നു അദ്ദേഹം. 2001 ഒക്ടോബര്‍ ഏഴിനാണ് ഗുജറാത്ത് മുഖ്യമന്ത്രിയായി നരേന്ദ്ര മോദി അധികാരമേല്‍ക്കുന്നത്. 2012 വരെ മുഖ്യമന്ത്രി പദത്തില്‍ തുടര്‍ന്ന മോദി, 2014 മുതല്‍ പ്രധാനമന്ത്രിയായി. തുടര്‍ച്ചയായ മൂന്നാം തവണയാണ് മോദി പ്രധാനമന്ത്രി പദത്തില്‍ തുടരുന്നത്.

ബിജെപി നേതാവിന് ആരോഗ്യ വകുപ്പില്‍ സീനിയര്‍ സൂപ്രണ്ടായി നിയമനം; വിവാദമായതോടെ പിരിച്ചുവിടാന്‍ മന്ത്രിയുടെ നിര്‍ദേശം

സര്‍ക്കാര്‍ സര്‍വീസില്‍നിന്ന് വിരമിച്ച ബിജെപി നേതാവിനെ ആരോഗ്യ വകുപ്പില്‍ നിയമിച്ചതില്‍ ഇടപെട്ട് മന്ത്രി കെ. മുരളീധരന്‍. സീ-മെറ്റില്‍ സീനിയര്‍ സൂപ്രണ്ടായി നിയമിച്ച രതീഷ് ആര്‍. നായരെ പിരിച്ചുവിടാനാണ് മന്ത്രിയുടെ നിര്‍ദേശം. നിയമനം വിവാദമായതോടെയാണ് മന്ത്രിയുടെ ഇടപെടല്‍. ജൂലൈ മുതല്‍ ബിജെപി പെൻഷണേഴ്‌സ് സെല്ലിന്റെ കൺവീനറായി പ്രവര്‍ത്തിക്കുന്ന രതീഷ് ആര്‍ നായരെയാണ് ആരോഗ്യ വകുപ്പിനു കീഴിലുള്ള സി-മെറ്റില്‍ നിയമിച്ചത്. പ്രതിമാസം 34,180 രൂപ ശമ്പളത്തില്‍ നിയമിച്ചതിന്റെ സർക്കുലറും ഉത്തരവും പുറത്തുവന്നിരുന്നു. എന്‍ജിഒ സംഘിന്റെ സംസ്ഥാന കമ്മിറ്റി അംഗവുമായിരുന്നു രതീഷ്.

പരീക്ഷാ ക്രമക്കേട്: കർണാടക പിഎസ്‌സി മുന്‍ ചെയർമാന്റെയും അംഗത്തിന്റെയും അറസ്റ്റ് രേഖപ്പെടുത്തി

പരീക്ഷാ ക്രമക്കേടില്‍ കർണാടകയിലെ പിഎസ്‌സി മുന്‍ ചെയർമാന്റെയും പിഎസ്‌സി അംഗത്തിന്റെയും അറസ്റ്റ് രേഖപ്പെടുത്തി. ഇഡിയാണ് മുൻ ചെയർമാൻ ശിവശങ്കരപ്പ സഹുകാരെയും അംഗം ബി.വി. ഗീതയെയും അറസ്റ്റ് ചെയ്തത്. വെറ്ററിനറി പരീക്ഷയിൽ ഉദ്യോഗാർഥികളിൽ നിന്ന് കൈക്കൂലി വാങ്ങിയെന്നാണ് കേസ്.

കൊല്ലത്തെ സ്ത്രീധന പീഡന പരാതി; പ്രതി നന്ദുവിനായി ലുക്ക് ഔട്ട് സർക്കുലർ

കൊല്ലത്തെ സ്ത്രീധന പീഡന പരാതിയില്‍ പ്രതി നന്ദുവിനായി ലുക്ക് ഔട്ട് സർക്കുലർ പുറത്തിറക്കി പൊലീസ്. ചവറ പൊലീസാണ് ലുക്ക് ഔട്ട് സർക്കുലർ പുറത്തിറക്കിയത്. ഇരയായ പെൺകുട്ടിയുടെ 164 മൊഴി രേഖപ്പെടുത്താനുള്ള തയ്യാറെടുപ്പിലാണ് പൊലീസ്. ഇതിനായി ബന്ധപ്പെട്ട കോടതിയിൽ പൊലീസ് അപേക്ഷ നൽകി. അനുമതി ലഭിക്കുന്ന മുറയ്ക്ക് പെൺകുട്ടിയുടെ രഹസ്യ മൊഴി രേഖപ്പെടുത്തും. പൊലീസ് അന്വേഷണം തുടരുമ്പോഴും നാട്ടിൽ വരാൻ നന്ദു തയ്യാറായിട്ടില്ല. നന്ദുവിന്റെ മാതാപിതാക്കളും ഒളിവിലാണ്.

പാര്‍ട്ടി ഇല്ലാത്തയിടത്ത് തെരഞ്ഞെടുപ്പ് ജയിച്ചു; പട്ടാമ്പിയിലെ വിജയം മുഹമ്മദ് മുഹ്‌സിന്റേത്: ബിനോയ് വിശ്വം

പട്ടാമ്പിയിലെ തെരഞ്ഞെടുപ്പ് ജയത്തിന് മുഹമ്മദ് മുഹ്‌സിനെ അഭിനന്ദിച്ച് സിപിഐ സംസ്ഥാന സെക്രട്ടറി ബിനോയ് വിശ്വം. പാർട്ടിയില്ലാത്ത ഇടത്ത് സിപിഐ ജയിച്ചു. പട്ടാമ്പിയിലെ വിജയം മുഹമ്മദ് മുഹ്‌സിന്റേത്. സിപിഐഎമ്മാണ് വിജയത്തിനു പിന്നിൽ. മണ്ണാർക്കാട് പാർട്ടി ഉണ്ടെങ്കിലും പരാജയപ്പെട്ടു. സ്ഥാനാർഥി നിർണയത്തിൽ പാളിച്ചയുണ്ടായി. പിഎം ശ്രീ, മദ്യനയം എന്നിവയിൽ എൽഡിഎഫിനെ രക്ഷിച്ചത് സിപിഐയാണെന്നും ബിനോയ് വിശ്വം അഭിപ്രായപ്പെട്ടു. തെരഞ്ഞെടുപ്പിനു ശേഷമുള്ള പാലക്കാട് ജില്ലാ പ്രവർത്തക യോഗം ഉദ്ഘാടനം ചെയ്യുകയായിരുന്നു ബിനോയ് വിശ്വം.

സ്റ്റോക്ക് എത്തിത്തുടങ്ങി; സംസ്ഥാനത്തെ മരുന്നുക്ഷാമത്തിന് പരിഹാരമാകുന്നു

സംസ്ഥാനത്തെ മരുന്നു ക്ഷാമത്തിന് പരിഹാരമാകുന്നു. ജീവിതശൈലി രോഗങ്ങൾക്ക് ഉൾപ്പെടെ സ്റ്റോക്ക് എത്തിയതായി ആരോഗ്യ വകുപ്പ് അറിയിച്ചു. പ്രമേഹം രക്തസമ്മർദം, ഹീമോഫീലിയ, മന്ത് എന്നീ രോഗങ്ങള്‍ക്കുള്ള മരുന്നെത്തി. കീമോ തെറാപ്പി മരുന്നുകളും വിതരണത്തിനെത്തിയതായി ആരോഗ്യ വകുപ്പ് അറിയിച്ചു.

കേരളത്തിന് എയിംസ് ഇല്ല? ഹൈക്കോടതിയില്‍ കേന്ദ്രത്തിന്റെ വിശദീകരണം

കേരളത്തിന് എയിംസ് ഇല്ലെന്ന സൂചന നല്‍കിയ കേന്ദ്ര സര്‍ക്കാര്‍. എയിംസ് സ്ഥാപിക്കുന്നതുമായി ബന്ധപ്പെട്ട് കോഴിക്കോട് കിനാലൂരില്‍ സാധ്യതാ പഠനം നടത്താന്‍ ഹൈക്കോടതി കേന്ദ്രത്തോടു നിര്‍ദേശിച്ചിരുന്നു. ചീഫ് ജസ്റ്റിസ് അധ്യക്ഷനായ ബെഞ്ചിന്റേതായിരുന്നു നടപടി. ഇക്കാര്യത്തില്‍ വിശദീകരണം നല്‍കണമെന്നും കോടതി പറഞ്ഞിരുന്നു. ഇതനുസരിച്ചാണ് കേരളത്തിന് എയിംസ് നല്‍കുന്ന കാര്യം സാധ്യതാ പട്ടികയില്‍ ഇല്ലെന്ന സൂചന നല്‍കുന്നത്. സാധ്യതാ പഠനം നടത്തിയശേഷം ഇത്തരമൊരു തീരുമാനമെടുത്തതില്‍ ഹൈക്കോടതി കേന്ദ്ര സര്‍ക്കാരിനെ വിമര്‍ശിച്ചു. എന്തുകൊണ്ട് യോഗ്യത ഇല്ലാ എന്ന് വിശദീകരിക്കണമെന്നും ഹൈക്കോടതി കേന്ദ്രത്തോടു നിര്‍ദേശിച്ചു.

വന്ദേമാതരം സെമിനാർ: കാസർഗോഡ് കേന്ദ്ര സര്‍വകലാശാലയില്‍ വിദ്യാര്‍ഥി പ്രതിഷേധം

കാസർഗോഡ് കേന്ദ്ര സര്‍വകലാശാലയില്‍ വന്ദേമാതരം സെമിനാർ വേദിയില്‍ പ്രതിഷേധവുമായി വിദ്യാര്‍ഥികള്‍. പ്രോക്ടര്‍ ശ്രീകുമാര്‍ സെമിനാര്‍ അവതരിപ്പിക്കുമ്പോഴായിരുന്നു വിദ്യാര്‍ഥികളുടെ പ്രതിഷേധം. ചെരുപ്പുകള്‍ ഉയര്‍ത്തിയും, കൂക്കി വിളിച്ചും, ഗോ ബാക്ക് മുദ്രാവാക്യം ഉയര്‍ത്തിയുമാണ് സംയുക്ത വിദ്യാര്‍ഥി സഖ്യത്തിന്റെ പ്രതിഷേധം. അതേസമയം, വന്ദേ മാതരം വിളിച്ചായിരുന്നു എബിവിപി പ്രവര്‍ത്തകരുടെ പ്രതിരോധം. പ്രതിഷേധം കനത്തതോടെ, ശ്രീകുമാര്‍ സെമിനാര്‍ അവതരം നിര്‍ത്തിവച്ചു. വന്ദേ മാതരത്തിന്റെ 150-ാം വാര്‍ഷികത്തോടനുബന്ധിച്ചാണ് സര്‍വകലാശാലയില്‍ സെമിനാര്‍ സംഘടിപ്പിച്ചത്. എന്നാല്‍ ആര്‍എസ്എസ് നേതാക്കളെ സെമിനാറില്‍ പങ്കെടുപ്പിക്കുന്നതിലാണ് പ്രതിഷേധമാണ് വിദ്യാര്‍ഥികള്‍ പറഞ്ഞു. സർവകലാശാലയെ കാവിവല്‍ക്കരിക്കാനുള്ള ശ്രമത്തിനെതിരെ പ്രതിഷേധം തുടരും. അതിനെ വന്ദേമാതരത്തിനെതിരായ നീക്കമായി ചിത്രീകരിക്കുകയാണ്. അതിന്റെ പേരില്‍ രാജ്യദ്രോഹികളായി കേസെടുക്കട്ടെ, ജയിലിലടക്കട്ടെയെന്നും വിദ്യാര്‍ഥികള്‍.

ഗ്യാനേഷ് കുമാറിൻ്റെ രാജിക്കായി പ്രക്ഷോഭം; ജന്തർമന്തർ റാലിക്കായി ഇൻഡ്യാ സഖ്യം  

മുഖ്യതെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യത്തിൽ മിന്നൽ പ്രക്ഷോഭവുമായി ഇന്ത്യ സഖ്യം. രാഹുൽ ഗാന്ധി അടക്കമുള്ള നേതാക്കളുടെ നേതൃത്വത്തിൽ എംപിമാർ ജന്തമന്തർ മന്തർ ലക്ഷ്യമിട്ട് നീങ്ങുകയാണ്. പ്രവർത്തകരുടെ വൻ നിരയും എംപിമാരുടെ ബസിന് മുന്നിലും പിന്നിലുമായുണ്ട്. ജന്തർമന്തറിൽ കുത്തിയിരിപ്പ് സമരം നടത്തുമെന്ന് രാഹുൽ ഗാന്ധി പ്രഖ്യാപിച്ചു. ജനാധിപത്യത്തെ തകർക്കാനുള്ള ശ്രമം ആണ് നടക്കുന്നതെന്നും എഫ്ഐആറുകളെ ഭയപ്പെടില്ലെന്നും മല്ലികാർജുൻ ഖർഗെ പറഞ്ഞു. കേന്ദ്രസേനയെ അടക്കം വിന്യസിച്ച് സമരത്തെ നേരിടാനാണ് സർക്കാർ നീക്കം. ജന്തർമന്തറിലേക്കുള്ള പാതകൾ ബാരിക്കേഡുകൾ വെച്ച് പൊലീസ് അടച്ചു.

രഞ്ജി ട്രോഫി; വിഷ്ണു വിനോദ് കേരളത്തിന്റെ നായകൻ

രഞ്ജി ട്രോഫിയിൽ കേരളത്തിൻ്റെ നായകനായി വിഷ്ണു വിനോദിനെ പ്രഖ്യാപിച്ചു. മുഹമ്മദ് അസ്ഹറുദ്ദീന് പകരമായാണ് വിഷ്ണുവിനെ നായകനാക്കിയത്. അതിഥി താരളങ്ങളായ ജലജ് സക്സേനയും ആദിത്യ സർവാതെയും ടീമിൽ തിരിച്ചെത്തി. വെസ്റ്റ് ഇൻഡീസിനെതിരായ ട്വൻ്റി ട്വൻ്റി പരമ്പരയിൽ കളിക്കുന്ന സഞ്ജു സാംസണെ ആദ്യ മത്സരത്തിൽ പരിഗണിച്ചില്ല. ഈ മാസം 11 മുതൽ ജാർഖണ്ഡിനെതിരെയാണ് കേരളത്തിൻ്റെ ആദ്യ മത്സരം.

കോട്ടയം DTPC ഓഫീസിൽ വിജിലൻസ് റെയ്‌ഡ്‌

കോട്ടയം DTPC ഓഫീസിൽ വിജിലൻസ് റെയ്‌ഡ്‌. ജില്ലയിലെ വിവിധ ടൂറിസം കേന്ദ്രങ്ങളിൽ ക്രമക്കേട് നടന്നതായി നേരത്തേ പരാതികൾ ലഭിച്ചിരുന്നു. ഇതിന്റെ പശ്ചാത്തലത്തിലാണ് പരിശോധന.

ആലുവയിൽ  മിന്നലേറ്റ് വീടിന് നാശനഷ്ടം 

എറണാകുളം: ആലുവയിൽ മിന്നലേറ്റ് വീടിന് നാശനഷ്മുണ്ടായി. ദേശം സ്വദേശി ഹരിദാസൻ T K യുടെ വീടിനാണ് കേടുപാടുണ്ടായത്. ഉച്ചക്ക് 2.45ന് ശേഷമാണ് വീടിന്റെ മുൻ ഭാഗത്ത് മിന്നലേറ്റത്.

"സിപിഐഎമ്മിന് പീഡന പരാതികളിൽ നിർദാക്ഷിണ്യം നടപടിയെടുത്ത പാരമ്പര്യം": പി.കെ. ശ്രീമതി

പീഡന പരാതികളിൽ നിർദാക്ഷിണ്യം നടപടിയെടുത്ത പാരമ്പര്യമാണ് CPIM-നെന്ന് പി.കെ. ശ്രീമതി. അതിനിയും ഓർക്കാത്തവർ ഉണ്ടെങ്കിൽ വിനാശകാലേ വിപരീത ബുദ്ധി എന്നേ പറയാൻ കഴിയൂ. എന്ന് പി.കെ ശ്രീമതി ഫേസ്ബുക്കിലെഴുതി. CPIM പാലക്കാട് ജില്ലാ സെക്രട്ടറി സ്ഥാനത്തുനിന്ന് ഇ.എൻ. സുരേഷ് ബാബുവിനെ നീക്കിയ സാഹചര്യത്തിലാണ്, ഫേസ് ബുക്ക് പോസ്റ്റ് എന്നത് പ്രസക്തമാണ്.

അധികൃതരുടെ അനാസ്ഥ; സ്കൂളിൽ തകർന്നുവീണ ഓഡിറ്റോറിയത്തിന്റെ ഭാഗങ്ങൾ നീക്കം ചെയ്തില്ല

എറണാകുളം: പെരുമ്പാവൂർ ഓടക്കാലി ഗവൺമെന്റ് വൊക്കേഷണൽ ഹയർ സെക്കന്ററി സ്കൂളിൽ അധികൃതരുടെ അനാസ്ഥ തുടരുന്നു. തകർന്നുവീണ ഓഡിറ്റോറിയത്തിന്റെ ഇരുമ്പ് ഭാഗങ്ങൾ ഇതുവരെ നീക്കം ചെയ്തിട്ടില്ല. ചൊവ്വാഴ്ച വൈകീട്ടുണ്ടായ അതിശക്തമായ കാറ്റിനെ തുടർന്നാണ് ഓഡിറ്റോറിയം നിലംപൊത്തിയത്.

ജനകീയ ആരോഗ്യ കേന്ദ്രങ്ങൾക്ക് സ്വന്തം കെട്ടിടം; നിർമാണ പ്രവർത്തനം ആരംഭിച്ച് സർക്കാർ

ജനകീയ ആരോഗ്യ കേന്ദ്രങ്ങൾക്ക് സ്വന്തം കെട്ടിടം ഉറപ്പാക്കുന്ന പദ്ധതിക്ക് തുടക്കം. ഇതിന്റെ ഭാഗമായി തിരുവനന്തപുരം ജില്ലയിലെ 16 ജനകീയ ആരോഗ്യകേന്ദ്രങ്ങളുടെയും. ഒരു അർബൻ ആരോഗ്യകേന്ദ്രത്തിന്റെയും നിർമാണ പ്രവർത്തനം ആരംഭിച്ചു. സർക്കാരിന്റെ 100 ദിന കർമ പരിപാടിയിൽ ഉൾപ്പെടുത്തിക്കൊണ്ടാണ് ആരോഗ്യ വകുപ്പ് പദ്ധതി നടപ്പിലാക്കുന്നത്.

ഇൻഡ്യാ സഖ്യത്തിന്റെ ഗ്യാനേഷ് വിരുദ്ധ മിന്നൽസമരത്തിൽ പ്രക്ഷുബ്ധമായി രാജ്യതലസ്ഥാനം. രാഹുലും പ്രിയങ്കയും നയിച്ച പ്രക്ഷോഭം ജന്തർമന്തറിനെയും പരിസരപ്രദേശങ്ങളെയും മണിക്കൂറുകളോളം മുൾമുനയിൽ നിർത്തി. അത്യന്തം നാടകീയ രംഗങ്ങൾക്ക് ഒടുവിൽ ആണ് രാഹുൽ ഗാന്ധിയേയും പ്രിയങ്ക ഗാന്ധിയെയും പൊലീസിന് അറസ്റ്റ് ചെയ്ത് നീക്കാനായത്. നെഞ്ചിൽ ഭരണഘടനയുമായി നടുറോഡിൽ കിടന്ന പ്രിയങ്കയെ ബലം പ്രയോഗിച്ച് ആണ് പൊലീസ് അറസ്റ്റ് ചെയ്ത് നീക്കിയത്. ബസിനുള്ളിലേക്ക് കയറ്റാനുള്ള ശ്രമത്തെയും ഭരണഘടന ഉയർത്തിപ്പിടിച്ച് പ്രിയങ്ക ഏറെസമയം പ്രതിരോധിച്ചു. ജന്തർമന്തറിലേക്കുള്ള മുഴുവൻ റോഡുകളും അടച്ചും കേന്ദ്രസേനയെ അടക്കം അണിനിരത്തി വൻ സേനാ വിന്യാസം തീർത്താണ് പ്രതിപക്ഷ സമരത്തെ ഇന്ത്യ സർക്കാർ പ്രതിരോധിച്ചത്. ബസിൽ ജന്തർമന്തർ ലക്ഷ്യമിട്ട് നീങ്ങിയ എംപിമാരെയും പൊലീസ് അറസ്റ്റ് ചെയ്ത് നീക്കി.

സംസ്ഥാന സ്കൂൾ കായിക മേള; വീഴ്ച സംഭവിച്ചെന്ന് സമ്മതിച്ച് വിദ്യാഭ്യാസ വകുപ്പ്

സംസ്ഥാന സ്കൂൾ കായിക മേള നടത്തിപ്പിൽ ഉദ്യോഗസ്ഥർക്ക് വീഴ്ച സംഭവിച്ചെന്ന് സമ്മതിച്ച് വിദ്യാഭ്യാസ വകുപ്പ്. സംഘാടക സമിതി രൂപീകരിക്കുന്നതിലും യോ​ഗം ചേരുന്നതിലും വീഴ്ചയുണ്ടായി. കുറ്റക്കാരെ കണ്ടെത്തുന്നതിനായി വിശദ റിപ്പോർട്ട് സമർപ്പിക്കാൻ വകുപ്പ് ഡയറക്ടർക്ക് മന്ത്രി നിർദേശം നൽകി. മാറ്റിവച്ച നീന്തൽ മത്സരങ്ങൾ വിജയദശമിക്ക് ശേഷം സംഘടിപ്പിക്കും. വിദ്യാഭ്യാസ മന്ത്രിയുടെ നേതൃത്വത്തിൽ അവലോകന യോ​ഗം ചേർന്നതിന് ശേഷമാണ് തീരുമാനം.

ഒക്ടോബര്‍ 8ന് കോണ്‍ഗ്രസിന്റെ നേതൃത്തില്‍ കരിദിനം ആചരിക്കും

തിരുവനന്തപുരം: ജനാധിപത്യത്തെ സംരക്ഷിക്കാനായി സമാധാനപരമായി ഡല്‍ഹിയില്‍ പ്രതിഷേധം നടത്തിയ പ്രതിപക്ഷ നേതാവ് രാഹുല്‍ ഗാന്ധി, കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെ, പ്രിയങ്കാ ഗാന്ധി, കെ.സി. വേണുഗോപാല്‍, മുഖ്യമന്ത്രി വി.ഡി. സതീശന്‍ ഉള്‍പ്പെടെയുള്ള നേതാക്കളെയും എംപിമാരെയും ജനപ്രതിനിധികളെയും പോലീസ് അതിക്രൂരമായി നേരിട്ട നടപടിയില്‍ പ്രതിഷേധിച്ച് എഐസിസി ആഹ്വാന പ്രകാരം ഒക്ടോബര്‍ 8ന് കോണ്‍ഗ്രസിന്റെ നേതൃത്തില്‍ സംസ്ഥാന വ്യാപകമായി കരിദിനം ആചരിക്കുമെന്ന് കെപിസിസി സംഘടനാ ചുമതലയുള്ള ജനറല്‍ സെക്രട്ടറി നെയ്യാറ്റിന്‍കര സനല്‍ അറിയിച്ചു.സംസ്ഥാന, ജില്ലാ, ബ്ലോക്ക് തലങ്ങളില്‍ വമ്പിച്ച പ്രതിഷേധങ്ങളും നടത്തും.

TNIT മാധ്യമ പുരസ്കാരം ന്യൂസ് മലയാളത്തിന്

TNIT മാധ്യമ പുരസ്കാരം ന്യൂസ് മലയാളത്തിന്. ശ്രുതി സതീശൻ (ശബ്ദ വിവരണം ). അരുൺ ഗോപിനാഥ് (ക്യാമറാമാൻ ) എന്നിവർക്കാണ് പുരസ്കാരം. ഒക്ടോബർ 23ന് ബെംഗളൂരുവിൽ നടക്കുന്ന പരിപാടിയിൽ അവാർഡുകൾ സമ്മാനിക്കും

കേരളത്തിന് എയിംസില്ല;  വാഗ്ദാനം നൽകിയ സുരേഷ് ഗോപിയെ പരിഹസിച്ച് ആരോഗ്യമന്ത്രി

കേരളത്തിൽ എയിംസ് കൊണ്ടുവരാതെ , അടുത്ത തെരഞ്ഞെടുപ്പിൽ വോട്ട് ചോദിച്ച് വരില്ലെന്ന് പറഞ്ഞ കേന്ദ്രസഹമന്ത്രി സുരേഷ് ഗോപിയെ പരിഹസിച്ച് ആരോഗ്യമന്ത്രി കെ. മുരളീധരൻ. ഡൽഹിയിൽ തേരാപ്പാര നടക്കുന്ന സുരേഷ് ഗോപിക്ക് ഒരു വിലയും ഇല്ലെന്ന് ആരോഗ്യ മന്ത്രി പരിഹസിച്ചു. കാത്തിരുന്ന എയിംസ് കേരളത്തിന് കിട്ടില്ലെന്ന് കേന്ദ്ര സർക്കാർ സൂചന നൽകിയിരുന്നു. കേരളം ആരോഗ്യ രംഗത്ത് ഏറെ മുന്നേറിയിട്ടുണ്ടെന്നാണ് ഹൈക്കോടതിയിൽ കേന്ദ്രത്തിന്റെ വിചിത്ര ന്യായീകരണം. കേന്ദ്ര നിലപാടിനെ ഹൈക്കോടതി രൂക്ഷമായി വിമർശിച്ചു . ആരോഗ്യരംഗത്ത് മുന്നില്‍ നില്‍ക്കുന്ന കേരളത്തിന് എന്ത് അയോഗ്യതയാണുള്ളതെന്നും , സംസ്ഥാനം ഒരു എയിംസ് അര്‍ഹിക്കുന്നുണ്ടെന്നും ചീഫ് ജസ്റ്റിസ് ചൂണ്ടിക്കാട്ടി.

ഉന്നത വിദ്യാഭ്യാസ മന്ത്രി ഉദ്ഘാടനം ചെയ്ത പരിപാടി ബഹിഷ്കരിച്ച്  അരുവിക്കര എംഎൽഎ

ഉന്നത വിദ്യാഭ്യാസ മന്ത്രി റോജി എം. ജോൺ ഉദ്ഘാടനം ചെയ്ത പരിപാടിയിൽ അധ്യക്ഷസ്ഥാനം നിഷേധിച്ചതിൽ പ്രതിഷേധിച്ച് അരുവിക്കര എംഎൽഎ ജി. സ്റ്റീഫനും എൽഡിഎഫ് ജനപ്രതിനിധികളും ചടങ്ങ് ബഹിഷ്കരിച്ചു. വെള്ളനാട് ബ്ലോക്ക് പഞ്ചായത്ത് പരിധിയിലെ 350-ലധികം വിദ്യാർത്ഥികളെ ആദരിക്കുന്നതിനായി സംഘടിപ്പിച്ച പരിപാടിയിലായിരുന്നു നാടകീയ രംഗങ്ങൾ .

കാലിക്കറ്റ് യൂണിവേഴ്സിറ്റി ക്യാംപസിൽ വാദ്യാർഥിക്കു നേരെ ആക്രമണം

കാലിക്കറ്റ് യൂണിവേഴ്സിറ്റി ക്യാംപസിൽ വാദ്യാർഥിക്കു നേരെ ആക്രമണം. SFI ജില്ല സെക്രട്ടറിയേറ്റ് അംഗം ഹരി രാമനെ ബൈക്കിലെത്തിയ സംഘം ആക്രമിച്ചു. തലക്ക് പരുക്കേറ്റ ഹരിരാമനെ ആശുപത്രിയിൽ പ്രവേശിപ്പിച്ചു. അക്രമം നടത്തിയത് KSU -MSF പ്രവർത്തകരെന്ന് SFI ആരോപിച്ചു.അക്രമികളെ അറസ്റ്റ് ചെയ്യണമെന്നാവശ്യപ്പെട്ട് തേഞ്ഞിപ്പലം പൊലീസ് സ്റ്റേഷൻ SFI ഉപരോധിച്ചു.

SCROLL FOR NEXT