മലപ്പുറം: കുറ്റിപ്പുറത്ത് സ്വകാര്യ ബസ് തലകീഴായി മറിഞ്ഞ് ഒരാൾക്ക് ദാരുണാന്ത്യം. മൂന്നുപേരുടെ നില അതീവ ഗുരുതരമെന്നാണ് വിവരം. നിരവധി പേർക്ക് പരിക്കേറ്റതായും റിപ്പോർട്ടുണ്ട്. കോഴിക്കോട് പെരുവയല് സ്വദേശി വൈഷ്ണവ് ആണ് മരിച്ചത്. കാറിന് മുകളിലേക്കാണ് ബസ് തലകീഴായി മറിഞ്ഞത്.
കുറ്റിപ്പുറം റെയില്വേ മേല്പ്പാലത്തിന് സമീപമുള്ള ദേശീയപാതയില് നിയന്ത്രണം വിട്ട ബസ് ഡിവൈഡറിൽ ഇടിച്ച് തല കീഴായി മറിയുകയായിരുന്നു. തൃശൂർ-കോഴിക്കോട് റൂട്ടിൽ സർവീസ് നടത്തുന്ന ബസാണ് അപകടത്തിൽപ്പെട്ടത്. അപകട സമയത്ത് ബസിനുള്ളിൽ കൂടുതൽ യാത്രക്കാർ ഉണ്ടായിരുന്നു.
അമിത വേഗതയാണ് അപകടകാരണമെന്നാണ് റിപ്പോർട്ട്. വേഗതയും മഴയില് റോഡ് നനഞ്ഞ് കിടന്നതും അപകടത്തിന് കാരണമായി. ഫയർഫോഴ്സും നാട്ടുകാരും ബസ് വെട്ടിപ്പൊളിച്ചാണ് അപകടത്തിൽപ്പെട്ടവരെ പുറത്തെടുത്തത്. ബസിന്റെ നടുഭാഗം രണ്ടായി പിളർന്നു. പരിക്കേറ്റവരെ വളാഞ്ചേരി, കോട്ടക്കൽ എന്നിവിടങ്ങളിലെ സ്വകാര്യ ആശുപത്രിയിൽ പ്രവേശിപ്പിച്ചു.