കോഴിക്കോട്: ഗ്യാനേഷിനെ പോലെ ഒരു തെരഞ്ഞെടുപ്പ് കമ്മീഷനെ നിയമിച്ചിരുന്നെങ്കിൽ അടിയന്തരാവസ്ഥയ്ക്ക് ശേഷം നടന്ന തെരഞ്ഞെടുപ്പിൽ ഇന്ദിരാഗാന്ധി തോൽക്കില്ലായിരുന്നുവെന്ന് കെ.സി. വേണുഗോപാൽ പറഞ്ഞു. പക്ഷെ അങ്ങനെ ജനാധിപത്യത്തെ അട്ടിമറിക്കാൻ കോൺഗ്രസ് അനുവദിക്കില്ല. ഏത് ക്രിമിനൽ കുറ്റവും ചെയ്യാൻ മടിയില്ലാത്ത വ്യക്തിയാണ് ഗ്യാനേഷ് കുമാർ എന്ന് അദ്ദേഹം നേരത്തെ തെളിയിച്ചതാണെന്നും കെ.സി. വേണുഗോപാൽ പറഞ്ഞു.
കേരളo കണ്ട ഏറ്റവും വലിയ അഴിമതിക്കാരനാണ് ഗ്യാനേഷ് കുമാർ. രാഷ്ട്രപതിക്ക് പോലും കിട്ടാത്ത സംരക്ഷണം ഗ്യാനേഷിന് കൊടുക്കുന്നു. എന്ത് തെറ്റ് ചെയ്താലും മുഖ്യ തെരഞ്ഞെടുപ്പ് കമ്മീഷനെ പിടിക്കാൻ കഴിയില്ലെന്ന ഭരണഘടനാ ഭേദഗതി ബിജെപി നൽകിയെന്നും അദ്ദേഹം ആരോപിച്ചു.
ഗ്യാനേഷ് കുമാർ മുൻപ് സർക്കാരിൻ്റെ പണം കട്ടു, ജനങ്ങളെ ബുദ്ധിമുട്ടിച്ചു. ഇപ്പോൾ വോട്ട് വെട്ടുകയാണെന്നും കെ.സി. വേണുഗോപാൽ ആരോപിച്ചു. ജനങ്ങൾക്ക് ലഭിക്കേണ്ട അവകാശങ്ങൾ കവർന്നെടുക്കുകയാണ്. ഗ്യാനേഷ് കുമാറിന് ഒരു രാത്രി പോലും കിടന്നുറങ്ങാൻ കഴിയാത്ത മാനസികാവസ്ഥയിലെത്തി. ഇനിയും ഭയാനകമായ കാര്യങ്ങൾ ഗ്യാനേഷിനെതിരെ വരും. രാജ്യത്ത് നടക്കുന്ന സമരത്തിൽ ഗ്യാനേഷ് വിറക്കുകയാണെന്നും അദ്ദേഹം പറഞ്ഞു. മോദിക്കും ഗ്യാനേഷിനും സമാധാനത്തോടെ കിടന്ന് ഉറങ്ങാൻ പറ്റാത്ത അവസ്ഥയാണ് ഇപ്പോഴുള്ളത്. ഈ രാജ്യത്ത് ഏറ്റവും അപമാനിതനായി പുറത്ത് പോകേണ്ടി വരുന്ന പ്രധാനമന്ത്രിയാവും നരേന്ദ്ര മോദിയെന്നും കെ.സി. വേണുഗോപാൽ വ്യക്തമാക്കി.