ഗണേഷ് കുമാറിന് തിരിച്ചടി; പത്തനാപുരം എൻഎസ്എസ് താലൂക്ക് യൂണിയൻ പിരിച്ചുവിട്ടു.

തിരുവനന്തപുരം: മന്ത്രി കെ.ബി.ഗണേഷ് കുമാർ പ്രസിഡൻ്റായ പത്തനാപുരം എൻഎസ്എസ് താലൂക്ക് യൂണിയൻ പിരിച്ചു വിട്ടു. 10 അംഗങ്ങൾ രാജിവച്ചതോടെയാണ് താലൂക്ക് യൂണിയൻ പിരിച്ചുവിട്ടത്.

പത്മ കഫേയുമായി ബന്ധപ്പെട്ട സാമ്പത്തിക ക്രമക്കേട് ആരോപണത്തിന് പിന്നാലെയാണ് 10 അംഗങ്ങൾ രാജി വെച്ചത്.ഗണേഷ് കുമാറിൻ്റെ ഏകാധിപത്യ നടപടിയിൽ പ്രതിഷേധിച്ചായിരുന്നു രാജി. 19 അംഗ ഭരണസമിതിയായിരുന്നു യൂണിയൻ്റേത്. പിന്നാലെ രജിസ്ട്രാർ ഭരണസമിതി പിരിച്ചു വിടുകയും ചെയ്തു.

ഗണേഷ് കുമാർ പ്രസിഡൻ്റ് സ്ഥാനം വഹിക്കുന്ന എൻഎസ്എസ് യൂണിയനിൽ നേരത്തെ തന്നെ അസ്വാരസ്യങ്ങൾ നിലനിന്നിരുന്നു. പത്മ കഫേ നിർമാണത്തിൽ ഭരണസമിതി അംഗങ്ങൾ ഗണേഷ് കുമാറിനെതിരെ അഴിമതി ആരോപണവുമായി രംഗത്തെത്തുകയും ചെയ്തിരുന്നു. എന്നാൽ യൂണിയനിൽ യാതൊരു പ്രശ്നവുമില്ലെന്നും തൻ്റെ അച്ഛൻ്റെ സാമ്പാദ്യം കൊണ്ടാണ് യൂണിയൻ ഉണ്ടാക്കിയതെന്നുമായിരുന്നു ഗണേഷ് കുമാറിൻ്റെ പ്രതികരണം.