കണ്ണൂർ: കണ്ണൂർ കോർപ്പറേഷൻ ദസറ ആഘോഷത്തിൻ്റെ ഭാഗമായി സംഘടിപ്പിച്ച ഡ്രോൺ ഷോക്കെതിരെയാണ് സമൂഹ മാധ്യമങ്ങളിൽ ട്രോൾ മഴ. ഇന്നലെയാണ് ജവഹർ സ്റ്റേഡിയത്തിൽ കോർപ്പറേഷൻ മെഗാ ഡ്രോൺ ഷോ നടത്തിയത്.
മൈസൂർ ദസറയിൽ ഡ്രോൺ ഷോ നടത്തുന്ന സംഘമാണ് കണ്ണൂരിലും ഷോ സംഘടിപ്പിക്കുന്നതെന്നാണ് അധികൃതർ അവകാശപ്പെട്ടിരുന്നത്. എന്നാല്‍ സംഭവം മൊത്തത്തിൽ പാളിക്കുകയായിരുന്നു. 500-ലധികം ഡ്രോണുകൾ ഉപയോഗിച്ച് ആകാശത്ത് വിസ്മയം തീർക്കുമെന്ന് പ്രഖ്യാപിച്ചിരുന്നെങ്കിലും, ആകാശത്ത് തെളിഞ്ഞ 'ഒരു ആന, ഒരു തെങ്ങ്, കുതിര' തുടങ്ങിയ ലളിതമായ രൂപങ്ങൾ ആളുകളെ നിരാശരാക്കി.
ഒരാഴ്ചയായി കണ്ണൂരിൽ വിജയകരമായി നടത്തു വന്ന ദസറ ആഘോഷം ഒറ്റ നിമിഷം കൊണ്ട് കുളമാക്കി എന്ന തരത്തില്‍ പരിഹാസ കമന്‍റുകളാണ് സോഷ്യൽ മീഡിയയിലൂടെ പുറത്തുവരുന്നത്. ജയിലറിൽ മോഹൻലാൽ ഇതിൽ കൂടുതൽ സമയം ഉണ്ടായിരുന്നു, ജയിലർ ആയിരുന്നു ഭേദം എന്നിങ്ങനെയുള്ള കമൻ്റുകളാണ് അധികവുമുള്ളത്. ഒരു ആന ഒരു തെങ്ങ് ഒരു താങ്ക്സ് ഇന്ദിര ഡ്രോൺ ഷോ 3G, ഒരു മിന്നായം പോലെ തുടങ്ങി ഒട്ടേറെ പരിഹാസ കമൻറുകൾ ആണ് ഇൻസ്റ്റഗ്രാം പോസ്റ്റുകൾക്ക് താഴെ നിറയുന്നത്.
മണിക്കൂറുകളോളം കാത്തിരുന്നിട്ടും വളരെ കുറഞ്ഞ സമയം മാത്രമാണ് പ്രധാന പ്രകടനങ്ങൾ നീണ്ടുനിന്നതെന്ന പരാതിയും ഉയർന്നിട്ടുണ്ട്. റോഡ് അറ്റകുറ്റപ്പണികൾക്കും മറ്റ് അടിസ്ഥാന സൗകര്യങ്ങൾക്കും ഫണ്ടില്ലെന്ന് പറയുന്ന കോർപ്പറേഷൻ ഇത്തരം പരിപാടികൾക്കായി വൻ തുക ചിലവഴിച്ചതിനെതിരെയും ജനങ്ങളിൽ നിന്ന് വിമർശനങ്ങൾ ഉയരുന്നുണ്ട്. പരിപാടിയുടെ ദൃശ്യങ്ങൾ സമൂഹ മാധ്യമങ്ങളിൽ വ്യാപകമായി പ്രചരിക്കുന്നുണ്ട്.