തിരുവനന്തപുരം: സംസ്ഥാന മുഖ്യ തെരഞ്ഞെടുപ്പ് ഓഫീസർ നിയമനത്തിലേക്കുള്ള ചുരുക്കപ്പട്ടിക തയ്യാറായി. നാല് മുതിർന്ന ഐഎഎസ് ഉദ്യോഗസ്ഥരാണ് പട്ടികയിലുള്ളത്. ഡോ.വീണ.എൻ മാധവൻ, ഡോ.കെ. വാസുകി, ടി.വി. അനുപമ, ഡോ.എ. കൗശിഗൻ എന്നിവരാണ് ഇടം നേടിയിട്ടുള്ളത്.
സംസ്ഥാന സർക്കാർ തയ്യാറാക്കിയ പട്ടിക ഉടൻ കേന്ദ്ര തെരഞ്ഞെടുപ്പ് കമ്മീഷന് അയച്ചേക്കും. മുഖ്യമന്ത്രിയുടെ ഓഫീസിൽ നിന്നുള്ള പട്ടികയിൽ കേന്ദ്ര തെരഞ്ഞെടുപ്പ് കമ്മീഷനാണ് അന്തിമ തീരുമാനം സ്വീകരിക്കുക. മുൻ സിഇഒ ഡോ. രത്തൻ.യു കേൽക്കർ മുഖ്യമന്ത്രിയുടെ സെക്രട്ടറിയായി സ്ഥലം മാറിയതിനെ തുടർന്നാണ് പുതിയ നിയമനം.
കേൽക്കർ മുഖ്യമന്ത്രിയുടെ സെക്രട്ടറിയായതോടെ വൻ വിവാദമാണ് പ്രതിപക്ഷം ഉന്നയിച്ചത്. കോൺഗ്രസ്-ബിജെപി ഡീലാണ് ഇതിലൂടെ തെളിഞ്ഞതെന്നും, എൽഡിഎഫിനെ പരാജയപ്പെടുത്താൻ കേൽക്കറുടെ സഹായം ഉപയോഗിച്ചു എന്നിങ്ങനെയുള്ള ആരോപണമാണ് സിപിഐഎം ഉന്നയിച്ചത്. രാഷ്ട്രീയ സ്വഭാവമുള്ള നിയമനത്തിൽ യുഡിഎഫ് സർക്കാർ സ്വീകരിച്ച നിലപാട് ശരിയായില്ലെന്നും സിപിഐഎം കുറ്റപ്പെടുത്തിയിരുന്നു.