കരുനാഗപ്പള്ളി വെൽഫെയർ സ്കൂളിലെ ഏഴാം ക്ലാസ് വിദ്യാർഥിയെ കാണാനില്ലെന്ന് പരാതി. വീട്ടിൽ നിന്ന് കളിക്കാനെന്ന് പറഞ്ഞ് പുറത്തുപോയ കുട്ടി മടങ്ങിയെത്തിയില്ല. വീടിന് അടുത്തുള്ള കന്നേറ്റി കായലിന് സമീപം സൈക്കിളും ജേഴ്സിയും കണ്ടെത്തി. ഫയർഫോഴ്സും പോലീസും കായലിൽ തിരച്ചിൽ നടത്തിയെങ്കിലും കുട്ടിയെ കണ്ടെത്താനായില്ല. കരുനാഗപ്പള്ളി കന്നേറ്റിയിലെ ബിലാലിനെയാണ് കാണാതായത്.
തൃണമൂൽ കോൺഗ്രസ് നേതാവും ബംഗാൾ മുൻ ഡെപ്യൂട്ടി സ്പീക്കറുമായിരുന്ന ആശിഷ് ബാനർജി മരിച്ച നിലയിൽ. വീടിന് സമീപത്തെ പാർട്ടി ഓഫീസിനുള്ളിലാണ് മരിച്ച നിലയിൽ കണ്ടെത്തിയത്. മമത ബാനർജിയുടെ വിശ്വസ്തനായിരുന്നു ആശിഷ് ബാനർജി. രാംപൂർഹട്ടിൽ നിന്ന് അഞ്ച് തവണ എംഎൽഎ ആയിട്ടുണ്ട്.
തൃശൂർ മാളയിൽ സ്വാതന്ത്ര്യദിനാഘോഷത്തിൽ പങ്കെടുക്കാത്ത വിദ്യാർഥികൾക്കെതിരെ അധിക്ഷേപം. സ്വാതന്ത്ര്യദിനത്തിൽ വീട്ടിലിരുന്നവർ പാക്കിസ്ഥാനിലേക്ക് പോകണമെന്ന് സ്കൂൾ ഉടമ. മാള ഇന്റർനാഷണൽ ആൻഡ് സൈനിക സ്കൂൾ ഉടമ ഡോ. രാജു ഡേവിസ് ആണ് വിവാദ സന്ദേശം വാട്സ്ആപ്പ് ഗ്രൂപ്പിൽ പങ്കുവച്ചത്. സ്കൂളിലെ ആഘോഷ ചടങ്ങിൽ പങ്കെടുക്കാൻ എത്താത്ത വരെ ക്ലാസിൽ കയറ്റില്ല, അവധി ദിനം സ്കൂളിലെത്താത്തവർ വിശദീകരണം നൽകണമെന്നും സ്കൂൾ ഉടമയായ ഡോ. രാജു ഡേവിസ്.
കേരള ഇൻസ്റ്റിറ്റ്യൂട്ട് ഓഫ് ലോക്കൽ അഡ്മിനിസ്ട്രേഷന് കീഴിലെ കോളേജും കോഴ്സുകളും ഇല്ലാതാക്കാൻ നീക്കം എന്ന ആരോപണവുമായി വിദ്യാർഥികൾ. പഠന - പാഠ്യേതര പ്രവർത്തനങ്ങൾ പ്രതിസന്ധിയിലായതോടെ വിദ്യാർഥികളുടെ ഭാവി അനിശ്ചിതത്വത്തിൽ. കോളജിൻ്റെയും കോഴ്സിൻ്റെയും അഫിലിയേഷൻ റദ്ദാക്കണമെന്ന് ആവശ്യപ്പെട്ട് കില ഡയറക്ടർ നൽകിയ കത്തിൻ്റെ പകർപ്പ് ന്യൂസ് മലയാളത്തിന് ലഭിച്ചു. അധ്യാപകരോടും കില ഡയറക്ടറോടും നിരന്തരം പരാതികൾ ഉന്നയിച്ചിട്ടും ഫലമില്ലെന്നും വിദ്യാർഥികൾ പറയുന്നു.
പൊന്നോണത്തിന്റെ വരവറിയിച്ച് ഇന്ന് അത്തം. സമൃദ്ധിയുടെയും സന്തോഷത്തിൻ്റെയും പൂവിളിയോടെ ഒരു ഓണക്കാലം കൂടി. സംസ്ഥാനത്ത് തിരുവോണാഘോഷത്തിൻ്റെ തുടക്കം കുറിച്ച് ഇന്ന് തൃപ്പൂണിത്തുറയില് അത്തച്ചമയ ഘോഷയാത്ര നടക്കും.