നിവിന്‍ പോളിക്കെതിരെ പീഡന പരാതി നല്‍കിയ യുവതിയുടെ പേരും ചിത്രവും പ്രസിദ്ധീകരിച്ചതിനെ തുടര്‍ന്ന് 12 യൂട്യൂബര്‍മാര്‍ക്കെതിരെ കേസ് എടുത്തു. എറണാകുളം ഊന്നുകല്‍ പൊലീസാണ് കേസ് എടുത്തത്.
അതേസമയം കേസില്‍ പരാതിക്കാരിയുടെ മൊഴി വീണ്ടും രേഖപ്പെടുത്തും. യുവതി പറഞ്ഞ തീയതികളില്‍ അന്വേഷണ സംഘത്തിന് അവ്യക്തതയുള്ളതിനെ തുടര്‍ന്നാണിത്. യുവതിയുടെയും നിവിന്റേയും പാസ്പോര്‍ട്ട് രേഖകളുടെ അടിസ്ഥാനത്തിലായിരിക്കും മൊഴിയെടുക്കുക. തുടര്‍ന്ന് യുവതിയുടെ രഹസ്യമൊഴി രേഖപ്പെടുത്തും. കേസിലെ മറ്റ് പ്രതികളായ നിര്‍മ്മാതാവ് എകെ സുനില്‍ അടക്കമുള്ളവരെ രണ്ട് ദിവസത്തിനുള്ളില്‍ ചോദ്യം ചെയ്യും. അതോടൊപ്പം യുവതിക്കെതിരെ നിവിന്‍ നല്‍കിയ പരാതിയിലും അന്വേഷണം ഊര്‍ജ്ജിതമാക്കിയിട്ടുണ്ട്.
സിനിമയില്‍ അവസരം വാഗ്ദാനം ചെയ്ത് പീഡിപ്പിച്ചെന്നായിരുന്നു നേര്യമംഗലം സ്വദേശിയായ യുവതി നിവിന്‍ പോളിക്കെതിരെ നല്‍കിയ പരാതിയില്‍ പറയുന്നത്. ദുബായ് അടക്കം മൂന്ന് സ്ഥലത്ത് വെച്ച് പീഡിപ്പിച്ചെന്നാണ് പരാതി. ആറ് പ്രതികളാണ് കേസിലുള്ളത്. പരാതിക്കാരിയുടെ സുഹൃത്ത് ശ്രേയ ആണ് ഒന്നാം പ്രതി. രണ്ടാം പ്രതി നിര്‍മാതാവ് എകെ സുനിലാണ് , മൂന്നാം പ്രതി ബിനു, നാലാം പ്രതി ബഷീര്‍, അഞ്ചാം പ്രതി കുട്ടന്‍ എന്നവരാണ് കേസിലെ മറ്റ് പ്രതികള്‍. ആറാം പ്രതിയാണ് നിവിന്‍.