Britain’s Prince William today drove an e-rickshaw, with wife Kate Middleton in the backseat, to meet the finalists of the Earthshot Prize in Mumbai. 
NATIONAL

സച്ചിനൊപ്പം ഗല്ലി ക്രിക്കറ്റും മൺകോപ്പയിലെ ചായയും പിന്നാലെ ഇ-റിക്ഷാ സവാരിയും; മുംബൈയിൽ താരങ്ങളായി ബ്രിട്ടീഷ് രാജദമ്പതികൾ!

എർത്ത്ഷോട്ട് പ്രൈസ് ഫൈനലിസ്റ്റുകളിൽ ഒന്നായ 'മഹീന്ദ്ര ലാസ്റ്റ് മൈൽ മൊബിലിറ്റി' നിർമ്മിച്ച ഇ റിക്ഷയിലാണ് ഇരുവരും യാത്ര ചെയ്തത്.

Author : ന്യൂസ് ഡെസ്ക്

മുംബൈ: ​മൂന്ന് ദിവസത്തെ ഇന്ത്യാ സന്ദർശനത്തിനായി മുംബൈയിലെത്തിയ ബ്രിട്ടീഷ് രാജകുമാരൻ വില്യമും ഭാര്യ കെയ്റ്റ് മിഡിൽടണും മുംബൈയിൽ നടത്തിയ ഇ ഓട്ടോ സവാരി സമൂഹമാധ്യമങ്ങളിൽ തരംഗമാകുന്നു. സന്ദർശനത്തിന്റെ രണ്ടാം ദിവസമായ ചൊവ്വാഴ്ച, മുംബൈയിലെ പ്രശസ്തമായ ബാന്ദ്ര-വർളി സീ ലിങ്ക് പ്രൊമെനേഡിലൂടെ സ്വന്തമായി ഇലക്ട്രിക് റിക്ഷ ഓടിച്ചാണ് വില്യം രാജകുമാരൻ ഏവരെയും അമ്പരപ്പിച്ചത്. കെയ്റ്റ് മിഡിൽടൺ പിൻസീറ്റിൽ ഇരുന്ന് യാത്ര ആസ്വദിച്ചപ്പോൾ, ഭാവി ബ്രിട്ടീഷ് രാജാവായ വില്യം തന്നെ ഓട്ടോറിക്ഷയുടെ സ്റ്റിയറിംഗ് പിടിച്ചു. 2026-ലെ 'എർത്ത്ഷോട്ട് പ്രൈസ്' ഫൈനലിസ്റ്റുകളെ കാണാനാണ് രാജദമ്പതികൾ ഈ ഇലക്ട്രിക് ഓട്ടോയിൽ എത്തിയത്.

​എർത്ത്ഷോട്ട് പ്രൈസ് ഫൈനലിസ്റ്റുകളിൽ ഒന്നായ 'മഹീന്ദ്ര ലാസ്റ്റ് മൈൽ മൊബിലിറ്റി' നിർമ്മിച്ച ഇ റിക്ഷയിലാണ് ഇരുവരും യാത്ര ചെയ്തത്. അവാർഡിന്റെ ലോഗോയും നിറങ്ങളും പതിപ്പിച്ചതായിരുന്നു ഈ വാഹനം. വാഹനത്തിൽ നിന്ന് പുറത്തിറങ്ങിയ കെയ്റ്റ് മിഡിൽടൺ, "ഇവിടെയെത്താനുള്ള ഏറ്റവും മികച്ച മാർഗ്ഗം ഇതുതന്നെയായിരുന്നു" എന്ന് പ്രതികരിച്ചു. മഹീന്ദ്രയ്ക്കൊപ്പം അഫോർഡബിൾ ഹൗസിംഗ് രംഗത്ത് പ്രവർത്തിക്കുന്ന ഇന്ത്യൻ സംരംഭമായ 'മഹിളാ ഹൗസിംഗ് ട്രസ്റ്റി'നെയും എർത്ത്ഷോട്ട് പ്രൈസ് ഇംപാക്ട് അസംബ്ലിയിൽ വെച്ച് വില്യം പ്രത്യേകം പ്രശംസിച്ചു. മറ്റേതൊരു രാജ്യത്തേക്കാളും കൂടുതൽ എർത്ത്ഷോട്ട് വിജയികളും ഫൈനലിസ്റ്റുകളും ഇന്ത്യയിൽ നിന്നാണെന്നത് ശ്രദ്ധേയമാണെന്ന് ഇൻസ്റ്റാഗ്രാമിൽ വില്യം രാജകുമാരൻ കുറിച്ചു.

​സന്ദർശനത്തിന്റെ ആദ്യ ദിനത്തിൽ തന്നെ മുംബൈയിലെ സാധാരണക്കാരുടെ ജീവിതരീതികളോട് ചേർന്നുനിൽക്കുന്ന പരിപാടികളിലാണ് രാജദമ്പതികൾ പങ്കെടുത്തത്. ക്രിക്കറ്റ് ഇതിഹാസം സച്ചിൻ ടെൻഡുൽക്കറുടെ സാന്നിധ്യത്തിൽ സ്കൂൾ കുട്ടികൾക്കൊപ്പം സൗത്ത് മുംബൈയിൽ ഗല്ലി ക്രിക്കറ്റ് കളിച്ചതും, വഴിയോര ചായക്കടയിൽ നിന്ന് മൺകോപ്പയിൽ ചായ കുടിച്ചതും, മുംബൈ മെട്രോയിൽ യാത്ര ചെയ്തതും വലിയ വാർത്തയായിരുന്നു. പ്രസംഗത്തിനിടെ 'രംഗ് ബിരംഗി ദുനിയ' (നിറങ്ങൾ നിറഞ്ഞ ലോകം) എന്ന ഹിന്ദി പ്രയോഗം കടമെടുത്ത വില്യം, സാമ്പത്തിക വളർച്ചയും പരിസ്ഥിതി സംരക്ഷണവും ഒരുമിച്ച് കൊണ്ടുപോകണമെന്നും ഇന്ത്യയുടെ ഹരിത ഊർജ്ജ നീക്കങ്ങൾ മാതൃകാപരമാണെന്നും ചൂണ്ടിക്കാട്ടി. 2024-ലെ കാൻസർ ചികിത്സയ്ക്ക് ശേഷം കെയ്റ്റ് മിഡിൽടൺ വില്യമിനൊപ്പം നടത്തുന്ന ആദ്യ സംയുക്ത വിദേശ സന്ദർശനമാണിത്. ചൊവ്വാഴ്ച വൈകുന്നേരം മുംബൈയിൽ നടക്കുന്ന എർത്ത്ഷോട്ട് പുരസ്കാര ചടങ്ങിന് ശേഷം, ബുധനാഴ്ച ഡൽഹിയിൽ പ്രധാനമന്ത്രി നരേന്ദ്ര മോദിയുമായി ഇരുവരും കൂടിക്കാഴ്ച നടത്തും.

SCROLL FOR NEXT