നീതി ആയോഗ് സുസ്ഥിര വികസന സൂചിക; വീണ്ടും കേരളം ഒന്നാം സ്ഥാനത്ത്, ഒപ്പം ഉത്തരാഖണ്ഡും

നീതി ആയോഗ് സുസ്ഥിര വികസന സൂചികയിൽ ഒന്നാം സ്ഥാനത്ത് തുടർന്ന് കേരളം. കേരളത്തിനൊപ്പം ഉത്തരാഖണ്ഡാണ് ഒന്നാം സ്ഥാനം പങ്കിടുന്നത്. ബിഹാറാണ് സുസ്ഥിര വികസന സൂചികയിൽ ഏറ്റവും പിന്നില്‍.
2023-24 വർഷത്തെ സംസ്ഥാനങ്ങളുടെ സുസ്ഥിര വികസന സൂചികയിലാണ് 79 പോയിൻ്റുമായി കേരളം ഒന്നാം സ്ഥാനം നിലനിർത്തിയത്. ഇത്തവണ കേരളത്തിനോടൊപ്പം ഉത്തരാഖണ്ഡും ഒന്നാം സ്ഥാനം പങ്കിട്ടു. 78 പോയിൻ്റോടെ രണ്ടാമതുള്ള ത​മി​ഴ്‌​നാ​ടും, 77 പോയൻ്റുമായി മൂന്നാമതുള്ള ഗോവയുമാണ് കേരളത്തിനും ഉത്തരാഖണ്ഡിനും പിന്നിലുള്ളത്. ഏറ്റവും പിന്നിലുള്ള ബിഹാറിന് 57 പോയിൻ്റാണുള്ളത്. സാമൂഹിക, സാമ്പത്തിക, പാരിസ്ഥിതിക രംഗങ്ങളിലെ പുരോഗതി പരിഗണിച്ചാണ് റിപ്പോർട്ടിലെ സ്ഥാനം നിർണയിക്കുന്നത്. കേ​ന്ദ്ര​ഭ​ര​ണ പ്ര​ദേ​ശ​ങ്ങ​ളി​ൽ ച​ണ്ഡി​ഗ​ഢ്, ജമ്മു-​ക​ശ്മീ​ർ, പു​തു​​ച്ചേ​രി, ആൻഡമാൻ - നി​കോ​ബാ​ർ ദ്വീ​പു​ക​ൾ, ഡൽഹി എന്നിവയാണ് ​ആദ്യ അ​ഞ്ച് സ്ഥാ​ന​ങ്ങ​ളിൽ. അതേസമയം, പുതിയ റിപ്പോർട്ട് പ്രകാരം ഇന്ത്യയുടെ മൊത്തത്തിലുള്ള സുസ്ഥിര വികസന സ്കോറിലും വർധന ഉണ്ടായി. കഴിഞ്ഞ തവണത്തെ അപേക്ഷിച്ച് അഞ്ച് പോയൻ്റ് വർധിച്ച് 71 പോയിൻ്റാണ് ഇന്ത്യക്കുള്ളത്.