ഇന്ത്യയുടെ ശുഭാൻഷു ശുക്ലയെയും മറ്റ് മൂന്ന് ബഹിരാകാശയാത്രികരെയും വഹിച്ചുകൊണ്ട് അന്താരാഷ്ട്ര ബഹിരാകാശ നിലയത്തിലേക്കുള്ള ആക്സിയം മിഷൻ 4 ഉച്ചയ്ക്ക് 12.01 ന് പറന്നുയരും. ആക്സിയം-4 വിക്ഷേപണത്തിന് കാലാവസ്ഥ 90 ശതമാനം അനുകൂലമെന്ന് സ്പെയ്സ് എക്സ് അറിയിച്ചു. നാളെ രാവിലെ 7 ന് ഫാൽക്കൺ 9 പേടകം അന്താരാഷ്ട്ര ബഹിരാകാശ നിലയത്തിൽ ഡോക്ക് ചെയ്യുമെന്നാണ് ലഭ്യമാകുന്ന റിപ്പോർട്ട്.
14 ദിവസത്തെ ദൗത്യത്തിനാണ് സംഘം പോകുന്നത്. 60 ശാസ്ത്രീയ പരീക്ഷണങ്ങളാണ് സംഘം ബഹിരാകാശത്ത് നടത്തുക. അതിൽ ഏഴെണ്ണം ഇന്ത്യൻ ശാസ്ത്രജ്ഞർ നിർദേശിച്ചതാണ്. ആദ്യ വിക്ഷേപണ തീയതിയായ മെയ് 29 ന് പ്രഖ്യാപിച്ചതിനുശേഷം ഏഴ് തവണയാണ് ദൗത്യം മാറ്റിവെച്ചത്. കാലാവസ്ഥ, ഓക്‌സിഡൈസറിന്റെ ചോർച്ച ഉൾപ്പെടെയുള്ള സാങ്കേതിക തകരാറുകൾ എന്നിവയുൾപ്പെടെയുള്ള വിവിധ പ്രശ്‌നങ്ങളാണ് കാലതാമസത്തിന് കാരണമായത്.
1969-ൽ അപ്പോളോ 11-ൽ നീൽ ആംസ്ട്രോങ് ചന്ദ്രനിലേക്ക് യാത്ര തിരിച്ച സ്ഥലമായ ഫ്ലോറിഡയിലെ നാസയുടെ കെന്നഡി സ്‌പേസ് സെന്ററിലെ ലോഞ്ച് കോംപ്ലക്‌സ് 39A-യിൽ നിന്നാണ് സ്‌പേസ് എക്സ് ക്രൂ ഡ്രാഗൺ ബഹിരാകാശ പേടകം പറന്നുയരുന്നത്.
1984 ൽ വിങ് കമാൻഡർ രാകേഷ് ശർമ ചരിത്രം കുറിച്ച് നാല് പതിറ്റാണ്ടുകൾക്ക് ശേഷം ബഹിരാകാശത്തേക്ക് പോകുന്ന ഇന്ത്യയുടെ രണ്ടാമത്തെ ബഹിരാകാശയാത്രികനാകും ഗ്രൂപ്പ് ക്യാപ്റ്റൻ കൂടിയായ ശുഭാൻഷു ശുക്ല. ലിഫ്റ്റ്-ഓഫിന് മുമ്പ് ഒരു മാസത്തിലേറെയായി അദ്ദേഹം പ്രികോഷനറി ക്വാറന്റൈനിലാണ്, ജീവനക്കാർ ആരോഗ്യത്തോടെ തുടരുന്നുവെന്ന് ഉറപ്പാക്കുന്നതിനാണ് ഈ പ്രക്രിയയിലൂടെ കടന്നുപോകുന്നത്.
അന്താരാഷ്ട്ര ബഹിരാകാശ നിലയത്തിലേക്കുള്ള നാലാമത്തെ സ്വകാര്യ ബഹിരാകാശയാത്രിക ദൗത്യമായ ആക്സിയം-4 ദൗത്യം, നാസയുമായി സഹകരിച്ച് ഹ്യൂസ്റ്റൺ ആസ്ഥാനമായുള്ള ആക്സിയം സ്‌പേസാണ് നടത്തുന്നത്.