ഇന്ത്യ-ദക്ഷിണാഫ്രിക്ക രണ്ടാം ടെസ്റ്റ്: ആദ്യദിനം ഒപ്പത്തിനൊപ്പം പൊരുതി ഇരു ടീമുകളും

ഗുവാഹത്തി: രണ്ട് ടെസ്റ്റുകളുടെ പരമ്പരയിൽ ഇന്ത്യ 1-0ന് പിന്നിൽ നിൽക്കെ, ഗുവാഹത്തിയിൽ നടക്കുന്ന നിർണായകമായ രണ്ടാം ക്രിക്കറ്റ് ടെസ്റ്റിൽ ആദ്യദിനം ഒപ്പത്തിനൊപ്പം പൊരുതി ഇരു ടീമുകളും. ആദ്യ ദിനം 81.5 ഓവറിൽ ആറ് വിക്കറ്റ് നഷ്ടത്തിൽ 247 റൺസെടുത്ത് സന്ദർശകരായ ദക്ഷിണാഫ്രിക്ക പുറത്താകാതെ നിന്നും. ടോസ് നേടിയ പ്രോട്ടീസ് നായകൻ ടെംപ ബാവുമ ആദ്യം ബാറ്റിങ് തെരഞ്ഞെടുക്കുകയായിരുന്നു.

കഴുത്തിന് പരിക്കേറ്റ ശുഭ്മാൻ ഗില്ലിന് പകരം റിഷഭ് പന്താണ് രണ്ടാം ടെസ്റ്റിൽ ഇന്ത്യയെ നയിക്കുന്നത്. ദക്ഷിണാഫ്രിക്കൻ നിരയിൽ വിയാൻ മുൾഡർ (13) ഒഴികെ ബാറ്റ് ചെയ്തവരാരും ഇന്നും നിരാശപ്പെടുത്തിയിട്ടില്ല. അതേസമയം, ആരേയും വലിയ വ്യക്തിഗത സ്കോറുകൾ കണ്ടെത്താൻ ഇന്ത്യൻ ബൌളർമാർ അനുവദിച്ചില്ല.

എന്നാൽ 49 റൺസെടുത്ത ട്രിസ്റ്റൺ സ്റ്റബ്സ് ആണ് ആദ്യ ദിനത്തിലെ ദക്ഷിണാഫ്രിക്കയുടെ ടോപ് സ്കോറർ. ക്യാപ്റ്റൻ ടെംപ ബാവുമ (41), എയ്ഡൻ മാർക്രം (38), റയാൻ റിക്കൽറ്റൺ (35), ടോണി ഡി സോർസി (28) എന്നിവരും ടീമിന് മികച്ച സംഭാവനകൾ നൽകി. വെളിച്ചക്കുറവിനെ തുടർന്ന് ആദ്യ ദിവസത്തെ കളി നിർത്തുമ്പോൾ സെനുറൻ മുത്തുസ്വാമി (25), കൈൽ വെറിൻ (1) എന്നിവരാണ് ക്രീസിൽ.

അതേസമയം, ഇന്ത്യൻ നിരയിൽ മൂന്ന് വിക്കറ്റെടുത്ത കുൽദീപ് യാദവാണ് ബൌളിങ്ങിൽ തിളങ്ങിയത്. ജസ്പ്രീത് ബുമ്ര, മുഹമ്മദ് സിറാജ്, രവീന്ദ്ര ജഡേജ എന്നിവർ ഓരോ വീതം വിക്കറ്റെടുത്തു.

ഇന്ത്യൻ സ്ക്വാഡ് -

കെ.എൽ. രാഹുൽ, യശസ്വി ജയ്‌സ്വാൾ,സായ് സുദർശൻ, ധ്രുവ് ജുറേൽ, റിഷഭ് പന്ത് (c) (wk), രവീന്ദ്ര ജഡേജ, നിതീഷ് കുമാർ റെഡ്ഡി, വാഷിംഗ്ടൺ സുന്ദർ, കുൽദീപ് യാദവ്, ജസ്പ്രീത് ബുംറ, മുഹമ്മദ് സിറാജ്.

ദക്ഷിണാഫ്രിക്കൻ ടീം -

എയ്ഡൻ മാർക്രം, റയാൻ റിക്കെൽട്ടൺ, വിയാൻ മുൾഡർ, ടെംബ ബാവുമ (സി), ടോണി ഡി സോർസി, ട്രിസ്റ്റൻ സ്റ്റബ്സ്, കൈൽ വെറിൻ, മാർക്കോ ജാൻസൻ, സെനുരാൻ മുത്തുസാമി, സൈമൺ ഹാർമർ, കേശവ് മഹാരാജ്.