വനിതാ പ്രീമിയർ ലീഗിൽ ഹാട്രിക് നേടുന്ന ആദ്യ ഇന്ത്യൻ പേസർ എന്ന നേട്ടം നന്ദനി ശർമ ഞായറാഴ്ച സ്വന്തമാക്കിയിരുന്നു. ഗുജറാത്ത് ജയൻ്റ്സിനെതിരായ മത്സരത്തിലാണ് 24കാരിയായ ഡൽഹി ക്യാപിറ്റൽസ് താരം ഈ അത്ഭുത നേട്ടം കൈവരിച്ചത്. 33 റൺസിന് അഞ്ച് വിക്കറ്റാണ് നന്ദനി സ്വന്തമാക്കിയത്.
ഇതോടെ വനിതാ പ്രീമിയർ ലീഗിലെ ഹാട്രിക് നേട്ടക്കാരുടെ എലൈറ്റ് ലിസ്റ്റിലും താരം ഇടം നേടി. ഇസി വോങ് (മുംബൈ ഇന്ത്യൻസ്), ഗ്രേസ് ഹാരിസ് (യുപി വാരിയേഴ്സ്), ദീപ്തി ശർമ (യുപി വാരിയേഴ്സ്) എന്നിവർക്കൊപ്പമാണ് നന്ദനിയും ഇടം നേടിയത്. ഇന്നിംഗ്സിൻ്റെ 20-ാം ഓവറിൽ കനിക അഹൂജ, രാജേശ്വരി ഗെയ്ക്വാദ് , രേണുക സിംഗ് എന്നിവരെ പുറത്താക്കിയാണ് നന്ദനി ഹാട്രിക് പ്രകടനം കാഴ്ചവച്ചത്.
ചണ്ഡീഗഡുകാരിയായ നന്ദനി മികവുറ്റൊരു പേസറാണ്. ആഭ്യന്തര ടി20 ക്രിക്കറ്റിൽ അവർ തന്റേതായ ഒരു പേര് നേടിയിട്ടുണ്ട്. 2001ൽ ജനിച്ച അവർ ആഭ്യന്തര മത്സരങ്ങളിൽ ചണ്ഡീഗഡിനെ പ്രതിനിധീകരിച്ചാണ് കളിക്കുന്നത്. കൂടാതെ നോർത്ത് സോൺ വനിതാ ടീമിൻ്റെ ഭാഗമായി ഇൻ്റർ സോണൽ മത്സരങ്ങളിലും മികച്ച പ്രകടനം കാഴ്ചവച്ചു. ഇതോടെയാണ് താരം ഐപിഎൽ ടീമായ ഡൽഹി ക്യാപിറ്റൽസിൻ്റെ ശ്രദ്ധയിൽപ്പെട്ടത്. 2026ലെ വനിതാ പ്രീമിയർ ലീഗ് ലേലത്തിൽ ഡൽഹി ക്യാപിറ്റൽസ് 20 ലക്ഷം രൂപയ്ക്കാണ് നന്ദനിയെ സ്വന്തമാക്കിയത്.
തന്നെ നിരന്തരം പ്രോത്സാഹിപ്പിച്ചതിന് ക്യാപ്റ്റൻ ജെമീമ റോഡ്രിഗസിനും സഹതാരം ഷഫാലി വർമ്മയ്ക്കും ഡൽഹി യുവപേസർ നന്ദി പറഞ്ഞു . ആദ്യ ഓവറിന് ശേഷം ലൈനും ലെങ്തും ക്രമീകരിക്കാനുള്ള തീരുമാനം ഒരു പ്രധാന തീരുമാനമായിരുന്നു എന്ന് തെളിഞ്ഞു. അതോടെ ഹാട്രിക് ഉൾപ്പെടെ അഞ്ച് വിക്കറ്റ് നേട്ടം കൈവരിക്കാനായെന്നും നന്ദനി ശർമ പറഞ്ഞു.
"എൻ്റെ ലക്ഷ്യത്തിലേക്ക് പന്തെറിയുന്നതിൽ മാത്രമാണ് ഞാൻ ശ്രദ്ധ കേന്ദ്രീകരിച്ചത്. ഷഫാലിയും ജെമീമയും ഓരോ പന്തിനും മുമ്പ് എന്നോട് സംസാരിച്ചുകൊണ്ടിരുന്നു. സ്റ്റമ്പുകളെ ആക്രമിക്കുക എന്ന പദ്ധതി ലളിതമായിരുന്നു. ഞാൻ ഹാട്രിക് പ്രതീക്ഷിച്ചിരുന്നില്ല. പക്ഷേ വിക്കറ്റുകൾ വരുമെന്ന് ടീം എന്നോട് പറഞ്ഞുകൊണ്ടിരുന്നു," നന്ദനി പറഞ്ഞു.
"എൻ്റെ ആദ്യ ഓവർ കഴിഞ്ഞപ്പോൾ ബാറ്റർമാർ എൻ്റെ സ്റ്റോക്ക് ബോൾ നന്നായി തിരഞ്ഞെടുക്കുന്നുണ്ടെന്ന് മനസ്സിലായി. അതിനാൽ എൻ്റെ വേരിയേഷൻ ഉപയോഗിക്കാൻ ഞാൻ തീരുമാനിച്ചു. ഭാഗ്യവശാൽ അത് വിജയിച്ചു. എൻ്റെ സഹോദരനും അമ്മയും ഒരു അടുത്ത സുഹൃത്തും ഇവിടെ കളി കാണാൻ വന്നിരുന്നു. കുടുംബത്തിലെ മറ്റുള്ളവർ വീട്ടിൽ നിന്ന് കളി വീക്ഷിക്കുന്നു. അവരെല്ലാം അവിശ്വസനീയമാംവിധം പിന്തുണച്ചു," നന്ദനി ശർമ കൂട്ടിച്ചേർത്തു.