CRICKET

അവള്‍ 'യെസ്' പറഞ്ഞു! ലോകകപ്പ് സ്വന്തമാക്കിയ അതേ വേദിയില്‍ വച്ച് സ്മൃതി മന്ദാനയെ പ്രൊപ്പോസ് ചെയ്ത് പലാഷ് മുച്ചല്‍ | വീഡിയോ

ലോകകപ്പ് സ്വന്തമാക്കിയ ഡിവൈ പാട്ടീല്‍ സ്റ്റേഡിയത്തിലേക്കാണ് കണ്ണു മറച്ച ശേഷം സ്മൃതിയെ കൈപിടിച്ച് എത്തിക്കുന്നത്

Author : ന്യൂസ് ഡെസ്ക്

ലോകകപ്പ് സ്വന്തമാക്കിയ വേദിയില്‍ വച്ച് തന്നെ തന്റെ പ്രിയപ്പെട്ടവളെ പ്രൊപ്പോസ് ചെയ്ത് കംപോസറും സംവിധായകനുമായ പലാഷ് മുച്ചല്‍. അവള്‍ യെസ് പറഞ്ഞു എന്ന ക്യാപ്ഷനോടെയാണ് പലാഷ് മുച്ചല്‍ വീഡിയോ തന്റെ ഇന്‍സ്റ്റഗ്രാമില്‍ പോസ്റ്റ് ചെയ്തിരിക്കുന്നത്.

ലോകകപ്പ് സ്വന്തമാക്കിയ ഡിവൈ പാട്ടീല്‍ സ്റ്റേഡിയത്തിലേക്ക് കണ്ണു മറച്ച ശേഷം സ്മൃതിയെ കൈപിടിച്ച് എത്തിക്കുന്നതും തുടര്‍ന്ന് ഗ്രൗണ്ടിന് നടുവില്‍ വച്ച് സ്മൃതിയെ പ്രൊപ്പോസ് ചെയ്യുന്നതിന്റേയും വീഡിയോ ആണ് പലാഷ് പങ്കുവച്ചിരിക്കുന്നത്.

സ്മൃതി പ്രൊപ്പോസല്‍ സ്വീകരിക്കുകയും തുടര്‍ന്ന് ഇരുവരുടെയും സുഹൃത്തുക്കള്‍ ഗ്രൗണ്ടിലേക്ക് എത്തുകയും ചെയ്യുന്നുണ്ട്. പലാഷിന്റെ സഹോദരി പലക് മുച്ചലും വേദിയിലേക്ക് എത്തുന്നുണ്ട്.

നേരത്തെ സ്മൃതി മന്ദാനയുമൊത്തുള്ള വീഡിയോ ജെമീമ റോഡ്രിഗസ് പങ്കുവച്ചിരുന്നു. ജെമീമ റോഡ്രിഗസ്, ശ്രേയങ്ക പാട്ടീല്‍, രാധ യാദവ്, അരുന്ധതി റെഡ്ഡി എന്നിവര്‍ക്കൊപ്പം ഡാന്‍സ് ചെയ്തുകൊണ്ടാണ് വീഡിയോയില്‍ സ്മൃതി എത്തുന്നത്. റീലിന്റെ അവസാനം വിരലില്‍ അണിഞ്ഞ മോതിരവും സ്മൃതി ഉയര്‍ത്തി കാണിക്കുന്നുണ്ട്. 'സംജോ ഹോ ഹി ഗയ' എന്ന ഗാനത്തിനൊപ്പമാണ് താരങ്ങള്‍ ചുവടുവയ്ക്കുന്നത്.

നവംബര്‍ 23നാണ് സ്മൃതിയുടെ വിവാഹം നിശ്ചയിച്ചിരിക്കുന്നതെന്നാണ് റിപ്പോര്‍ട്ടുകള്‍. സ്മൃതിക്കൊപ്പം ലോകകപ്പ് പിടിച്ചുകൊണ്ട് നില്‍ക്കുന്ന പലാഷിന്റെ ചിത്രം നേരത്തെ തന്നെ ആരാധകരുടെ ഹൃദയം കവര്‍ന്നിരുന്നു.

2019 മുതലാണ് ഇരുവരും പ്രണയത്തിലായതെന്നാണ് സൂചന. 2024 ലാണ് പ്രണയം ഇരുവരും പരസ്യമാക്കുന്നത്. ലോകകപ്പ് കഴിഞ്ഞാല്‍ ഉടന്‍ വിവാഹമുണ്ടാകുമെന്ന് നേരത്തെ തന്നെ റിപ്പോര്‍ട്ടുകളുണ്ടായിരുന്നു. സ്മൃതിയുടെ സ്വന്തം നാടായ മഹാരാഷ്ട്രയിലെ സാംഗ്ലിയില്‍ വച്ചായിരിക്കും വിവാഹമെന്നാണ് സൂചന.

പലാഷ് മുച്ചലിന്റെ മൂത്ത സഹോദരി പലക് മുച്ചല്‍ ബോളിവുഡ് ഗായികയാണ്. 'റിക്ഷ' എന്ന വെബ് സീരീസിന്റെ സംവിധായകനാണ് പലാഷ്. രാജ്പാല്‍ യാദവ്, റുബീന ദിലൈക് എന്നിവരെ കേന്ദ്ര കഥാപാത്രങ്ങളാക്കി 'അര്‍ധ്' എന്ന സിനിമ സംവിധാനം ചെയ്യുകയാണ് ഇപ്പോള്‍.

SCROLL FOR NEXT