സഹതാരങ്ങള്‍ക്കൊപ്പം ചുവടുവച്ച് വിവാഹ വിശേഷം അറിയിച്ച് വനിതാ ക്രിക്കറ്റര്‍ സ്മൃതി മന്ദാന. 'ലഗെ രഹോ മുന്നാഭായി' എന്ന ചിത്രത്തിലെ ഗാനത്തിനൊപ്പം ചുവടുവച്ചാണ് വിവാഹ നിശ്ചയം കഴിഞ്ഞെന്ന് ഔദ്യോഗികമായി അറിയിച്ചിരിക്കുന്നത്.
ജെമീമ റോഡ്രിഗസാണ് ഇന്‍സ്റ്റഗ്രാമില്‍ റീല്‍ പങ്കുവച്ചിരിക്കുന്നത്. സ്മൃതിയുടെ വിവാഹ നിശ്ചയം കഴിഞ്ഞെന്ന് നേരത്തെ തന്നെ വാര്‍ത്തകള്‍ ഉണ്ടായിരുന്നു. സംഗീത സംവിധായകനായ പലാഷ് മുച്ചല്‍ ആണ് വരന്‍.
ഇന്ത്യന്‍ ക്രിക്കറ്റ് ടീം വനിതാ താരങ്ങളായ ജെമീമ റോഡ്രിഗസ്, ശ്രേയങ്ക പാട്ടീല്‍, രാധ യാദവ്, അരുന്ധതി റെഡ്ഡി എന്നിവര്‍ക്കൊപ്പം ഡാന്‍സ് ചെയ്തുകൊണ്ടാണ് വീഡിയോയില്‍ സ്മൃതി എത്തുന്നത്. റീലിന്റെ അവസാനം വിരലില്‍ അണിഞ്ഞ മോതിരവും സ്മൃതി ഉയര്‍ത്തി കാണിക്കുന്നുണ്ട്. 'സംജോ ഹോ ഹി ഗയ' എന്ന ഗാനത്തിനൊപ്പമാണ് താരങ്ങള്‍ ചുവടുവയ്ക്കുന്നത്.
നവംബര്‍ 23നാണ് സ്മൃതിയുടെ വിവാഹം നിശ്ചയിച്ചിരിക്കുന്നതെന്നാണ് റിപ്പോര്‍ട്ടുകള്‍. സ്മൃതിക്കൊപ്പം ലോകകപ്പ് പിടിച്ചുകൊണ്ട് നില്‍ക്കുന്ന പലാഷിന്റെ ചിത്രം നേരത്തെ തന്നെ ആരാധകരുടെ ഹൃദയം കവര്‍ന്നിരുന്നു.
2019 മുതലാണ് ഇരുവരും പ്രണയത്തിലായതെന്നാണ് സൂചന. 2024 ലാണ് പ്രണയം ഇരുവരും പരസ്യമാക്കുന്നത്. ലോകകപ്പ് കഴിഞ്ഞാല്‍ ഉടന്‍ വിവാഹമുണ്ടാകുമെന്ന് നേരത്തെ തന്നെ റിപ്പോര്‍ട്ടുകളുണ്ടായിരുന്നു. സ്മൃതിയുടെ സ്വന്തം നാടായ മഹാരാഷ്ട്രയിലെ സാംഗ്ലിയില്‍ വച്ചായിരിക്കും വിവാഹമെന്നാണ് സൂചന.
പലാഷ് മുച്ചലിന്റെ മൂത്ത സഹോദരി പലക് മുച്ചല്‍ ബോളിവുഡ് ഗായികയാണ്. 'റിക്ഷ' എന്ന വെബ് സീരീസിന്റെ സംവിധായകനാണ് പലാഷ്. രാജ്പാല്‍ യാദവ്, റുബീന ദിലൈക് എന്നിവരെ കേന്ദ്ര കഥാപാത്രങ്ങളാക്കി 'അര്‍ധ്' എന്ന സിനിമ സംവിധാനം ചെയ്യുകയാണ് ഇപ്പോള്‍.