courtesy' UEFA
FOOTBALL

നേഷൻസ് ലീഗ് ക്വാർട്ടർ ലിസ്റ്റായി; ഹാളണ്ടിന്റെ നോർവേയെ നേരിടാൻ ഇംഗ്ലണ്ട്

നോർവേയെ മറികടന്നാൽ സെമിയിൽ ബെൽജിയം-ജർമനി പോരാട്ടത്തിലെ വിജയികളെയാകും ഇംഗ്ലണ്ട് നേരിടുക. സ്പെയിൻ-ഫ്രാൻസ്, നെതർലൻഡ്സ്-പോർച്ചുഗൽ എന്നിവയാണ് മറ്റു ക്വാർട്ടർ പോരാട്ടങ്ങൾ

Author : ന്യൂസ് ഡെസ്ക്

ലണ്ടൻ: യുവേഫ നേഷൻസ് ലീഗ് ക്വാർട്ടർ ഫൈനലിൽ എർലിങ് ഹാലണ്ടിന്റെ നോർവേയെ നേരിടാൻ ഇംഗ്ലണ്ട്. സ്പെയിനിനെ 3-2ന് തകർത്ത് ഗ്രൂപ്പ് ജേതാക്കളായാണ് തോമസ് ടുഷേലിന്റെ സംഘം ക്വാർട്ടറിലെത്തിയത്. 2026 ലോകകപ്പ് ക്വാർട്ടറിൽ ഇരു ടീമുകളും ഏറ്റുമുട്ടിയപ്പോൾ അധികസമയത്ത് ജൂഡ് ബെല്ലിങ്ങാമിന്റെ ഗോളിലാണ് ഇംഗ്ലണ്ട് 2-1ന് വിജയിച്ച് സെമിയിലെത്തിയത്. നോർവേയെ മറികടന്നാൽ സെമിയിൽ ബെൽജിയം-ജർമനി പോരാട്ടത്തിലെ വിജയികളെയാകും ഇംഗ്ലണ്ട് നേരിടുക.

സ്പെയിൻ-ഫ്രാൻസ്, നെതർലൻഡ്സ്-പോർച്ചുഗൽ എന്നിവയാണ് മറ്റു ക്വാർട്ടർ പോരാട്ടങ്ങൾ. മാർച്ച് 25 മുതൽ 27 വരെയാണ് ആദ്യപാദ മത്സരങ്ങൾ. രണ്ടാംപാദം മാർച്ച് 28 മുതൽ 30 വരെ നടക്കും. ജൂൺ 9 മുതൽ 13 വരെ നടക്കുന്ന നേഷൻസ് ലീഗ് ഫൈനൽസിൽ രണ്ട് സെമിഫൈനലുകളും മൂന്നാം സ്ഥാനത്തിനായുള്ള മത്സരവും ഫൈനലുമുണ്ടാകും. ഫൈനൽ റൗണ്ടിലെത്തുന്ന നാല് ടീമുകൾക്ക് ടൂർണമെന്റിന് ആതിഥേയത്വം വഹിക്കാൻ താൽപര്യം അറിയിക്കാം.

അതേസമയം, ലീഗ് എ/ബി പ്ലേ ഓഫിൽ വെയിൽസ് സ്ലോവേനിയയെയും റിപ്പബ്ലിക് ഓഫ് അയർലൻഡ് ക്രൊയേഷ്യയെയും നേരിടും. ലീഗ് എയിൽ അവസാന സ്ഥാനത്തെത്തിയെങ്കിലും മികച്ച അവസാന സ്ഥാനക്കാരിൽ ഉൾപ്പെട്ടതോടെയാണ് വെയിൽസ് തരംതാഴ്ത്തൽ ഒഴിവാക്കി പ്ലേ ഓഫിലെത്തിയത്. ഗ്രൂപ്പിൽ ഓസ്ട്രിയക്ക് പിന്നിൽ രണ്ടാം സ്ഥാനക്കാരായാണ് അയർലൻഡ് പ്ലേ ഓഫിന് യോഗ്യത നേടിയത്. ഈ മത്സരങ്ങളും മാർച്ചിലെ രാജ്യാന്തര ഇടവേളയിൽ നടക്കും.

SCROLL FOR NEXT