നീണ്ട കാത്തിരിപ്പുകൾക്കൊടുവിൽ പ്രമുഖ സ്മാര്‍ട്ട് ഫോണ്‍ നിര്‍മാതാക്കളായ വണ്‍ പ്ലസിന്റെ പുതിയ ഫോണ്‍ വണ്‍പ്ലസ് 15ൻ്റെ ലോഞ്ച് തീയതി പുറത്ത്. ഈ മാസം 27ന് ചൈനയിൽ ഫോൺ ലോഞ്ച് ചെയ്യുമെന്നാണ് കമ്പനി പുറത്തുവിടുന്ന വിവരം. ചൈനീസ് സോഷ്യൽ മീഡിയ പ്ലാറ്റ്‌ഫോമായ വെയ്‌ബോയിലാണ് കമ്പനി ലോഞ്ച് തീയതി പുറത്തുവിട്ടത്. ഇതുവരെ ടീസർ മാത്രം പുറത്തുവിട്ടിട്ടുള്ള ഹാൻഡ്‌സെറ്റായ എയ്സ് സിക്സും വൺപ്ലസ് അതേദിവസം പുറത്തിറക്കും.
വയര്‍ലെസ് ചാര്‍ജിങ്ങ് സംവിധാനവും വണ്‍ പ്ലസിന് പുതിയ മോഡലിന് ഉണ്ടാകുമെന്നാണ് കരുതുന്നത്. ഏറ്റവും വലിയ ബാറ്ററി പാക്കോടുകൂടിയാണ് വണ്‍ പ്ലസ് വിപണിയില്‍ എത്തുക. ചില ടെക്കികള്‍ പങ്കുവെക്കുന്ന വിവരം അനുസരിച്ച് 7300 എംഎഎച്ചോട് കൂടിയ ബാറ്ററിയായിരിക്കും. ബാറ്ററി 120 വാട്ട്‌സ് വയേര്‍ഡ് ചാര്‍ജിങ്ങും 50 വാട്ട്‌സ് വയര്‍ലെസ് ചാര്‍ജിങ്ങുമായിരിക്കും ഉണ്ടാവുക.
ബാറ്ററിക്ക് പുറമെ 6.78 ഇഞ്ച് ഡിസ്‌പ്ലേ ആയിരിക്കും വണ്‍പ്ലസ് 15ന്റെ മറ്റൊരു പ്രത്യേകത. 8.1 എംഎം കനവും 211-215 ഗ്രാം ഭാരവുമായിരിക്കും ഫോണിനുണ്ടായിരിക്കുക. വണ്‍ പ്ലസിന്റെ സാന്‍ഡ് ഡ്യൂണ്‍ നിറത്തിന് പുറമെ കറുപ്പും പര്‍പ്പിള്‍ നിറത്തിലും ഫോണ്‍ അവതരിപ്പിക്കും. മുന്‍ ജനറേഷന്‍ ഫോണുകളെ അപേക്ഷിച്ച് പുതിയ സീരീസിന് 165 ഹെഡ്‌സ് റിഫ്രഷ് റേറ്റ് ഡിസ്‌പ്ലേയാണ് നല്‍കുക. നവീകരിച്ച ഡിസ്‌പ്ലേ ഗെയിം കളിക്കാനടക്കം മികച്ച ഫ്രെയിം റേറ്റ് ആണ് നല്‍കുകയെന്നും പറയപ്പെടുന്നു.