ന്യൂസ് ഡെസ്ക്
മറ്റ് പഴങ്ങൾക്കൊപ്പം പ്രാധാന്യം ലഭിക്കാറില്ലെങ്കിലും നിരവധി ആരോഗ്യഗുണങ്ങളുള്ള പഴമാണ് പാഷൻ ഫ്രൂട്ട്. 76 ശതമാനം ജലാംശമുള്ള പാഷൻ ഫ്രൂട്ട് ആരോഗ്യത്തിന് മാത്രമല്ല സൗന്ദര്യസംരക്ഷണത്തിനും മികച്ചതാണ്. പാഷൻ ഫ്രൂട്ടിൻ്റെ നിരവധി ആരോഗ്യഗുണങ്ങൾ എന്തൊക്കെയെന്ന് നോക്കാം...
പ്രമേഹരോഗികൾക്ക്...
പാഷൻ ഫ്രൂട്ടിന്റെ കുറഞ്ഞ ഗ്ലൈസെമിക് സൂചികയും (ജിഐ), അതിൽ അടങ്ങിയിരിക്കുന്ന ഉയർന്ന ഫൈബർ (10.4%) ഗുണങ്ങളും പ്രമേഹരോഗികൾക്ക് ഇൻസുലിൻ അളവ് നിയന്ത്രിതമായി നിലനിർത്തുന്നതിന് മികച്ചതാണ്.
ചർമാരോഗ്യത്തിന്...
ആന്റി ഓക്‌സിഡന്റുകൾ ചർമ്മത്തിന് ഗുണകരമാണെന്ന കാര്യം എല്ലാവർക്കും അറിയാവുന്നതാണ്. വിറ്റാമിൻ എ, വിറ്റാമിൻ സി, റൈബോഫ്ലേവിൻ, കരോട്ടിൻ തുടങ്ങി പലതരം ആന്റിഓക്‌സിഡന്റുകൾ പാഷൻ ഫ്രൂട്ടിൽ അടങ്ങിയിട്ടുണ്ട്.
പ്രതിരോധശേഷിക്ക്...
നിങ്ങളുടെ പ്രതിരോധശേഷി വർദ്ധിപ്പിക്കുന്ന വിറ്റാമിൻ സി, ബീറ്റാ ക്രിപ്റ്റോക്സാന്തിൻ, ആൽഫ കരോട്ടിൻ എന്നിവ പാഷൻ ഫ്രൂട്ടിൽ സമ്പുഷ്ടമായ അളവിൽ അടങ്ങിയിട്ടുണ്ട്. പാഷൻ ഫ്രൂട്ടിന്റെ ജെല്ലി, ജ്യൂസ്, സ്ക്വാഷ് എന്നിവ കഴിക്കുന്നത് ശരീരത്തിന്റെ രോഗപ്രതിരോധശേഷി വർദ്ധിപ്പിക്കുവാൻ സഹായിക്കും.
തൈറോയ്ഡ് പ്രവർത്തനത്തിന്...
പാഷൻ ഫ്രൂട്ടിലെ റൈബോഫ്ലേവിൻ (വിറ്റാമിൻ ബി 6), നിയാസിൻ (വിറ്റാമിൻ ബി 3) എന്നിവയുടെ സാന്നിധ്യം ശരീരത്തിലെ തൈറോയ്ഡ് പ്രവർത്തനം നിയന്ത്രിക്കാൻ സഹായിക്കുന്നു.
ഹൃദയാരോഗ്യത്തിന്...
പാഷൻ ഫ്രൂട്ടിൽ ഹൃദയാരോഗ്യത്തിന് ഏറ്റവും ഉത്തമമായ പൊട്ടാസ്യം അടങ്ങിയിട്ടുണ്ട്, കൂടാതെ സോഡിയം കുറവുമാണ്. ഉയർന്ന ഫൈബർ ഡയറ്റ് ഹൃദ്രോഗ സാധ്യത കുറയ്ക്കും എന്നാണ് പഠനങ്ങൾ സൂചിപ്പിക്കുന്നത്.
രക്തത്തിൻ്റെ കൗണ്ട് വർധിപ്പിക്കാൻ...
രക്തത്തിൻ്റെ കൗണ്ട് വർധിപ്പിക്കാൻ സഹായകമാണ് പാഷൻ ഫ്രൂട്ട്. അതിനാൽ തന്നെ ഡെങ്കിപ്പനി പോലെയുള്ള അസുഖങ്ങൾ വ്യാപിച്ചപ്പോൾ പലരും പാഷൻ ഫ്രൂട്ട് ധാരാളം കഴിക്കാൻ ശ്രദ്ധിച്ചിരുന്നു.
സ്ട്രെസ് കുറയ്ക്കാൻ...
പാഷൻ ഫ്രൂട്ടിൽ മഗ്നീഷ്യം അടങ്ങിയിട്ടുണ്ട്. ഈ പഴം കഴിച്ചാൽ നിങ്ങളുടെ സ്ട്രെസ് ഒരു പരിധി വരെ കുറയ്ക്കാമെന്നാണ് പഠനങ്ങൾ പറയുന്നത്.
പാഷൻ ഫ്രൂട്ട് വെറുതെ കഴിക്കുക മാത്രമല്ല സ്വാദിഷ്ടമായ ജ്യൂസ്, സ്ക്വാഷ്, ജാം തുടങ്ങിയവ ഉണ്ടാക്കിയും കഴിക്കാവുന്നതാണ്.