ന്യൂസ് ഡെസ്ക്
വെറും വെള്ളം മാത്രം ഉപയോഗിച്ച് മുഖസൗന്ദര്യം വര്‍ധിപ്പിക്കാമെന്ന് പറയുന്നത് കേട്ടാല്‍, തട്ടിപ്പാണെന്ന് തോന്നാം. പക്ഷേ, വാസ്തവമാണ്. ഇതൊക്കെ എല്ലാവര്‍ക്കും അറിയാവുന്ന കാര്യമാണ്. പക്ഷേ, പലരും അത്ര ഗൗരവത്തോടെ ഇക്കാര്യങ്ങള്‍ സ്വീകരിക്കാറില്ലെന്ന് മാത്രം.
അന്തരീക്ഷത്തിലെ ചൂടും പൊടിയും അഴുക്കുമൊക്കെ നമ്മുടെ മുഖത്ത് വേഗത്തിലെത്തും. ഇടയ്ക്കിടെ മുഖം കഴുകുന്നത് വൃത്തിയായിരിക്കാന്‍ സഹായിക്കും. കാലാവസ്ഥയ്ക്ക് അനുസരിച്ച് വെള്ളം ഉപയോഗിക്കണം. ചൂട് കാലത്താണെങ്കില്‍ തണുത്തതും തണുപ്പുകാലത്താണെങ്കില്‍ ചൂടുള്ള വെള്ളവും ഉപയോഗിക്കണം.
രണ്ടോ മൂന്നോ തവണ കഴുകുന്നത് നല്ലതാണ്. അഴുക്ക് പോകുന്നതിനൊപ്പം, മുഖത്തെ ചൂടും മാറേണ്ടതുണ്ട്. സാവധാനത്തില്‍ ആവര്‍ത്തിച്ച് മുഖം കഴുകുക.
കഴുകി കഴിഞ്ഞയുടന്‍ മുഖം തുടയ്ക്കരുത്. ചൂട് മാറി, മുഖം തണുത്തശേഷം മാത്രം തുടയ്ക്കുക. അമര്‍ത്തി തുടയ്ക്കരുത്. മൃദുവായ ടവ്വല്‍ ഉപയോഗിക്കണം. ടിഷ്യൂ പേപ്പര്‍ ഉപയോഗിക്കുമ്പോഴും ഇക്കാര്യം ശ്രദ്ധിക്കണം.
യാത്ര ചെയ്യുന്നവരായാലും, ഓഫീസിലിരുന്ന് ജോലി ചെയ്യുന്നവരായാലും ഇടക്കിടെ മുഖം കഴുകുന്നത് നല്ലതാണ്. അഴുക്കും ചൂടും മാറുന്നതിനൊപ്പം, തൊലിപ്പുറമേയുള്ള രക്തയോട്ടം ക്രമപ്പെടുന്നത് മുഖത്തിന് തിളക്കം നല്‍കും. ഉന്മേഷവും മുഖകാന്തിയും വര്‍ധിക്കും.
ശരീരത്തിന് ആവശ്യമായ വെള്ളം കുടിക്കണം. അതുപോലെ പ്രധാനമാണ് മൂത്രം ഒഴിക്കുന്നതും. നീണ്ട യാത്രകളിലോ, മണിക്കൂറുകള്‍ ഓഫീസിലിരിക്കുമ്പോഴോ ഇക്കാര്യങ്ങള്‍ ശ്രദ്ധിക്കണം.