പാലക്കാട് പനയമ്പാടത്തെ അപകടത്തിൽ ജീവൻ പൊലിഞ്ഞ നാല് വിദ്യാർഥിനികളുടെ ഓർമകളുമായി കരിമ്പ ഹയർ സെക്കണ്ടറി സ്കൂളിലെ വിദ്യാർഥികളും അധ്യാപകരും രക്ഷിതാക്കളും ഒത്തുചേർന്നു. വിദ്യാർഥികളുടെ മരണത്തിന് ശേഷം ആദ്യമായി സ്കൂളിലെത്തിയ വിദ്യാർഥികൾ അനുശോചന യോഗത്തിന് ശേഷമാണ് പരീക്ഷഹാളിലേക്ക് കയറിയത്.

ALSO READ: വയനാട്ടിൽ ആദിവാസി യുവാവിനോട് ക്രൂരത, കാറിൽ വലിച്ചിഴച്ചത് അര കിലോമീറ്ററോളം; വധശ്രമത്തിന് കേസെടുത്ത് പൊലീസ്

പ്രിയപ്പെട്ട വിദ്യാർഥികളുടെ വിയോഗത്തിന്റെ വേദനയിലാണ്, കരിമ്പ ഹയർ സെക്കണ്ടറി സ്കൂളിലേക്ക് അവരെല്ലാം എത്തിയത്. പരീക്ഷയ്ക്ക് മുൻപുള്ള അനുശോചന യോഗത്തിൽ, അധ്യാപകരും, പഞ്ചായത്ത് ഭാരവാഹികളും, രക്ഷിതാക്കളുമെല്ലാം കുറഞ്ഞ വാക്കുകളിൽ തീരാനഷ്ടത്തിന്റെ നോവ് പങ്കിട്ടു.

ഒന്നിച്ചു നടന്ന്, ഒരുമിച്ച് ഇല്ലാതായ ആ കുട്ടികളെക്കുറിച്ച് സ്കൂളിലെ പാചക തൊഴിലാളിയായ രാധ ഓർമ പങ്കുവെച്ചു. പല വീടുകളിൽ നിന്നും കൊണ്ടുവരുന്ന ഭക്ഷണം ഒരു പാത്രത്തിലിട്ട് കഴിക്കുന്ന കുട്ടികളെ മറക്കാനാവില്ലെന്ന് രാധ പറഞ്ഞു.

ALSO READ: പത്തനംതിട്ടയിൽ യുവാവിനെ വാഹനം ഇടിപ്പിച്ചു കൊലപ്പെടുത്തിയതായി സംശയം; മരിച്ചത് റാന്നി സ്വദേശി അമ്പാടി

സ്കൂളിന്റെ 50ാം വാർഷികമായിരുന്നു ഈ വർഷം. അതിന്റെ ആഘോഷങ്ങൾ മാറ്റിവെക്കുകയാണെന്ന് കരിമ്പ പഞ്ചായത്ത് പ്രസിഡണ്ട് അറിയിച്ചു. എട്ടാം ക്ലാസുകാർക്ക് ഇന്ന് സോഷ്യൽ സയൻസാണ് പരീക്ഷ. പ്രിയപ്പെട്ട നാലു പേർ ഒപ്പമില്ലെന്ന വേദനയിൽ, അവരുടെ ഓർമകൾ നിറഞ്ഞ ക്ലാസ് മുറിയിലിരുന്ന് മറ്റൊരു പരീക്ഷ കൂടി അഭിമുഖീകരിക്കുകയാണ് സഹപാഠികൾ.