ഇക്കാലത്ത് ഒരു കാർ വാങ്ങുക എന്നത് വലിയ കാര്യമൊന്നുമല്ല. ആർഭാടത്തേക്കാൾ ആവശ്യം തന്നെയാണ് ആളുകൾക്ക് വാഹനം എന്നത്. ഇനി സാമ്പത്തികമാണ് അതിന് തടസമെങ്കിൽ ബജറ്റിനനുസരിച്ച് യൂസ്ഡ് കാർ മാർക്കറ്റിൽ ലഭ്യമാണ്. കയ്യിലുള്ള തുകയ്ക്ക് അനുസരിച്ച് ബുദ്ധിപരമായ തീരുമാനമായിരിക്കും നല്ലരീതിയിൽ വർക്കിങ് കണ്ടീഷനുള്ള കാറുകൾ തെരഞ്ഞെടുത്ത് വാങ്ങുന്നത് ബുദ്ധിപരമായ തീരുമാനമായിരിക്കും. പക്ഷെ സെക്കൻഡ് ഹാൻഡ് കാർ വാങ്ങുമ്പോൾ ഏറെ കാര്യങ്ങൾ ശ്രദ്ധിക്കേണ്ടതുണ്ട്.
യൂസ്ഡ് കാർ വാങ്ങുന്നവർ പ്രധാനമായും എഞ്ചിൻ സ്റ്റാർട്ട് ചെയ്ത് അസാധാരണമായ ശബ്ദങ്ങൾ ഉണ്ടോയെന്ന് പരിശോധിക്കുക. കൂടാതെ, ഓയിൽ ചോർച്ച, ബെൽറ്റുകൾ പൊട്ടിയിട്ടുണ്ടോ, പൈപ്പുകൾ എന്നിവ പരിശോധിക്കുക. സാധ്യമെങ്കിൽ, ഒരു വിദഗ്ദ്ധ മെക്കാനിക്കിനെക്കൊണ്ട് എഞ്ചിൻ കംപ്രഷൻ പരിശോധിക്കുക. എഞ്ചിന് എന്ത് പണി വന്നാലും അത് വലിയ പ്രതിസന്ധിയാകും സൃഷ്ടിക്കുക. കാറിൽ പൊട്ടലുകൾ, തുരുമ്പ്, പെയിന്റ് നിറവ്യത്യാസം എന്നിവ ഉണ്ടോ എന്ന് നന്നായി പരിശോധിക്കുക. അകത്ത്, സീറ്റുകൾ, ഡാഷ്‌ബോർഡ്, സ്റ്റിയറിംഗ്, കൺട്രോളുകൾ എന്നിവയുടെ അവസ്ഥ പരിശോധിക്കുക. നന്നായി പരിപാലിക്കുന്ന ഒരു കാർ തെരഞ്ഞെടുക്കുന്നത് മാനസികമായി സന്തോഷം നൽകും.
മറ്റൊന്ന് വാങ്ങാൻ തീരുമാനിക്കുന്ന വാഹനത്തിന്റെ സർവീസ് ഹിസ്റ്ററി പരിശോധിക്കുക എന്നതാണ്. മുൻ ഉടമ കൃത്യസമയത്ത് സർവീസ് നടത്തിയോ എന്ന് സർവീസ് ബുക്കിലോ റെക്കോർഡിലോ രേഖപ്പെടുത്തുന്നു. സർവീസ് റെക്കോഡ് നോക്കി ഉറപ്പുവരുത്തിയതിന് ശേഷം വാഹനം വാങ്ങുക. ചിലർ മൈലേജ് കുറവാണെന്ന് കാണിക്കാൻ ഓഡോമീറ്ററിൽ കൃത്രിമം കാണിക്കുന്നു. റീഡിംഗ് യഥാർത്ഥമാണോ എന്ന് നിർണ്ണയിക്കാൻ സീറ്റ്, പെഡലുകൾ അല്ലെങ്കിൽ സ്റ്റിയറിംഗ് വീൽ എന്നിവയിലെ തേയ്മാനം പരിശോധിക്കുക. വിശ്വസ്തനായ ഒരു മെക്കാനിക്കിനെക്കൊണ്ട് കാർ പരിശോധിച്ച് ഉറപ്പുവരുത്താൻ മടി കാണിക്കരുത്.
കരാർ ഉറപ്പിച്ചുകഴിഞ്ഞാൽ, ആർ‌ടി‌ഒയിൽ ഉടമസ്ഥാവകാശം കൈമാറണം. നിയമപരമായ പ്രശ്നങ്ങൾ ഒഴിവാക്കാൻ പുതിയ ഉടമയുടെ പേരിലുള്ള ഇൻഷുറൻസ് പോളിസി അപ്‌ഡേറ്റ് ചെയ്യുക. അതുപോലെ തന്നെ ഏറ്റവും പ്രധാനപ്പെട്ട കാര്യം രേഖകളാണ്. ആർ‌സി (രജിസ്ട്രേഷൻ സർട്ടിഫിക്കറ്റ്), റോഡ് നികുതി രസീതുകൾ, പൊല്യൂഷൻ സർട്ടിഫിക്കറ്റ് (പി‌യു‌സി), ഇൻഷുറൻസ് പേപ്പറുകൾ തുടങ്ങിയ എല്ലാ രേഖകളും പരിശോധിക്കുക. വെഹിക്കിൾ ഐഡന്റിഫിക്കേഷൻ നമ്പർ ഉപയോഗിച്ച് കാറിന്റെ മുൻകാല വിവരങ്ങൾ എടുക്കുന്നതും സുരക്ഷ ഉറപ്പാക്കും.
കാറിനൊപ്പം വരുന്ന ഇൻഷുറൻസിന്റെ സാധുതയും കവറേജ് തരവും (മൂന്നാം കക്ഷി അല്ലെങ്കിൽ സമഗ്ര) പരിശോധിക്കുക. കാർ മുമ്പ് ഏതെങ്കിലും അപകടങ്ങളിലോ ക്ലെയിമുകളിലോ ഉൾപ്പെട്ടിട്ടുണ്ടോ എന്നും ഇൻഷുറൻസ് രേഖകൾ വെളിപ്പെടുത്തും. സമഗ്ര ഇൻഷുറൻസ് ആയിരിക്കും ഉപകാരപ്രദം. ഓൺലൈനായോ ഓട്ടോ ഗൈഡുകൾ വഴിയോ ആ മോഡലിന്റെ നിലവിലെ വില പരിശോധിക്കുക. തുടർന്ന്, ന്യായമായ വിലയ്ക്ക് ചർച്ച ചെയ്യുന്നതിന് കാറിന്റെ അവസ്ഥ, മൈലേജ്, അറ്റകുറ്റപ്പണി ചെലവുകൾ എന്നിവ പരിഗണിക്കുക.