അഭിനേതാവ് എന്ന നിലയിൽ നിന്ന് വിനോദ വ്യവസായരംഗത്തേക്ക് വ്യവസായ സാമ്രാജ്യം വിപുലീകരിച്ച് തെലുങ്ക് സൂപ്പർ താരം അല്ലു അർജുൻ. AAA സിനിമാസിന്റെ ഏറ്റവും പുതിയ മൾട്ടിപ്ലക്സ് തിയേറ്റർ വിശാഖപട്ടണത്ത് പ്രൗഢഗംഭീരമായി ഉദ്ഘാടനം ചെയ്തു. വിശാഖപട്ടണത്തിലെ പുതിയ തിയേറ്ററിന്റെ പ്രധാന ആകർഷണം ഇന്ത്യയിലാദ്യമായി അവതരിപ്പിക്കുന്ന 'LED Projection Q-Luxon Screen' ആണ്. അഭിനയത്തിന് അപ്പുറത്തേക്ക് വീണ്ടുമൊരു നിർണായക ചുവടുവെപ്പ് നടത്തിയിരിക്കുകയാണ് അല്ലു അർജുൻ.
70 അടി നീളവും 30 അടി വീതിയുമുള്ള ഈ സ്ക്രീൻ ആന്ധ്രാപ്രദേശിലെ ഏറ്റവും വലിയ LED സിനിമാ സ്ക്രീൻ കൂടിയാണ്. തിയേറ്റർ കാഴ്ചാനുഭവത്തിൽ പുതിയ മാനദണ്ഡങ്ങൾ കുറിച്ചുകൊണ്ടാണ് ഈ അത്യാധുനിക സാങ്കേതികവിദ്യയുടെ അരങ്ങേറ്റം. താരപദവിക്കപ്പുറം പ്രേക്ഷകർക്ക് മികച്ച സിനിമാനുഭവം സമ്മാനിക്കുക എന്ന അല്ലു അർജുന്റെ കാഴ്ചപ്പാടാണ് AAA സിനിമാസിലൂടെ യാഥാർഥ്യമാകുന്നത്. അത്യാധുനിക സാങ്കേതികവിദ്യയും ലോകോത്തര ഹോസ്പിറ്റാലിറ്റിയും ഒന്നിപ്പിക്കുന്ന AAA സിനിമാസ് വിശാഖപട്ടണത്തിലെ വിനോദ മേഖലയ്ക്ക് പുതിയൊരു ഉണർവ് സമ്മാനിക്കുമെന്നാണ് വിലയിരുത്തപ്പെടുന്നത്.
സാങ്കേതികവിദ്യ, പ്രീമിയം അടിസ്ഥാന സൗകര്യങ്ങൾ, സൗകര്യം എന്നിവയിൽ ശ്രദ്ധ കേന്ദ്രീകരിച്ചുകൊണ്ട്, പുതിയ കാലത്തെ പ്രീമിയം സിനിമാ അനുഭവം കെട്ടിപ്പടുക്കുകയാണ് ഈ ബ്രാൻഡ് ലക്ഷ്യമിടുന്നത്.
റീക്ലൈനർ ടിക്കറ്റ് ഉടമകൾക്കായുള്ള പ്രത്യേക ഐക്കൺ സ്റ്റാർ ലോഞ്ച്, സവിശേഷമായ വിഐപി എൻട്രൻസ്, പ്രീമിയം സീറ്റിങ് എന്നിവയിലൂടെ ഈ അനുഭവം സ്ക്രീനിനും അപ്പുറത്തേക്ക് നീളുന്നു. പ്രേക്ഷകർക്ക് കൂടുതൽ അനുഭവവേദ്യമായി നിൽക്കുന്നതും ഓർമയിൽ നിൽക്കുന്നതുമായ രീതിയിൽ സിനിമ ആസ്വദിക്കാൻ കഴിയുന്ന ഇടങ്ങൾ സൃഷ്ടിച്ചുകൊണ്ട് സിനിമയിലൂടെ തിരിച്ചുനൽകുക എന്ന അല്ലു അർജുന്റെ കാഴ്ചപ്പാടിനെയാണ് ഈ സങ്കൽപ്പം പ്രതിഫലിപ്പിക്കുന്നത്.