ദേശീയ ചലച്ചിത്ര വികസന കോർപറേഷന്റെ (എൻഎഫ്ഡിസി) പാർട്ട് ടൈം ചെയർമാനായി നടനും ബിജെപി നേതാവുമായ ജി. കൃഷ്ണ കുമാറിനെ നിയമിച്ചു. മൂന്ന് വർഷത്തേക്കാണ് നിയമനം. കൃഷ്ണ കുമാറിനെ എൻഎഫ്ഡിസി ബോർഡിന്റെ നോൺ ഒഫിഷ്യൽ ഡയറക്ടറായി നിയമിച്ചതായും കേന്ദ്ര വാർത്താവിനിമയ മന്ത്രാലയം അറിയിച്ചു.
ദൂരദർശനിൽ വാർത്താ അവതാരകനായിരുന്ന കൃഷ്ണ കുമാർ സീരീയലുകളിലൂടെയാണ് അഭിനയജീവിതം ആരംഭിക്കുന്നത്. 1994ൽ പുറത്തിറങ്ങിയ 'കാശ്മീരം' ആണ് ആദ്യ ചിത്രം. തുടർന്ന് നിരവധി സിനിമകളിലും ടെലിവിഷൻ പരമ്പരകളിലും ശ്രദ്ധേയമായ വേഷങ്ങൾ ചെയ്തു.
2021 ഫെബ്രുവരിയിലാണ് കൃഷ്ണ കുമാർ ബിജെപിയിൽ ചേർന്നത്. 2021ലെ നിയമസഭാ തിരഞ്ഞെടുപ്പിൽ തിരുവനന്തപുരം മണ്ഡലത്തിൽ നിന്നും 2024ലെ ലോക്സഭാ തിരഞ്ഞെടുപ്പിൽ കൊല്ലം മണ്ഡലത്തിൽ നിന്നും ബിജെപി സ്ഥാനാർഥിയായി മത്സരിച്ചിരുന്നു.