ന്യൂ ഡൽഹി: അടുത്തിടെ സോഷ്യൽ മീഡിയയിൽ ഏറെ ചർച്ചയായ താരമാണ് ഗിരിജാ ഓക്ക് ഗോഡ്‌ബോലെ. നീലസാരിയും സ്ലീവ്ലെസ് ബ്ലൗസും ധരിച്ച നടിയുടെ ചിത്രങ്ങൾ സോഷ്യൽ മീഡിയയിൽ വൈറലായിരുന്നു. ഹോളിവുഡ് താരങ്ങളോട് ഉൾപ്പെടെ ഗിരിജയെ താരമത്യപ്പെടുത്തിയവരുണ്ട്.
ലല്ലൻടോപ്പ് എന്ന യൂട്യൂബ് ചാനലിന് നല്‍കിയ അഭിമുഖത്തിലെ ഗിരിജയുടെ ലുക്കാണ് സമൂഹമാധ്യമങ്ങളിൽ വലിയ തോതിൽ പ്രചരിച്ചത്. ഇന്ത്യയുടെ സ്വിഡ്നി സ്വീനിയെന്നും മോണിക്ക ബലൂച്ചിയെന്നുമാണ് ഗിരിജയെ നെറ്റിസണ്‍സ് വിശേഷിപ്പിച്ചത്. വൈറൽ ഫോട്ടോയെ ചിലർ തെറ്റായി ചിത്രീകരിക്കുന്നു എന്ന് ചൂണ്ടിക്കാട്ടി നടി രംഗത്തെത്തിയിരുന്നു. ചില സോഷ്യൽ മീഡിയ പേജുകൾ തന്നെ സെക്ഷ്വലൈസ് ചെയ്യുന്നു എന്നായിരുന്നു നടിയുടെ ആരോപണം.
ഇപ്പോഴിതാ, പെട്ടെന്നുണ്ടായ പ്രശസ്തി തന്റെ ജീവിതത്തിൽ വലിയ മാറ്റങ്ങൾക്ക് കാരണമായില്ലെന്ന് വെളിപ്പെടുത്തിയിരിക്കുകയാണ് ഗിരിജ. ഇന്ത്യാ ടുഡേയ്ക്ക് നൽകിയ അഭിമുഖത്തിലാണ് നടി ഇക്കാര്യങ്ങളെപ്പറ്റി മനസുതുറന്നത്. "എന്തെങ്കിലും മാറിയിട്ടുണ്ടോ എന്ന് ഒരാൾ ചോദിച്ചു. ഞാൻ പറഞ്ഞു, ഇല്ല, എനിക്ക് അധിക ജോലി ഓഫറുകൾ ലഭിക്കുന്നില്ല," ഗിരിജ പറഞ്ഞു.
സമൂഹമാധ്യമങ്ങളില്‍ മോശം സന്ദേശങ്ങൾ ലഭിക്കുന്നതായും ഗിരിജ ഓക്ക് പറഞ്ഞു. "എനിക്ക് നിങ്ങൾക്കുവേണ്ടി എന്തും ചെയ്യാൻ കഴിയും എന്നാണ് ഒരാൾ പറഞ്ഞത്. വേറൊരാൾ എന്റെ റേറ്റ് പോലും ചോദിച്ചു - 'നിങ്ങളോടൊപ്പം ഒരു മണിക്കൂർ ചെലവഴിക്കാൻ എത്രയാകും?' എന്ന്. അത്തരം നിരവധി സന്ദേശങ്ങൾ ലഭിക്കുന്നുണ്ട്," ഗിരിജ പറയുന്നു.
മറാത്തി, ഹിന്ദി സിനിമകളിൽ സജീവമാണ് ഗിരിജ ഓക്ക്. 'ജവാന്‍' എന്ന ഷാരൂഖ് ഖാൻ ചിത്രത്തിലൂടെയാണ് നടി ശ്രദ്ധിക്കപ്പെടുന്നത്. മുതിർന്ന മറാത്തി നടൻ ഗിരീഷ് ഓക്കിന്റെ മകളാണ്. 'താരേ സമീൻ പർ', 'ഷോർ ഇൻ ദി സിറ്റി', 'ക്വാല', 'ദി വാക്സിൻ വാർ' തുടങ്ങിയവയാണ് നടിയുടെ മറ്റ് ചിത്രങ്ങൾ.