കൊച്ചി: മലയാളത്തിലെ ഓൾ ടൈം ബ്ലോക്ക്ബസ്റ്ററുകളിൽ ഒന്നായ 'ലോക-ചാപ്റ്റർ വൺ: ചന്ദ്ര'യ്ക്ക് പുരസ്കാരത്തിളക്കം. കേരളാ ഫിലിം ക്രിട്ടിക്സ് അവാർഡ് 2025ലാണ് അഞ്ച് പുരസ്കാരങ്ങളുമായി ചിത്രം വലിയ നേട്ടം കൈവരിച്ചത്. മികച്ച സംവിധായകനുള്ള അവാർഡ് അരുൺ ഡൊമിനിക് സ്വന്തമാക്കിയപ്പോൾ, ചിത്രത്തിലെ നായികയായ കല്യാണി പ്രിയദർശൻ മികച്ച നടിക്കുള്ള അവാർഡും കരസ്ഥമാക്കി.
മികച്ച സംഗീത സംവിധായകനുള്ള അവാർഡ് 'ലോക'യിലൂടെ ജേക്സ് ബിജോയ് നേടി. മികച്ച മേക്കപ്പിനുള്ള അവാർഡ് നേടിയത് ഈ ചിത്രത്തിന് മേക്കപ്പ് ഒരുക്കിയ റോണക്സ് സേവ്യർ ആണ്. മികച്ച നവാഗത രചയിതാവിനുള്ള അവാർഡ് നേടിയത് ചിത്രത്തിന് തിരക്കഥ രചിച്ച ശാന്തി ബാലചന്ദ്രനാണ്. ദുൽഖർ സൽമാന്റെ വേഫറെർ ഫിലിംസ് നിർമിച്ച ചിത്രത്തിൽ കല്യാണി പ്രിയദർശൻ, നസ്ലൻ എന്നിവരാണ് പ്രധാന വേഷങ്ങൾ ചെയ്തത്.
300 കോടി ആഗോള കളക്ഷൻ നേടുന്ന ആദ്യ മലയാള ചിത്രമായി മാറിയ 'ലോക', കേരളത്തിൽ നിന്ന് 121 കോടി ഗ്രോസ് കളക്ഷൻ നേടി ഇൻഡസ്ട്രി ഹിറ്റ് പട്ടവും സ്വന്തമാക്കിയിരുന്നു. പാൻ ഇന്ത്യ ഹിറ്റായി മാറിയ ചിത്രത്തിന്റെ രണ്ടാം ഭാഗവും പ്രഖ്യാപിച്ചിട്ടുണ്ട്. ടൊവിനോ തോമസ് ആണ് ചിത്രത്തിന്റെ രണ്ടാം ഭാഗത്തിലെ നായകൻ. ടൊവിനോ തോമസ്, ദുൽഖർ സൽമാൻ എന്നിവർ 'ലോക'യിൽ അതിഥി താരങ്ങളായും എത്തിയിരുന്നു.
തിയേറ്റർ റിലീസിന് ശേഷം, ചിത്രത്തിന് ഒടിടിയിലും ഗംഭീര പ്രതികരണവും സ്വീകരണവുമാണ് പാൻ ഇന്ത്യ തലത്തിൽ ലഭിച്ചത്. ഇതുകൂടാതെ, കഴിഞ്ഞ വർഷം റിലീസ് ചെയ്ത ഇന്ത്യൻ ചിത്രങ്ങളിൽ ഏറ്റവും ജനപ്രിയമായ 10 ചിത്രങ്ങളുടെ ഐഎംഡിബി ലിസ്റ്റിലും 'ലോക' ഇടംനേടിയിരുന്നു. കള്ളിയങ്കാട്ട് നീലിയുടെ ഐതിഹ്യകഥയിൽ നിന്ന് പ്രചോദനം ഉൾക്കൊണ്ട് ഒരുക്കിയ ചിത്രം, മലയാളത്തിന് പുറമെ തമിഴ്, തെലുങ്ക്, ഹിന്ദി, കന്നഡ ഭാഷകളിലും സൂപ്പർ വിജയം നേടിയിരുന്നു. ചന്തു സലിംകുമാർ, അരുൺ കുര്യൻ, ശരത് സഭ, നിഷാന്ത് സാഗർ, വിജയരാഘവൻ എന്നിവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിച്ചത്.