ആദിത്യ ധർ- രൺവീർ സിങ് ചിത്രം 'ധുരന്ധർ: ദ റിവഞ്ച്' തിയേറ്ററുകളിൽ 50 ദിവസം പിന്നിട്ട് പ്രദർശനം തുടരുന്നു. ബോക്സ് ഓഫീസിൽ ഓൾ ടൈം റെക്കോർഡ് കളക്ഷൻ നേടിയാണ് ചിത്രം 50 ദിവസം പിന്നിട്ടത്. ഇന്ത്യയിൽ നിന്ന് മാത്രം 1000 കോടി നെറ്റ് ഗ്രോസ് നേടുന്ന ആദ്യ ചിത്രം എന്ന നേട്ടം സ്വന്തമാക്കിയ 'ധുരന്ധർ 2', റിലീസ് ചെയ്ത് 50 ദിനം പിന്നിടുമ്പോൾ ആഗോള തലത്തിൽ നേടിയത് 1800 കോടിക്ക് മുകളിലാണ്. ജിയോ സ്റ്റുഡിയോസ് ബി62 സ്റ്റുഡിയോസ് എന്നിവർ ചേർന്നാണ് സിനിമയുടെ നിർമാണം.
ചിത്രത്തിന്റെ ആദ്യ ഭാഗവും 1000 കോടി ക്ലബിൽ ഇടം പിടിച്ചിരുന്നു. രൺവീർ സിംഗ് അവതരിപ്പിക്കുന്ന ജസ്കിരത് സിംഗ് രംഗി എന്ന കഥാപാത്രത്തെയാണ് ചിത്രം പിന്തുടരുന്നത്. രൺവീർ സിംഗിനൊപ്പം അർജുൻ രാംപാൽ, സഞ്ജയ് ദത്ത്, മാധവൻ, അക്ഷയ് ഖന്ന, സാറ അർജുൻ, രാകേഷ് ബേദി എന്നിവരാണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നത്.
ഹിന്ദി, തമിഴ്, തെലുങ്ക്, മലയാളം, കന്നഡ എന്നീ അഞ്ച് ഭാഷകളിൽ ആണ് ചിത്രം ആഗോള റിലീസായി മാർച്ച് 19ന് എത്തിയത്. ചിത്രം രചിച്ചതും സംവിധായകൻ ആദിത്യ ധർ തന്നെയാണ്. ജ്യോതി ദേശ്പാണ്ഡെയും ലോകേഷ് ധറും ആദിത്യ ധറും ചേർന്നാണ് ഈ മെഗാ മാസ് ആക്ഷൻ സ്പൈ ത്രില്ലർ നിർമിച്ചത്. പിആർഒ - ശബരി.