മലയാളം ബ്ലോക്ബസ്റ്റര് ചിത്രം മാര്ക്കോ ഒടിടി റിലീസിന് ഒരുങ്ങുന്നു. ഫെബ്രുവരിയിലായിരിക്കും ചിത്രം ഒടിടി പ്ലാറ്റ്ഫോമായ സോണിലിവ്വില് സ്ട്രീമിംഗ് ആരംഭിക്കുക എന്നാണ് ഒടിടി പ്ലേ റിപ്പോര്ട്ട് ചെയ്യുന്നത്. ഫെബ്രുവരി 14ന് ചിത്രം ഒടിടിയില് റിലീസ് ചെയ്യുമെന്നാണ് റിപ്പോര്ട്ടുകള്. മലയാളം, തമിഴ്, തെലുങ്ക്, കന്നട എന്നീ ഭാഷകളിലായിരിക്കും ചിത്രം റിലീസ് ചെയ്യുക എന്നും റിപ്പോര്ട്ടില് പറയുന്നു.
ഹനീഫ് അദേനി സംവിധാനം ചെയ്ത ചിത്രം 2024 ഡിസംബര് 20നാണ് തിയേറ്ററിലെത്തിയത്. ചിത്രത്തില് ഉണ്ണി മുകുന്ദനായിരുന്നു കേന്ദ്ര കഥാപാത്രം. ഉണ്ണി മുകുന്ദന് പുറമെ യുക്തി തരേജ, ജഗതീഷ്, കബീര് ദുഹാന് സിംഗ്, സിദ്ദിഖ്, അഭിമന്യു ഷമ്മി തിലകന് എന്നിവരും പ്രധാന വേഷത്തിലെത്തിയിരുന്നു. മലയാള സിനിമ ഇതുവരെ കണ്ടതില് ഏറ്റവും വയലന്സ് നിറഞ്ഞ സിനിമ കൂടിയായിരുന്നു മാര്ക്കോ.
'എ' സര്ട്ടിഫിക്കറ്റ് ലഭിച്ച ചിത്രത്തില് സ്ത്രീകള്, കുട്ടികള്, മൃഗങ്ങള് എന്നിവര്ക്കെതിരെയുള്ള വയലന്സ് സീനുകളുണ്ട്. അതേസമയം മാര്ക്കോയുടെ ഹിന്ദി വേര്ഷന്റെ ഒടിടി റിലീസുമായി ബന്ധപ്പെട്ട വിവിരങ്ങളൊന്നും പുറത്തുവന്നിട്ടില്ല.
റിലീസ് ചെയ്ത് 40 ദിവസം പിന്നിടുമ്പോള് ചിത്രം ആഗോള ബോക്സ് ഓഫീസില് 115 കോടി നേടിയിരുന്നു. ജനുവരി 31നാണ് മാര്ക്കോയുടെ കന്നട വേര്ഷന് തിയേറ്ററിലെത്തിയത്. ചിത്രത്തിന്റെ ഹിന്ദി വേര്ഷന് 13 കോടിയും മലയാളം വേര്ഷന് 42 കോടിയും ഇന്ത്യയില് നിന്ന് മാത്രം കളക്ട് ചെയ്തിരുന്നു.