കൊച്ചി: ഛത്രപതി ശിവാജി ജയന്തി ദിനത്തിൽ, ജിയോ സ്റ്റുഡിയോസും മുംബൈ ഫിലിം കമ്പനിയും ചേർന്ന് നിർമിക്കുന്ന ബിഗ് ബജറ്റ് ചിത്രം 'രാജാ ശിവാജി' ഫസ്റ്റ് ലുക്ക് പുറത്തിറക്കി. പ്രശസ്ത ബോളിവുഡ് നടനും സംവിധായകനുമായ റിതേഷ് വിലാസ്റാവു ദേശ്മുഖ് ഒരുക്കുന്ന ചിത്രത്തിൽ, നടൻ തന്നെയാണ് ഛത്രപതി ശിവാജി ആയി വേഷമിടുന്നത്. കയ്യിൽ വാൾ പിടിച്ചു നിൽക്കുന്ന ശിവാജിയുടെ ലുക്കിൽ ആണ് റിതേഷ് ദേശ്മുഖിനെ പോസ്റ്ററിൽ അവതരിപ്പിച്ചിരിക്കുന്നത്.
'ഞങ്ങളുടെ രാജാവ്, ഞങ്ങളുടെ അഭിമാനം, ഞങ്ങളുടെ പാരമ്പര്യം' എന്ന് കുറിച്ചുകൊണ്ടാണ് നടിയും നിർമാണ പങ്കാളിയുമായ ജെനീലിയ ദേശ്മുഖ് സിനിമയുടെ ഫസ്റ്റ് ലുക്ക് പോസ്റ്റർ പങ്കുവച്ചത്. റിതേഷ് ദേശ്മുഖിന് പുറമേ, അഭിഷേക് ബച്ചൻ, സഞ്ജയ് ദത്ത്, മഹേഷ് മഞ്ജരേക്കർ, ഫർദീൻ ഖാൻ, സച്ചിൽ ഖഡേക്കർ, ഭാഗ്യശ്രീ പട്വർധൻ, ജിതേന്ദ്ര ജോഷി, സൽമാൻ ഖാൻ, സിദ്ധാർഥ് ഷിൻഡേ, വിദ്യാ ബാലൻ, അമോൽ ഗുപ്ത, ജനീലിയ തുടങ്ങിയവരും സിനിമയിൽ പ്രധാന വേഷങ്ങളിൽ എത്തുന്നു.
പാൻ ഇന്ത്യൻ ചിത്രമായി ഒരുങ്ങുന്ന 'രാജാ ശിവാജി'ക്കു കാമറ ചലിപ്പിക്കുന്നത് സന്തോഷ് ശിവനും സംഗീതം പകരുന്നത് അജയ്-അതുൽ ടീമുമാണ്. ഹിന്ദി- മറാത്താ ഭാഷകളിലാണ് ചിത്രം ഒരുക്കുന്നത്.
ജിയോ സ്റ്റുഡിയോസ് അവതരിപ്പിക്കുകയും മുംബൈ ഫിലിം കമ്പനിയുടെ ബാനറിൽ ജ്യോതി ദേശ്പാണ്ഡെയും ജെനീലിയ ദേശ്മുഖും നിർമിക്കുകയും ചെയ്ത 'രാജാ ശിവാജി' 2026 മെയ് ഒന്നിന് ലോകമെമ്പാടുമുള്ള തിയേറ്ററുകളിൽ പ്രദർശനത്തിനെത്തും. പിആർഒ - ശബരി.