കൊച്ചി: ബേസിൽ ജോസഫ്, ടൊവിനോ തോമസ്, വിനീത് ശ്രീനിവാസൻ എന്നിവർ പ്രധാന വേഷങ്ങളിലെത്തുന്ന 'അതിരടി'യുടെ ടൈറ്റില്‍ ടീസർ പുറത്ത്. പക്കാ മാസ് എന്റർടൈനറായിട്ടാണ് ചിത്രം ഒരുങ്ങുന്നത് എന്നാണ് ടീസർ സൂചിപ്പിക്കുന്നത്. അരുൺ അനിരുദ്ധൻ ആണ് സംവിധാനം. ബേസിൽ ജോസഫ് എന്റർടെയ്ൻമെന്റ്സിന്റെ ബാനറിൽ ബേസിൽ ജോസഫും ഡോക്ടർ അനന്തു എന്റർടെയ്ൻമെന്റ്സിന്റെ ബാനറിൽ ഡോക്ടർ അനന്തു എസും ചേർന്നാണ് 'അതിരടി'യുടെ നിർമാണം.
ബേസിൽ ജോസഫ് സംവിധാനം ചെയ്ത മല്ലു സൂപ്പർ ഹീറോ ചിത്രം ‘മിന്നൽ മുരളി’യുടെ തിരക്കഥാകൃത്തുക്കളിൽ ഒരാളാണ് അരുണ്‍. സംവിധായകന്റെ ആദ്യ ചിത്രമാണ് 'അതിരടി'. പോൾസൺ സ്കറിയ, അരുൺ അനിരുദ്ധൻ എന്നിവർ ചേർന്നാണ് തിരക്കഥ. സംവിധായകനും ഛായാഗ്രാഹകനുമായ സമീർ താഹിറും ടൊവിനോ തോമസും അതിരടിയുടെ സഹനിർമാതാക്കളാണ്. 'മിന്നല്‍ മുരളി'ക്ക് ശേഷം ടൊവിനോ തോമസും ബേസിൽ ജോസഫും സമീർ താഹിറും അരുൺ അനിരുദ്ധനും ഒന്നിക്കുന്ന ചിത്രം കൂടിയാണിത്.
വിനീത് ശ്രീനിവാസിനിലൂടെയാണ് 'അതിരടി'യുടെ ടൈറ്റില്‍ ടീസർ ആരംഭിക്കുന്നത്. അടികിട്ടി അവശനായി ഇരിക്കുന്ന വിനീതിനോട് ആരാണ് അടിച്ചതെന്ന് ചോദിക്കുന്നതിന് നല്‍കുന്ന മറുപടി സിനിമയുടെ മൂഡ് എന്താണെന്ന് വ്യക്തമാക്കുന്നതാണ്. ഒരുത്തന്‍ കാട്ടുതീ ആണെങ്കില്‍ മറ്റവന്‍ കൊടുങ്കാറ്റാണ് എന്ന് വിനീത് പറയുന്നിടത്താണ് ടൊവിനോയും ബേസിലിനേയും അവതരിപ്പിക്കുന്നത്. വ്യത്യസ്ത ധ്രവുങ്ങളില്‍ നില്‍ക്കുന്ന കഥാപാത്രങ്ങളെയാണ് താരങ്ങള് അവതരിപ്പിക്കുന്നത് എന്ന സൂചനയാണ് ടീസർ നല്‍കുന്നത്.
ബേസിൽ ജോസഫ്, ടൊവിനോ തോമസ്, വിനീത് ശ്രീനിവാസൻ എന്നിവർ ആദ്യമായി ഒരുമിച്ച് എത്തുന്ന ചിത്രമാണ് 'അതിരടി'. വിഷ്ണു വിജയ് ആണ് സംഗീത സംവിധാനം. ഛായാഗ്രഹണം സാമുവൽ ഹെൻറി, സംഗീതം വിഷ്ണു വിജയ്, എഡിറ്റർ ചമൻ ചാക്കോ, പ്രൊഡക്ഷൻ ഡിസൈനർ മാനവ് സുരേഷ്, കോസ്റ്റ്യൂം മഷർ ഹംസ, മേക്കപ്പ് റോണക്സ് സേവ്യർ, സൗണ്ട് ഡിസൈനർ നിക്സൺ ജോർജ്, വരികൾ സുഹൈൽ കോയ, പ്രൊഡക്ഷൻ കൺട്രോളർ ആന്റണി തോമസ്, എക്സിക്യൂട്ടീവ് പ്രൊഡ്യൂസർ നിഖിൽ രാമനാഥ്, അമൽ സേവ്യർ മനക്കത്തറയിൽ, വിഎഫ്എക്സ് മൈൻഡ്സ്റ്റെയിൻ സ്റ്റുഡിയോസ്, ചീഫ് അസോ. ഡയറക്ടർ സുകു ദാമോദർ, സ്റ്റിൽസ് രോഹിത് കെ സുരേഷ്, ടൈറ്റിൽ ഡിസൈൻ സർക്കാസനം, പിആർഒ വൈശാഖ് സി വടക്കെവീട്, ജിനു അനിൽകുമാർ. മലയാളത്തിന് പുറമേ തമിഴ്, തെലുങ്ക്,ഹിന്ദി, കന്നഡ ഭാഷകളിലും അതിരടിയുടെ ടീസറും പുറത്തിറങ്ങിയിട്ടുണ്ട്.