ഉർവശിയും ജോജു ജോര്ജും ഐശ്വര്യ ലക്ഷ്മിയും പ്രധാന വേഷങ്ങളിലെത്തിയ 'ആശ' തിയേറ്ററുകളിൽ മികച്ച പ്രേക്ഷക- നിരൂപക പ്രശംസ നേടി മുന്നേറുന്നതിനിടെ ഉർവശിയെ കുറിച്ച് സംവിധായകൻ എം.എ. നിഷാദ് സോഷ്യൽ മീഡിയയിൽ കുറിച്ച വാക്കുകള് ശ്രദ്ധ നേടുന്നു. ഉർവശിയെ 'മലയാളത്തിന്റെ അൽ പച്ചീനോ' എന്നാണ് സംവിധായകൻ വിശേഷിപ്പിച്ചിരിക്കുന്നത്.
''ഉർവ്വശി മലയാളത്തിന്റെ അൽ പച്ചീനോ... അൽഫ്രെദോ ജയിംസ് അൽ പച്ചീനോ എന്ന വിശ്വ വിഖ്യാതനായ നടനെ പറ്റി നിങ്ങൾ കേട്ടിട്ടുണ്ടാവും എന്ന് ഞാൻ വിശ്വസിക്കുന്നു. ലോക പ്രശസ്തനായ അമേരിക്കൻ ആക്റ്റർ. ദ ഗോഡ് ഫാദർ, സ്കാർഫേസ്, സെന്റെ ഓഫ് എ വുമൺ, ഏഞ്ചൽസ് ഇൻ അമേരിക്ക പോലെയുളള ചിത്രങ്ങളിലെ പ്രകടനത്തിന് ഒരേ സമയം പ്രേക്ഷക പ്രശംസയും പുരസ്ക്കാരങ്ങളും നേടിയ അഭിനേതാവ്.
സൂക്ഷ്മാഭിനയത്തിന്റെ താളലയങ്ങളിൽ ലോകത്തെ വിസ്മയിപ്പിച്ച നടൻ. ഇങ്ങ് നമ്മുടെ കൊച്ച് കേരളത്തിൽ സ്വാഭാവിക അഭിനയത്തിലൂടെ നമ്മെ വിസ്മയിപ്പിക്കുന്ന നമ്മുടെ മാത്രം ഉർവശി, അൽ പച്ചീനയുടെ വെളളിത്തിരയിലെ പ്രകടനത്തെ ഓർമ്മപ്പെടുത്തുന്നു 'ആശ' എന്ന ചിത്രത്തിലൂടെ. എല്ലാ വാദ്യങ്ങളും ചെണ്ടക്ക് താഴെ, എന്ന ചൊല്ല് അന്വർത്ഥമാക്കുന്ന പ്രകടനം...
അതെ ഉർവശിയോളം,ഉർവശി മാത്രം.. അഭിനയ മോഹിയായ ഏതൊരാൾക്കും പഠിക്കാൻ ഒരു അക്കാഡമിയിലോ, ആക്റ്റിംഗ് സ്ക്കൂളിലോ പോകണ്ട...സ്ക്രീനിൽ ഉർവശിയുടെ കഥാപാത്രങ്ങൾ കണ്ട് മനസിലാക്കിയാൽ മാത്രം മതി...ആശ പൂർണമായും ഒരു ഉർവശി ചിത്രമാണ്.. ജോജുവും, ഐശ്വര്യ ലക്ഷ്മിയും അവരവരുടെ ഭാഗം മികച്ചതാക്കി എന്നുളള സത്യം വിസ്മരിക്കുന്നില്ല...വിരസമാകുമെന്ന് തോന്നുന്ന നിമിഷങ്ങൾ പോലും സംവിധായകന്റെ ക്രാഫ്റ്റിലും ഉർവശിയുടെ പ്രകടനത്തിലും പ്രേക്ഷകരുടെ ശ്രദ്ധ സിനിമയിൽ നിന്നും മാറാതെ അവരെ അതിൽ ലയിപ്പിച്ചു..
സഫർ സനൽ എന്ന സംവിധായകനും,അജിത് വിനായക എന്ന നിർമാതാവിനും അഭിമാനിക്കാവുന്ന ചിത്രം...'ആശ' നൽകുന്ന സന്ദേശം മലയാളത്തിന് മാത്രമല്ല ലോകമെമ്പാടുമുളള പ്രേക്ഷകർക്കാണ്...ഒരു നായികാ പ്രാധാന്യമുളള ചിത്രം പ്രേക്ഷകർ സ്വീകരിക്കുന്നത് കാണുമ്പോൾ ഒരുപാട് സന്തോഷം തോന്നി...അത് ലേഡീ സൂപ്പർ സ്റ്റാർ എന്ന പദവിയല്ല മറിച്ച് മികച്ച അഭിനേത്രിയെന്ന ഒറ്റ പേരിലാണ്..അതെ അത് ഉർവശിയാണ്...അവരെ മലയാളത്തിന്റെ അൽ പച്ചീനോ, എന്ന് വിളിക്കാനാണ്, ഞാനിഷ്ടപ്പെടുന്നത്'', നിഷാദ് കുറിച്ചു.
നവാഗതനായ സഫർ സനൽ സംവിധാനം ചെയ്ത് തിയേറ്ററുകളിലെത്തിയിരിക്കുന്ന 'ആശ' മലയാളത്തിൽ നിന്നുമുള്ളൊരു ലക്ഷണമൊത്ത ഡാർക്ക് സസ്പെൻസ് ത്രില്ലറാണെന്നാണ് പ്രേക്ഷകർ അഭിപ്രായപ്പെടുന്നത്. ഉർവശിക്ക് പുറമെ ജോജു ജോർജ്, ഐശ്വര്യ ലക്ഷ്മി, വിജയരാഘവൻ തുടങ്ങിയവരുടെ അസാധ്യ പ്രകടനങ്ങളും ചിത്രത്തിന് മുതൽക്കൂട്ടാണ്. മധു നീലകണ്ഠന്റെ ഛായാഗ്രഹണ മികവും ഷാൻ മുഹമ്മദിന്റെ കൃത്യതയാർന്ന എഡിറ്റിങ്ങും ഗോവിന്ദ് വസന്ത ഒരുക്കിയിരിക്കുന്ന പശ്ചാത്തല സംഗീതവും പാട്ടുകളും വരിഞ്ഞുമുറുക്കുന്ന തരം അനുഭവം സമ്മാനിക്കുന്നുവെന്നാണ് പ്രേക്ഷകർ അഭിപ്രായപ്പെടുന്നത്.