ഗായിക ചിന്മയി ശ്രീപദ അടുത്തിടെ ചെന്നൈയില്‍ വെച്ച് നടന്ന 'തഗ് ലൈഫിന്റെ' ഓഡിയോ ലോഞ്ചില്‍ ഗാനം ആലപിച്ചിരുന്നു. 2018ലെ മീടു മൂവ്‌മെന്റിന് ശേഷം സൗത്ത് ഇന്ത്യന്‍ സിനി, ടെലിവിഷന്‍ ആന്‍ഡ് ഡബ്ബിംഗ് ആര്‍ട്ടിസ്റ്റ് യൂണിയനില്‍ നിന്ന് ചിന്മയി പുറത്താക്കിയിരുന്നു. നിരോധനത്തിനിടയിലാണ് ചിന്മയി ഓഡിയോ ലോഞ്ചില്‍ ഗാനം ആലപിച്ചത്. ഇതോടെ ആരാധകര്‍ ഗായികയ്ക്ക് പിന്തുണയുമായി എത്തിയിരിക്കുകയാണ്. ചിന്മയിയുടെ നിരോധനത്തെ "തമിഴ് സിനിമയുടെ നഷ്ടം" എന്നാണ് ആരാധകര്‍ വിശേഷിപ്പിക്കുന്നത്.
'തഗ് ലൈഫിലെ' 'മുത്ത മഴൈ' എന്ന ഗാനമാണ് ചിന്മയി ഓഡിയോ ലോഞ്ചില്‍ ആലപിച്ചത്. സിനിമയില്‍ ധീയാണ് ആ ഗാനം ആലപിച്ചിട്ടുള്ളത്. എ.ആര്‍ റഹ്‌മാന്‍ ആണ് ചിത്രത്തിന്റെ സംഗീത സംവിധാനം. ശിവ ആനന്ദ് വരികള്‍ രചിച്ചു. ചിന്മയി ഗാനം ആലപിച്ചപ്പോള്‍ സിനിമയിലെ കേന്ദ്ര കഥാപാത്രങ്ങളെ അവതരിപ്പിച്ച കമല്‍ ഹാസന്‍, സിലമ്പരസന്‍ ടി.ആര്‍, തൃഷ കൃഷ്ണന്‍ എന്നിവരും വേദിയില്‍ ഉണ്ടായിരുന്നു.
ഗാനത്തിന്റെ വീഡിയോ പുറത്തുവന്നതോടെയാണ് ആരാധകര്‍ ഗായികയ്ക്ക് പിന്തുണയുമായി എത്തിയത്. "നിങ്ങള്‍ ഇതിലും മികച്ചത് അര്‍ഹിക്കുന്നുണ്ട്. ശരിക്കും നിരോധിക്കപ്പെട്ടത് നിങ്ങളുടെ നഷ്ടമല്ല. തമിഴ് സിനിമയുടെ നഷ്ടമാണ്", എന്നാണ് ആരാധകര്‍ സമൂഹമാധ്യമത്തില്‍ പറയുന്നത്.
2018ല്‍ ഇന്ത്യയില്‍ മീടു മൂവ്‌മെന്റ് പൊട്ടിപുറപ്പെട്ടപ്പോള്‍ ചിന്മയി വൈരമുത്തുവിനെതിരെ ലൈംഗിക അതിക്രമണ ആരോപണവുമായി രംഗത്തെത്തിയിരുന്നു. ഇതിന്റെ പേരിലാണ് അവര്‍ സൗത്ത് ഇന്ത്യന്‍ സിനി, ടെലിവിഷന്‍ ആന്‍ഡ് ഡബ്ബിംഗ് ആര്‍ട്ടിസ്റ്റ് യൂണിയനില്‍ നിന്ന് പുറത്താക്കപ്പെട്ടത്. അതിന് ശേഷം ചിന്മയി ഡബ്ബിംഗ് യൂണിയന്‍ പ്രസിഡന്റ് ആയ രാധാ രവി എന്ന സ്ത്രീയെ പിന്തുണച്ചും രംഗത്തെത്തി.
അതേസമയം 'തഗ് ലൈഫ്' ജൂണ്‍ അഞ്ചിനാണ് തിയേറ്ററിലെത്തുന്നത്. 'നായകന്' ശേഷം മണിരത്‌നവും കമല്‍ ഹാസനും വീണ്ടും ഒന്നിക്കുന്ന ചിത്രമാണിത്. സിലമ്പരശന്‍, ജോജു ജോര്‍ജ്, തൃഷ, അഭിരാമി, ഐശ്വര്യ ലക്ഷ്മി, നാസര്‍, അശോക് സെല്‍വന്‍, അലി ഫസല്‍, പങ്കജ് ത്രിപാഠി, ജിഷു സെന്‍ഗുപ്ത, സാന്യ മല്‍ഹോത്ര, രോഹിത് ഷറഫ്, വൈയാപുരി തുടങ്ങിയവരാണ് സിനിമയിലെ മറ്റു കഥാപാത്രങ്ങളെ അവതരിപ്പിക്കുന്നത്. രാജ്കമല്‍ ഫിലിംസ് ഇന്റര്‍നാഷണല്‍, മദ്രാസ് ടാക്കീസ്, റെഡ് ജയന്റ് മൂവീസ്, ആര്‍ മഹേന്ദ്രന്‍, ശിവ അനന്ത് എന്നിവര്‍ ചേര്‍ന്നാണ് ചിത്രത്തിന്റെ നിര്‍മാണം നിര്‍വഹിക്കുന്നത്.
മണിരത്നത്തിനൊപ്പം പതിവ് സഹപ്രവര്‍ത്തകരായ സംഗീതസംവിധായകന്‍ എ ആര്‍ റഹ്‌മാനും, എഡിറ്റര്‍ ശ്രീകര്‍ പ്രസാദും ഈ ചിത്രത്തിലും ഒരുമിക്കുന്നുണ്ട്. നേരത്തെ മണിരത്നത്തിന്റെ കന്നത്തില്‍ മുത്തമിട്ടാല്‍, ആയുധ എഴുത്ത് എന്നീ ചിത്രങ്ങളില്‍ പ്രവര്‍ത്തിച്ചിട്ടുള്ള ഛായാഗ്രാഹകന്‍ രവി കെ ചന്ദ്രനാണ് തഗ് ലൈഫിന്റെ ക്യാമറ കൈകാര്യം ചെയ്യുന്നത്. വിക്രമിന് വേണ്ടി കമലുമായി സഹകരിച്ച അന്‍പറിവ് മാസ്റ്റേഴ്സാണ് ആക്ഷന്‍ കൊറിയോഗ്രാഫി ചെയ്യുന്നത്. തഗ് ലൈഫിന്റെ മേക്കപ്പ് രഞ്ജിത്ത് അമ്പാടിയും പ്രൊഡക്ഷന്‍ ഡിസൈനറായി ശര്‍മ്മിഷ്ഠ റോയ്യും കോസ്റ്റ്യൂം ഡിസൈനറായി ഏകാ ലഖാനിയുമാണ് ചിത്രത്തില്‍ പ്രവര്‍ത്തിക്കുന്നത്.