ഇന്ത്യ-പാകിസ്ഥാൻ വിഭജനകാലത്ത് നടക്കുന്ന പ്രണയകഥ പറയുന്ന ഇംതിയാസ് അലിയുടെ 'മേം വാപ്പസ് ആവൂംഗ' എന്ന ചിത്രത്തിലെ ആദ്യ ഗാനം പുറത്ത്. 'ക്യാ കമാൽ ഹെ' എന്ന ഗാനമാണ് റിലീസ് ചെയ്തിരിക്കുന്നത്. എ.ആർ. റഹ്മാൻ ഈണമിട്ട ഗാനം ആലപിച്ചിരിക്കുന്നത് ചിത്രത്തിലെ നായകൻ ദിൽജിത് ദോസഞ്ച് ആണ്. ഇർഷാദ് കാമിൽ ആണ് വരികൾ.
രണ്ട് വ്യത്യസ്ത കാലഘട്ടങ്ങളിലായി നടക്കുന്ന പ്രണയകഥയാണ് 'മേം വാപസ് ആവൂംഗ' പറയുന്നത്. ദിൽജിത്ത് ദോസഞ്ച്, വേദാങ് റെയ്ന, ഷർവാരി വാഗ്, നസീറുദ്ദീൻ ഷാ എന്നിവരാണ് ചിത്രത്തിൽ പ്രധാന വേഷങ്ങളിൽ എത്തുന്നത്.
ഇംതിയാസ് അലി - എ.ആർ. റഹ്മാൻ - ഇർഷാദ് കാമിൽ സഖ്യം വീണ്ടും ഒന്നിക്കുന്ന ചിത്രം കൂടിയാണിത്. ഈ കൂട്ടുകെട്ടിൽ പിറന്ന 'അമർ സിംഗ് ചംകില', 'തമാശ', 'ഹൈവേ' എന്നീ ചിത്രങ്ങളിലെ പാട്ടുകൾ വലിയ ഹിറ്റുകളായിരുന്നു. 'അമർ സിംഗ് ചംകില'യ്ക്ക് ശേഷം ഇംതിയാസ് അലിയും ദിൽജിത്തും ഒന്നിക്കുന്ന രണ്ടാമത്തെ ചിത്രമാണ് 'മേം വാപസ് ആവൂംഗ'.
അപ്ലോസ് എന്റർടെയ്ൻമെന്റും വിൻഡോ സീറ്റ് ഫിലിംസും ചേർന്നാണ് 'മേം വാപസ് ആവൂംഗ' നിർമിക്കുന്നത്. തിരക്കഥ: ഇംതിയാസ് അലി, നയനിക മഹ്താനി, ഛായാഗ്രഹണം: സിൽവെസ്റ്റർ ഫോൺസെക്ക, പ്രൊഡക്ഷൻ ഡിസൈനർ: സുമൻ റോയ് മഹാപത്ര, എഡിറ്റർ: ആരതി ബജാജ്, സൗണ്ട് ഡിസൈനർ & പ്രൊഡക്ഷൻ സൗണ്ട് മിക്സർ: ധിമാൻ കർമാകർ, കോസ്റ്റ്യൂം ഡിസൈനർ: ശീതൾ ഇക്ബാൽ ശർമ, വിഷ്വൽ ഇഫക്ട്സ്: ഫാന്റം എഫ്.എക്സ് (Phantom FX), കളർ: റെഡ് ചില്ലീസ് കളർ.
അതേസമയം, നെറ്റ്ഫ്ലിക്സ് സീരീസായ 'ഓ സാഥി രേ'യുടെ ക്രിയേറ്ററും രചയിതാവും ഷോറണ്ണറും കൂടിയാണ് ഇംതിയാസ് അലി. അദിതി റാവു ഹൈദരി, അവിനാഷ് തിവാരി, അർജുൻ രാംപാൽ എന്നിവരാണ് ഈ പ്രണയ പരമ്പരയിൽ അഭിനയിക്കുന്നത്. 2020ൽ ഇറങ്ങിയ 'ഷീ' എന്ന സീരീസ് സംവിധാനം ചെയ്ത ഇംതിയാസിന്റെ സഹോദരൻ ആരിഫ് അലിയാണ് ഈ റൊമാന്റിക് ഡ്രാമ സംവിധാനം ചെയ്യുന്നത്.