കൊച്ചി: 'സ്ട്രേഞ്ചർ തിങ്സ്' അഞ്ചാം സീസൺ ആയുള്ള കാത്തിരിപ്പ് അവസാനിച്ചു. ആരാധകരുടെ ഇഷ്ട സൈ ഫൈ സീരിസിന്റെ അവസാന സീസണ്‍ നെറ്റ്‌ഫ്ലിക്സിൽ സ്ട്രീമിങ് ആരംഭിച്ചു. ആവേശത്തോടെയാണ് സീരിസിനെ ആരാധകർ വരവേറ്റത്. എന്നാൽ, നെറ്റ്ഫ്ലിക്സ് സ്ട്രീമിങ്ങിന് തടസം നേരിട്ടത് യുഎസിലേയും ഇന്ത്യയിലേയും കാഴ്ചക്കാരെ നിരാശരാക്കി.
'സ്ട്രേഞ്ചർ തിങ്സ്' പരമ്പരയുടെ അവസാന സീസൺ പുറത്തിറങ്ങിയതിന് തൊട്ടുപിന്നാലെയാണ് തടസം നേരിട്ടത്. തങ്ങളുടെ സ്‌ക്രീനുകൾ സ്തംഭിച്ചെന്നും (frozen) ആപ്പ് പ്രവർത്തനരഹിതമായെന്നും നിരവധി പേരാണ് സോഷ്യൽ മീഡിയയിൽ പരാതികളുമായി എത്തിയത്. വിവിധ ഉറവിടങ്ങളിൽ നിന്നുള്ള റിപ്പോർട്ടുകൾ ക്രോഡീകരിക്കുന്ന ഡൗൺഡിറ്റെക്റ്റർ (Downdetector), യുഎസിൽ മാത്രം 8,000ത്തിലധികം പേർക്ക് സ്ട്രീമിങ് തടസപ്പെട്ടതായാണ് റിപ്പോർട്ട് ചെയ്തത്. എന്നാൽ , വൈകാതെ നെറ്റ്ഫ്ലിക്സ് ഈ തകരാർ പരിഹരിച്ചു.
നവംബർ 27 പുലർച്ചെ 6.30 മുതൽ ആണ് 'സ്ട്രേഞ്ചർ തിങ്സ്' സ്ട്രീമിങ് ആരംഭിച്ചത്. മൂന്ന് ഭാഗങ്ങളായാണ് സീരീസ് പുറത്തിറങ്ങുക. നാല് എപ്പിസോഡുകളുള്ള ആദ്യ വോള്യം ആണ് ഇപ്പോൾ റിലീസ് ആയിരിക്കുന്നത്. മൂന്ന് എപ്പിസോഡുകളാണ് രണ്ടാം വോള്യത്തിൽ ഉള്ളത്. ഡിസംബർ 26, പുലർച്ചെ 6.30ന് രണ്ടാം ഭാഗം പുറത്തിറങ്ങും. ജനുവരി ഒന്നിന്, പുതുവത്സര ദിനത്തിലാകും മൂന്നാം വോള്യം എത്തുക.
അവസാന സീസൺ ഈ വിധം വിവിധ പാർട്ടുകൾ ആയി ഇറക്കുന്നതിനെ ആരാധകർ സോഷ്യൽ മീഡിയ വഴി ചോദ്യം ചെയ്തിരുന്നു. സീരീസിന്റെ ഇംപാക്ട് നിലനിർത്താനാണ് ഇത്തരം ഒരു തീരുമാനത്തിലേക്ക് എത്തിയത് എന്നാണ് ഷോ ക്രിയേറ്റർമാരായ ഡഫർ ബ്രദേഴ്സ് അറിയിച്ചത്. ഈ തീരുമാനത്തിന് പിന്നിൽ നെറ്റ്ഫ്ലിക്സ് അല്ലെന്നും റോസ് ഡഫർ വ്യക്തമാക്കി.
2016ൽ ആണ് 'സ്ട്രേഞ്ചർ തിങ്സ്' സ്ട്രീമിങ് ആരംഭിച്ചത്. അഭിനേതാക്കളുടെ മികച്ച പ്രകടനവും വ്യത്യസ്തമായ കഥപറച്ചിലും കൊണ്ട് വളരെ പെട്ടെന്ന് തന്നെ സീരീസ് വലിയ തോതിൽ ആരാധകരെ കണ്ടെത്തി. പിന്നാലെ 2017 ൽ രണ്ടാം സീസണും, 2019 ൽ മൂന്നാം സീസണും പുറത്തിറങ്ങി. 2022 ൽ റിലീസ് ആയ നാലാം സീസണ്‍ രണ്ട് ഭാഗങ്ങളായാണ് എത്തിയത്. ഈ ഫ്രാഞ്ചൈസിയുടെ അവസാന അധ്യായമാണ് അഞ്ചാം സീസണ്‍ .