ലോകേഷ് കനകരാജ് സംവിധാനം ചെയ്ത 'വിക്രം' എന്ന ചിത്രത്തിലെ റോളക്സ് എന്ന വില്ലൻ വേഷം സൂര്യയുടെ കരിയറിലെ തന്നെ ഏറെ ശ്രദ്ധേയമായ കഥാപാത്രങ്ങളിൽ ഒന്നാണ്. 'വിക്രം' ക്ലൈമാക്സിൽ ഏതാനും നിമിഷങ്ങൾ മാത്രം പ്രത്യക്ഷപ്പെടുന്ന ഈ കഥാപാത്രത്തിന്റെ സ്റ്റാൻഡ് എലോൺ ചിത്രം ലോകേഷ് പ്രഖ്യാപിച്ചിരുന്നു. എന്നാൽ, പിന്നീട് ഈ സിനിമയുടെ അപ്ഡേറ്റുകളൊന്നും പുറത്തുവന്നിരുന്നില്ല. ഇപ്പോഴിതാ, ദ ഹോളിവുഡ് റിപ്പോർട്ടർ ഇന്ത്യക്ക് നൽകിയ അഭിമുഖത്തിൽ റോളക്സ് സിനിമയെപ്പറ്റി തുറന്നുപറഞ്ഞിരിക്കുകയാണ് സൂര്യ.
സിനിമ എപ്പോൾ ആരംഭിക്കുമെന്ന കാര്യത്തിൽ തനിക്ക് വ്യക്തതയില്ലെന്ന് സൂര്യ പറഞ്ഞു. "ലോകേഷ് ഇപ്പോൾ എന്താണ് ചെയ്യുന്നതെന്ന് എനിക്കറിയില്ല. അദ്ദേഹം അല്ലു അർജുന്റെ ചിത്രത്തിന്റെ തിരക്കുകളിലാണ്. 'വിക്രം 2' ഉണ്ട്. എങ്കിലും അഭിമുഖങ്ങളിൽ റോളക്സിന്റെ എഴുത്തിലാണെന്ന് അദ്ദേഹം പറയുന്നത് കേൾക്കാറുണ്ട്. കാലം തീരുമാനിക്കട്ടെ," എന്നാണ് സൂര്യ പറഞ്ഞത്.
കമല് ഹാസനെ നായകനാക്കി ലോകേഷ് കനകരാജ് ഒരുക്കിയ 'വിക്രം' ഭാഷാഭേദമന്യെ സൂപ്പർ ഹിറ്റായി മാറിയിരുന്നു. ഫഹദ് ഫാസിലും വിജയ് സേതുപതിയുമാണ് ചിത്രത്തില് രണ്ട് പ്രധാന കഥാപാത്രങ്ങളെ അവതരിപ്പിച്ചത്. 400 കോടിക്ക് മുകളിലായിരുന്നു സിനിമയുടെ ആഗോള ഗ്രോസ് കളക്ഷൻ. കേരളത്തിൽ നിന്ന് 50 കോടിക്ക് അടുത്ത് കളക്ഷനും ചിത്രം സ്വന്തമാക്കിയിരുന്നു. ലോകേഷ് സിനിമാറ്റിക് യൂണിവേഴ്സിന്റെ ആരംഭ ചിത്രം കൂടിയായിരുന്നു 'വിക്രം'.