മികച്ച അനിമേഷൻ ചിത്രത്തിനുള്ള ദേശീയ പുരസ്‌കാരം നേടിയിരിക്കുകയാണ് 'എ കോക്കനട്ട് ട്രീ'. കോഴിക്കോട് തിരുവമ്പാടി പുല്ലൂരാമ്പാറ സ്വദേശി ജോഷി ബെനഡിക്ടാണ് എ കോക്കനട്ട് ട്രീ എന്ന അനിമേഷൻ ചിത്രത്തിൻ്റെ സംവിധായകൻ. പ്രകൃതിയെയും മനുഷ്യനെയും പ്രമേയമാക്കിയതാണ് എ കോക്കനട്ട് ട്രീ എന്ന ചിത്രം. 70-ാം ദേശീയ ചലച്ചിത്ര പുരസ്‌കാരങ്ങള്‍ പ്രഖ്യാപിച്ചപോൾ മലയാളക്കരക്ക് അഭിമാനമായി മാറിയിരിക്കുകയാണ് ഒരു കുഞ്ഞു അനിമേഷൻ ചിത്രമായ 'എ കോക്കനട്ട് ട്രീ'.
ഏറെ കാലത്തെ ജോഷിയുടെ ആഗ്രഹം കൂടിയാണ് ഈ ദേശീയ അവാർഡോടു കൂടി സഫലമാവുന്നത്. 2021 ൽ ആണ് 'എ കോക്കനട്ട് ട്രീ' പൂർത്തിയായത്. ബോംബെ ഉൾപ്പെടെ നിരവധി ഫെസ്റ്റിവലുകളിൽ തിളങ്ങിയെങ്കിലും അപ്പോഴും ചിത്രത്തിന് ദേശീയ അംഗീകാരം എന്ന സ്വപ്നം ഈ പുല്ലുരാംപാറക്കാരൻ മനസിൽ കൊണ്ടുനടന്നിരുന്നു. ഒടുവിൽ 2022ൽ അപേക്ഷ നൽകി. കാലം കാത്തു വെച്ച നീതി പോലെ ആഗ്രഹിച്ച അംഗീകാരത്തിൻ്റെ നിറവിലാണ് ജോഷി ബെനഡിക്ട്.