രോഗിയുമായി ആലപ്പുഴ വണ്ടാനം മെഡിക്കൽ കോളേജിലേക്ക് പോയ ആംബുലൻസിന് കുറുകെ കാറ് നിർത്തി യുവാക്കളുടെ വെല്ലുവിളി. പക്ഷാഘാതം വന്ന രോഗിയുമായി ആലപ്പുഴ വണ്ടാനം മെഡിക്കൽ കോളേജിലേക്ക് പോവുകയായിരുന്ന ആംബുലൻസാണ് യുവാക്കൾ തടഞ്ഞത്. താമരക്കുളം വയ്യാങ്കരയിൽ വെച്ചാണ് സംഭവം. ആബുലൻസ് ഹോൺ മുഴക്കിയത് യുവാക്കളെ പ്രകോപിപ്പിച്ചതിനെ തുടർന്നാണ് വാഹനം തടഞ്ഞത്.
ആംബുലൻസിന് സൈഡ് കൊടുക്കാതെ ഏറെ ദൂരം കാർ ഓടിച്ച് അഭ്യാസ പ്രകടനം നടത്തുകയും, വഴിയിൽ തടഞ്ഞു നിർത്തി ഡ്രൈവറെ കയ്യേറ്റം ചെയ്യാനും ശ്രമിക്കുകയും ചെയ്തു. ശൂരനാട് സ്വദേശികളായ യുവാക്കളാണ് യാത്ര തടസപ്പെടുത്തും വിധം കാറോടിച്ചത്. രോഗിയെ ആശുപത്രിയിൽ എത്തിച്ച ശേഷം ആംബുലൻസ് ഡ്രൈവർ വിഷ്ണു നൂറനാട് പൊലീസിൽ പരാതി നൽകി. സംഭവത്തിൻ്റെ സിസിടിവി ദൃശ്യങ്ങൾ പരിശോധിച്ച പൊലീസ് പ്രതികൾക്കെതിരെ കേസ് എടുത്തു.