തിരുവനന്തപുരത്ത് ആമയിഴഞ്ചാൻ തോട് വൃത്തിയാക്കാനിറങ്ങിയ ജോയിയുടെ മരണത്തിൽ അനുശോചിച്ച് മുഖ്യമന്ത്രി പിണറായി വിജയൻ. രക്ഷാപ്രവർത്തനത്തിൽ ഏർപ്പെട്ടവർക്ക് നാടിനുവേണ്ടി നന്ദി അറിയിക്കുന്നുവെന്നും മുഖ്യമന്ത്രി പറഞ്ഞു. 46 മണിക്കൂറുകൾ നീണ്ട തെരച്ചിലിനൊടുവിലാണ് ഇന്ന് തകരപ്പറമ്പ് പഴവങ്ങാടി തകരപ്പറമ്പ് ഭാഗത്തെ ഉപ്പിലാമൂട് കനാലിൽ ജോയിയുടെ മൃതദേഹം കണ്ടെത്തിയത്.
അതേസമയം, ജോയിയുടെ മാതാവിനെ സംരക്ഷിക്കണമെന്ന് ആവശ്യപ്പെട്ട് പാറശ്ശാല എംഎൽഎ സി.കെ. ഹരീന്ദ്രൻ മുഖ്യമന്ത്രിക്ക് കത്ത് നൽകി. ജോയിയുടെ ഏക വരുമാനത്തിലായിരുന്നു മാതാവ് കഴിഞ്ഞിരുന്നതെന്നും, റെയിൽവെയിൽ നിന്ന് ജോയിയുടെ കുടുംബത്തിന് ആവശ്യമായ നഷ്ടപരിഹാരം ഉറപ്പാക്കാൻ മുഖ്യമന്ത്രി ഇടപെടണമെന്നും ആവശ്യപ്പെട്ടാണ് സി.കെ. ഹരീന്ദ്രൻ മുഖ്യമന്ത്രിക്ക് കത്ത് നൽകിയത്.
ജോയിയുടെ മരണത്തിന് ഉത്തരവാദികള്‍ സര്‍ക്കാരും നഗരസഭയും റെയില്‍വേയുമാണെന്ന് കെ. സുധാകരന്‍ ആരോപിച്ചു. "ഇത് അധികാരികളുടെ കണ്ണ് തുറക്കേണ്ട വിഷയമാണ്. നഗരസഭയും റെയിൽവേയും പരസ്പരം ചെളി വാരിയെറിയുന്നത് ഹീനവും അപമാനവുമാണ്. കുടുംബത്തിന് നഷ്ടപരിഹാരം നല്‍കാന്‍ സര്‍ക്കാരും ഇന്ത്യന്‍ റെയില്‍വെയും തയ്യാറാകണം," കെ. സുധാകരന്‍ ആവശ്യപ്പെട്ടു.