എറണാകുളം: അതിജീവിതയെ കഴുത്തറുത്ത് കൊല്ലാൻ ശ്രമിച്ച് പോക്സോ കേസ് പ്രതി. ജാമ്യത്തിൽ ഇറങ്ങിയതിന് പിന്നാലെയാണ് പ്രതി അതിജീവിതയെ കൊല്ലാൻ ശ്രമിച്ചത്. അതിജീവിതയുടെ വീട്ടിൽ അതിക്രമിച്ചുകയറിയായിരുന്നു ആക്രമണം. സംഭവത്തിൽ അറക്കപ്പടി പെരുമാനി സ്വദേശി മുഹമ്മദ് അദിനാനെ പൊലീസ് അറസ്റ്റ് ചെയ്തു.
കത്തി ഉപയോഗിച്ചുള്ള ഉപദ്രവത്തിൽ പെൺകുട്ടിയുടെ രണ്ട് കൈകൾക്കും മുറിവേറ്റു. പെൺകുട്ടിയെ വലിച്ചിഴച്ചു കൊണ്ടുപോയി കത്തികൊണ്ട് ഉപദ്രവിക്കുന്നത് കണ്ട് രക്ഷിക്കാൻ ശ്രമിച്ച അയൽവാസിക്കും പരിക്കേറ്റു. ഇന്നലെ ഉച്ച കഴിഞ്ഞ് രണ്ടുമണിയോടെ ആയിരുന്നു സംഭവം.
വിവരമറിഞ്ഞ് പൊലീസ് എത്തുമ്പോഴേക്കും പ്രതി സംഭവസ്ഥലത്തു നിന്നും ഓടിരക്ഷപ്പെട്ടിരുന്നു. തുടർന്ന് നടത്തിയ തിരച്ചിലിന് ഒടുവിലാണ് പ്രദേശത്തുള്ള കുറ്റിക്കാട്ടിൽനിന്നും പ്രതിയെ പൊലീസ് സാഹസികമായി പിടികൂടിയത്.