ഡല്ഹി മദ്യനയ അഴിമതി ആരോപണവുമായി ബന്ധപ്പെട്ട സിബിഐ കേസില് മുഖ്യമന്ത്രി അരവിന്ദ് കെജ്രിവാളിന്റെ ജുഡീഷ്യല് കസ്റ്റഡി ജൂലൈ 25 വരെ നീട്ടി. ഡല്ഹി റോസ് അവന്യൂ കോടതിയുടേതാണ് വിധി.
ജൂണ് 25 ന് കള്ളപ്പണം വെളുപ്പിക്കല് കേസില് ജാമ്യം നിഷേധിക്കപ്പെട്ട് മണിക്കൂറുകള്ക്കുള്ളില് കെജ്രിവാളിനെ തിഹാര് ജയിലില് സി.ബി.ഐ ചോദ്യം ചെയ്യുകയും ജൂണ് 26ന് കോടതി അനുമതിയോടെ അറസ്റ്റ് ചെയ്യുകയുമായിരുന്നു.
ഡല്ഹി മദ്യനയ അഴിമതിയിലെ മുഖ്യ സൂത്രധാരന് അരവിന്ദ് കെജ്രിവാളാണെന്നാണ് സിബിഐയുടെ വാദം. കേസില് ആം ആദ്മി പാര്ട്ടിയും താനും തെറ്റ് ചെയ്തിട്ടില്ലെന്നും മദ്യ വ്യവസായത്തിലൂടെ നികുതി കൂട്ടാന് മാത്രമായിരുന്നു നിര്ദേശം നല്കിയിരുന്നതെന്നുമാണ് കെജ്രിവാള് പറയുന്നത്. കോവിഡ് കാലത്ത് കെജ്രിവാള് സൗത്ത് ഗ്രൂപ്പ് അംഗങ്ങളുടെ സ്വകാര്യ വിമാനത്തില് ഡല്ഹിയിലെത്തിയെന്നും സൗത്ത് ഗ്രൂപ്പ് തയ്യാറാക്കിയ റിപ്പോര്ട്ട് പിന്നീട് മദ്യനയം ആവുകയായിരുന്നു എന്നുമാണ് സിബിഐ നിരീക്ഷണം.